တပ်ႉသိုၵ်းမၢၼ်ႈ ယိုတ်းမိူင်းတင်း လုၵ်ႈလၢင်းၼၢင်းမေးၶဝ် ႁူဝ်ၵူၼ်း 400 ပၢႆ လုၵ်ႉတၢင်းဝဵင်းသီႇပေႃႉ ထွႆႁႅင်းသိုၵ်း ၵႂႃႇတၢင်းဝဵင်းမိူင်းယႆ။
ဝၼ်းတီႈ 14/10/2024 ယၢမ်းဝၢႆးဝၼ်း တပ်ႉသိုၵ်းမၢၼ်ႈ ၶလယ 23 ႁူမ်ႈလူၺ်ႈ ၽူႈမီးၸၼ်ႉပႃးၵွင်ႈၸေး မိုဝ်းသေ ဢိၵ်ႇတင်း လုၵ်ႈလၢင်းမေးၼၢင်း (မုင်ႉႁေႃႁိူၼ်း) ၶဝ်တႃႇၵႃး 10 လမ်းပၢႆ လုၵ်ႉတၢင်းဝဵင်းသီႇပေႃႉ ထွႆၵႂႃႇတၢင်းဝဵင်းမိူင်းယႆ ၼႆယဝ်ႉ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸဵမ်ၵူၼ်းသိုၵ်းၶဝ်၊ ၵူၼ်းမၢတ်ႇၸဵပ်းၶဝ်လႄႈ ႁူမ်ႈလူၺ်ႈ လုၵ်ႈလၢင်းၼၢင်းမေးၶဝ် ဢမ်ႇယွမ်း 400 ၵေႃႉ ၶီႇၵႃးလူင် (တွဲကား) 3 လမ်းလႄႈ ၵႃးဢွၼ်ႇ ဢမ်ႇယွမ်း 6 လမ်း ထွႆ ၵႂႃႇတၢင်းမိူင်းယႆၼၼ်ႉ။ ၵူၺ်းၵႃႈ ၵူၼ်းသိုၵ်း ဢၼ်ထွႆၵႂႃႇၼၼ်ႉ ပႃးၵွင်ႈၸေးမိုဝ်းသေ ၵႂႃႇဢေႃႈ မိူၼ်တင်းၶဝ် တူၵ်းလူင်းဢုပ်ႇဢူဝ်းငူပ်ႉငီႉၵၼ်သေ ထွႆၵႂႃႇၵူၺ်း”- ဝႃႈၼႆ။
တပ်ႉသိုၵ်းမၢၼ်ႈ ၶလယ 23 တီႈဝဵင်းသီႇပေႃႉၼႆႉ ယူႇတီႈ တပ်ႉသိုၵ်းတဢၢင်း TNLA ၸႂ်ႉၶၢဝ်းယၢမ်း ၶိုၼ်ႈလေႃႇတိုၵ်း တပ်ႉၼၼ်ႉမႃး ၶၢဝ်းတၢင်း 2 လိူၼ်ပၢႆ ၸင်ႇယိုတ်းၵုမ်းလႆႈ မိူဝ်ႈဝၼ်းတီႈ 13 ပူၼ်ႉမႃးၼႆႉ ဝႃႈၼႆ။
ဢိင်ၼိူဝ် လွင်ႈသိုၵ်းမၢၼ်ႈ ထွႆႁႅင်းသိုၵ်း ၵႂႃႇတၢင်းမိူင်းယႆၼၼ်ႉသေ ႁဵတ်းႁႂ်ႈမီးလွင်ႈၶဵင်ႈၶႅင်ၵၢၼ်သိုၵ်း တေႃႇၵၼ် တင်းတပ်ႉသိုၵ်းၵဝ်ႈၵၢင်ႉ MNDAA ဢၼ်မီးဝႆႉ တီႈမိူင်းယႆၼၼ်ႉ။ ယွၼ်ႉဝႃႈ သိုၵ်းမၢၼ်ႈၼႆႉ တေထႅမ်ႁႅင်းသိုၵ်း မုင်ႈ ၸူးတၢင်းလႃႈသဵဝ်ႈသေ တႃႇတေယိုတ်းၵုမ်းဢဝ်ၶိုၼ်းလႆႈဝဵင်းလႃႈသဵဝ်ႈ ဝႃႈၼႆ။
“ဢၼ်တပ်ႉသိုၵ်းၵဝ်ႈၵၢင်ႉၶဝ် သိမ်းလႆႈ ၵႃးၵၢပ်ႇလဵၵ်းသိုၵ်းမၢၼ်ႈၼၼ်ႉ ၶဝ်ႁေႃႈမႃးၽႅဝ် တီႈဝဵင်းမိူင်းယႆ ၼႆႉဢေႃႈ။ ငဝ်းလၢႆးပၢင်တိုၵ်း တီႈဝဵင်းလႃႈသဵဝ်ႈၼၼ်ႉ လႅပ်ႈတေႁၢႆႉမႃးလိူဝ်ၵဝ်ႇထႅင်ႈယူႇ ဢမ်ႇၼၼ် ၶဝ်တေၶဝ်ႈယိုဝ်းမိူင်းယႆႁိုဝ် ၼမ်ႉလၼ်ႈႁိုဝ် ဢမ်ႇႁူႉ။ ဢၼ် PDF ၶဝ် ပႂ်ႉၵဵတ်ႉဝႆႉတီႈမိူင်းယႆ – တၢင်ႉယၢၼ်းၼၼ်ႉ ဢမ်ႇမီးယဝ်ႉ ယၢမ်းလဵဝ် သိုၵ်းမၢၼ်ႈ ထႅမ်ႁႅင်းသိုၵ်း ၶိုၼ်ႈမႃးဝႆႉ”- ၵူၼ်းပိုၼ်ႉတီႈ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈ ၼင်ႇၼႆ။
သိုၵ်းၵဝ်ႈၵၢင်ႉၼႆႉ ၵုမ်းလႆႈ တပ်ႉၶလယ 67 တီႈႁိမ်းဝၢၼ်ႈႁူဝ်ယ ၸႄႈဝဵင်းမိူင်းယႆတင်း ၶလယ 147 တီႈ ဝၢၼ်ႈၼွင်ၵေႃႈလူင် ၸႄႈဝဵင်းသီႇပေႃႉ ၼၼ်ႉယဝ်ႉ။ ယၢမ်းလဵဝ် သိုၵ်းၵဝ်ႈၵၢင်ႉၼႆႉ မႃးႁွတ်ႈၽႅဝ် ႁိမ်းဝဵင်းၼမ်ႉလၼ်ႈ ၸိူဝ်း ၼႆႉဝႆႉယဝ်ႉ ဝႃႈၼႆ။
မိူဝ်ႈဝၼ်းတီႈ 09 ယၢမ်းၵၢင်ၼႂ် 2:25 မူင်းၼၼ်ႉ ၶိူင်ႈမိၼ် သိုၵ်းမၢၼ်ႈ မႃးပွႆႇမၢၵ်ႇတူၵ်းသႂ်ႇ တီႈႁူင်းၸၢၵ်ႈ ၵိူဝ်ဝၢၼ် တၢၼ်ႇတွင်ႇဢူး ၶွင်ငူၺ်ႇယီႇပလႄး ဢၼ်မီးဝၢၼ်ႈသႅၼ်တေႃ ၸႄႈဝဵင်းမိူင်းယႆ ဢၼ်မီးၼိူဝ် သဵၼ်ႈတၢင်းမိူင်းယႆ – သီႇပေႃႉသေ ၸၢၵ်ႇမၢၵ်ႇတိူဝ်ႉၺႃး ၵူၼ်းမၢတ်ႇၸဵပ်း 9 ၵေႃႉ၊ လူႉတၢႆ 1 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ