မီးၶၢဝ်ႇလိုဝ်းဢွၵ်ႇမႃးဝႃႈ မိူင်းၶႄႇ ႁွင်ႉထူပ်း ႁူဝ်ၼႃႈ သိုၵ်းၵဝ်ႈၵၢင်ႉ MNDAA  တီႈမိူင်းၶႄႇ ဝႃႈၼႆ။

ၾၢႆႇမိူင်းၶႄႇ ပဵၼ်တဵင်ႉသျီႊၵျွၼ်ႊ ၽူႈတႅၼ်းၶိုၵ်ႉတွၼ်း ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ႁူပ်ႉထူပ်းတင်း ၽိူင်တႃႉသျုၼ် (ဖုန်တာရွှင်) ႁူဝ်ၼႃႈ သိုၵ်းၵဝ်ႈၵၢင်ႉ MNDAA တီႈၸႄႈမိူင်းယူႊၼၢၼ်ႊ ၸိုင်ႈမိူင်းၶႄႇ၊ သွင်ၾၢႆႇဢုပ်ႇဢူဝ်း လွင်ႈသင်ဢၼ်ဝႃႈၼၼ်ႉတႄႉ ပႆႇႁၼ် ပိုၼ်ၽၢဝ်ႇပဵၼ်တၢင်းၵၢၼ်။

ဢိင်ၼိူဝ် လွင်ႈၼႆႉ ၽူႈလဵပ်ႈႁဵၼ်းၵၢၼ်သိုၵ်းၶဝ် လၢမ်းၶၢတ်ႈဝႆႉဝႃႈ မိူင်းၶႄႇ ၸၢင်ႈပၼ်ႁႅင်းဢီး ႁႂ်ႈသိုၵ်း ၵဝ်ႈၵၢင်ႉ MNDAA ႁူပ်ႉဢုပ်ႇၵၼ်တင်း သိုၵ်းမၢၼ်ႈ ယိုတ်းမိူင်းၼႆ – သိုဝ်ႇၶၢဝ်ႇ BBC ႁၢႆးငၢၼ်းဝႆႉၼင်ႇၼႆ။

သိုၵ်းၵဝ်ႈၵၢင်ႉ MNDAA ၼႆႉ ပဵၼ်ၸုမ်း ဢၼ်ဝႆႉၼၵ်းၶေႃႈဢုပ်ႇဢူဝ်းမိူင်းၶႄႇ၊ ယၢမ်ႈပိုၼ်ၽၢဝ်ႇဢွၵ်ႇဝႆႉဝႃႈ ၵဵဝ်ႇၵပ်း ၵၢၼ်မိူင်း ၵၢၼ်သိုၵ်း ၸိူဝ်းၼႆႉ တေဢမ်ႇႁူမ်ႈ တင်း NUG ။ လိူဝ်ၼၼ်ႉ တေဢမ်ႇၶဝ်ႈတိုၵ်း ဝဵင်းလိူဝ်ႇတင်း ဝဵင်းတူၼ်ႈတီး။

ဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ ပိုၼ်ၽၢဝ်ႇယိုတ်းၵုမ်းလႆႈဝႆႉ မိူဝ်ႈဝၼ်းတီႈ 03/08/2024 ၼၼ်ႉသေတႃႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ၵႆႉပွႆႇမၢၵ်ႇႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းမိူင်းမၢတ်ႇၸဵပ်း လူႉတၢႆ။

တဵင်ႉသျီႊၵျွၼ်ႊ ၽူႈတႅၼ်းၶိုၵ်ႉတွၼ်းမိူင်းၶႄႇၼႆႉ ယၢမ်ႈႁွင်ႉႁူပ်ႉတင်း ႁူဝ်ၼႃႈ သိုၵ်းဝႃႉ UWSA ၊ သိုၵ်းၶၢင် KIA ၸိူဝ်းၼႆ့သေ ပၼ်ၾၢင်ႉ ႁႂ်ႈၵိုတ်းလွင်ႈထူဝ်းသိုၵ်း တီႈလႅၼ်လိၼ်ၶႄႇလႄႈ ၵိုတ်းလွင်ႈၵမ်ႉၸွႆႈ ၶိူင်ႈၵွင်ႈၵၢင်ႇပၼ် ဝႃႈၼႆ။