ၼူၶူပ်းတူၼ်ႈၶဝ်ႈ တီႈဝဵင်းမိူင်းပၢႆး ၸိုင်ႈတႆးပွတ်းၸၢၼ်း လူႉသုမ်းၵႂႃႇ မွၵ်ႈ 700 ဢေႊၶိူဝ်ႊ ၵူၼ်းမိူင်းမႆႈၸႂ် တႃႇၵိၼ်ယႅမ်ႉမိူဝ်းၼႃႈ။

တီႈဝဵင်းမိူင်းပၢႆး လႅၼ်လိၼ်တႆး – ယၢင်းလႅင်ၼႆႉ ယွၼ်ႉၼမ်ႉၼွင်းလုပ်ႇထူမ်ႈ တီႈၶူင်ႈတီႈတႅမ်ႇ ၸဝ်ႈၼႃး ဢွၼ် ၵၼ်ၶၢႆႉၽုၵ်ႇ တီႈၵွင်းလွႆလႄႈ သမ်ႉၺႃးၼူ ပဵၼ်မူႇပဵၼ်ၽုင် သွၵ်ႈတဝ်ၶူပ်းယႃႉတူၼ်ႈၶဝ်ႈ၊ မၢင်လွၵ်း ၺႃးၼူၶူပ်းၵႂႃႇ 2-3 ဝႃး၊ ၶူပ်းယႃႉပႅတ်ႈတင်းတူၼ်ႈလႄႈ မီးလွင်ႈလူႉသုမ်းၼမ် ဝႃႈၼႆ။

ၵူၼ်းမိူင်းပိုၼ်ႉတီႈ မိူင်းပၢႆးၼႆႉ ၵမ်ႈၼမ် ႁဵတ်းၵၢၼ်ၽုၵ်ႇသွမ်ႈ ႁႃၵိၼ်လဵင်ႉတွင်ႉ၊ ၼိုင်ႈပီၼႆႉ ၽုၵ်ႇသွမ်ႈမွၵ်ႈ 3 ၶၢဝ်း၊ မၢၵ်ႇၶဝ်ႈတဝ်ႈၼမ်ႉ ဢၼ်လႆႈမႃး ၶၢဝ်းလႂ်ၶၢဝ်းၼၼ်ႉ ဝၢင်းၶၢႆသေ ႁဵတ်းတိုၼ်းလၢင်းၶိုၼ်း တႃႇၽုၵ်ႈသွမ်ႈ ပီၼႃႈ။

ၼႂ်းပီၼႆႉ သူၼ်ၽုၵ်ႇသွမ်ႈ လူႉၵွႆၵႂႃႇမွၵ်ႈ 1,700 ဢေႊၶိူဝ်ႊယဝ်ႉ။ ယွၼ်ႉၼမ်ႉၽီလူး ၼွင်းလုပ်ႈသေ လူႉၵွႆၵႂႃႇ ၼိုင်ႈႁဵင်ဢေႊၶိူဝ်ႊလႄႈ ယွၼ်ႉၼူၶူပ်းသေ သူၼ်ၽုၵ်ႇသွမ်ႈလူႉၵွႆၵႂႃႇ မွၵ်ႈ 700 ဢေႊၶိူဝ်ႊ ဝႃႈၼႆ။

တီႈဝဵင်းမိူင်းပၢႆးၼႆႉ ၼွၵ်ႈလိူဝ်ၽေးၼမ်ႉ ၽေးၼူၵူၼ်းမိူင်းလႆႈႁူပ်ႉထႅင်ႈ ၽေးပၢင်တိုၵ်းသိုၵ်းသိူဝ် လႆႈ ငိူင်ႉပၢႆႈၼႂ်းထိူၼ်ႇၼႂ်းၶိူဝ်း ယၢပ်ႇၽိုတ်ႇၵိၼ်းၸႂ်ဝႆႉႁၢဝ်ႈႁႅင်း – သိုဝ်ႇၶၢဝ်ႇ Kantarawaddy Times ဢွၵ်ႇဝႆႉၼင်ႇၼႆ။