သိုၵ်းမၢၼ်ႈ ယိုတ်းမိူင်း ၶဝ်ႈယိုဝ်း ႁိူၼ်းၽူႈသိုဝ်ႇၶၢဝ်ႇ ၼႂ်းၸႄႈဝဵင်းၵျႅၵ်ႉထူဝ်ႇ မိူင်းမွၼ်း ၽူႈသိုဝ်ႇၶၢဝ်ႇ လူႉတၢႆ 2 ၵေႃႉ ယဝ်ႉၵေႃႈ ၸုမ်းလုၵ်ႉၽိုၼ်ႉ KRF လူႉတၢႆ 2 ၵေႃႉ ဝႃႈၼႆ။
ပူၼ်ႉမႃး ဝၼ်းတီႈ 21/08/2024 ယၢမ်းၵၢင်ၼႂ် ၽွင်းမိူဝ်ႈ ၸုမ်းလုၵ်ႉၽိုၼ်ႉ KRF ၵႂႃႇလႄႇ တီႈႁိူၼ်းၽူႈ သိုဝ်ႇၶၢဝ်ႇ တီႈဝၢၼ်ႈလႅတ်ႉပျႃႉ ၸႄႈဝဵင်းၵျႅၵ်ႉထူဝ်ႇ ၸႄႈမိူင်းမွၼ်း သိုၵ်းမၢၼ်ႈလႆႈၶၢဝ်ႇသေ ဢဝ်ဢဵၼ် ႁႅင်း 30 ပၢႆ မႃးဝႅတ်ႉ သွင် ၾၢႆႇလႆႈယိုဝ်းတိုၵ်းၵၼ်။ ၽူႈသိုဝ်ႇၶၢဝ်ႇ 2 ၵေႃႉ ဢၼ်ဢမ်ႇမီးၵွင်ႈၵၢင်ႇသင်ၼၼ်ႉ ၺႃးယိုဝ်းတၢႆ တီႈႁိူၼ်းၼၼ်ႉ ဝႃႈ ၼႆ။
ၽူႈသိုဝ်ႇၶၢဝ်ႇ 2 ၵေႃႉၼၼ်ႉ ပဵၼ်ၵူဝ်ႇဝိၼ်းထုတ်ႉဢူး ၽူႈဢဝ်ၶၢဝ်ႇပိုၼ်ႉတီႈ CJ ႁွင်ႈၵၢၼ်သိုဝ်ႇ DVB လႄႈ ၵူဝ်ႇထႅတ်ႉမျႅတ်ႉတူႇ ၸဝ်ႈႁိူၼ်း ၽူႈသိုဝ်ႇၶၢဝ်ႇလွတ်ႈလႅဝ်းပိုၼ်ႉတီႈ ဝႃႈၼႆ။
ၵူဝ်ႇဝိၼ်းထုတ်ႉဢူးၼႆႉ မိူဝ်ႈသိုၵ်းမၢၼ်ႈ ယိုတ်းမိူင်း ယၢမ်ႈၼႄၵၢင်ၸႂ်သၢၼ်ၶတ်းသေ ၺႃးသိုၵ်းမၢၼ်ႈ ပိုၼ်ၽၢဝ်ႇတီႉ ၺွပ်း၊ မၼ်းၸၢႆးငိူင်ႉပၢႆႈ ၵႂႃႇယူႇဝႆႉတီႈႁိူၼ်း ၵူဝ်ႇထႅတ်ႉမျႅတ်ႉတူႇ ၼႂ်းၸႄႈဝဵင်းၵျႅၵ်ႉထူဝ်ႇ။
မိူၼ်ၼႆ ၵူဝ်ႇထႅတ်ႉမျႅတ်ႉတူႇၵေႃႈ ယၢမ်ႈၺႃးသိုၵ်းမၢၼ်ႈ တီႉၺွပ်းပၼ်တၢမ်ႇၶွၵ်ႈ 1 ပီ တိုၵ်ႉလွတ်ႈဢွၵ်ႇ မႃးၶိုၼ်းပႆႇႁိုင်သေ သိုပ်ႇႁဵတ်းၵၢၼ်သိုဝ်ႇၶၢဝ်ႇၼႂ်းပိုၼ်ႉတီႈဝႆႉ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။
