ဝၼ်းတီႈ 01/10/2024 ယၢမ်းၵၢင်ဝၼ်း ရူတ်ႉၵႃးပၢတ်ႉသ် တၢင်ႇလုၵ်ႈႁဵၼ်း တီႈၸႄႈတွၼ်ႈဢုထႆးထႃးၼီး ဢွၵ်ႇၶၢဝ်းတၢင်းၵႂႃႇလဵပ်ႈႁဵၼ်း ဝဵင်းလူင်ၵုင်းထဵပ်ႈ ၶိူင်ႈၸၢၵ်ႈၵွႆသေ ၾႆးမႆႈရူတ်ႉ တၢင်းၶဝ်ႈၵုင်းထဵပ်ႈ လုၵ်ႈႁဵၼ်းလႄႈ ၶူးတၢႆ ႁၢႆဝႆႉ 20 ပၢႆ။

ၶၢဝ်ႇထႆး ဢွၵ်ႇဝႆႉဝႃႈ ၶူးသွၼ်တီႈႁူင်းႁဵၼ်း ဝတ်ႉၶဝ်ၽယႃး တႄႈတွၼ်ႈဢုထႆးထႃးၼီး ၸူဝ်းဢဝ်လုၵ်ႈႁဵၼ်းတီႈႁူင်းႁဵၼ်း 100 ပၢႆ ဢွၵ်ႇၶၢဝ်းတၢင်း တေၵႂႃႇဢႅဝ်ႇယဵမ်ႈလဵပ်ႈႁဵၼ်း တီႈဝဵင်းၵဝ်ႇၽရၼၶွၼ်းသီ ဢယုတ်ႉထယႃး။

ၽွင်းၵၢင်ဝၼ်းတဵင်ႈ တေၶဝ်ႈၵုင်းထဵပ်ႈ ၽွင်းထိုင်တီႈၼႃႈသျေးယႃး ရင်ႊသိတ်ႇ၊ ၼိူဝ်သဵၼ်ႈတၢင်းဝိၽႃႊဝတီႊ ၼႃႈ ဢၼုသွၼ် သထၢၼ်ၼၼ်ႉ မၢၵ်ႇရူတ်ႉ လုၵ်ႈတၢင်းၼႃႈၾၢႆႇသၢႆႉ တႅၵ်ႇသေ ႁူဝ်ရူတ်ႉၵႂႃႇၽႃႇၺႃးႁူဝ်ႉၵင်ႈ ဢၼ်ၶႅၼ်ႈ ၵၢင်တၢင်း၊ ႁဵတ်းႁႂ်ႈၾႆးမႆႈ ရူတ်ႉႁၢဝ်ႈႁႅင်းလႄႈဝႆး ။

ၼိူဝ်ရူတ်ႉတၢင်ႇမႃး လုၵ်ႈႁဵၼ်းၸၼ်ႉဢွၼ်ထိုင် ၸၼ်ႉမေႃး 3 လႄႈၶူးသွၼ် တင်းမူတ်း 44 ၵေႃႉ။

ၽွင်းၾႆးမႆႈၼၼ်ႉ လုၵ်ႈႁဵၼ်းလႄႈၶူး တၼ်းလႅၼ်ႈလူင်းရူတ်ႉပူၼ်ႉ 19 ၵေႃႉ။ ႁၼ်ၾႆးမႆႈတူဝ်တၢႆၼိူဝ်ရူတ်ႉ 10 ၵေႃႉ။ လိူဝ်ၼၼ်ႉတႄႉ ႁၢႆဝႆႉ ပႆႇႁူႉၶေႃႈတွပ်ႇ ဝႃႈၼႆ။

ရူတ်ႉၵႃးတၢင်ႇလုၵ်ႈႁဵၼ်း တီႈႁူင်းႁဵၼ်းဝတ်ႉၶဝ်ၽယႃး လုၵ်ႉဢုထႆးထႃးၼီး မႃးလဵပ်ႈႁဵၼ်းတီႈဢယုတ်ႉထယႃးၼႆႉ မႃးၸွမ်းၵၼ် 3 လမ်း။ ဢၼ်ၾႆးမႆႈၼႆႉပဵၼ်လမ်းၼႂ်းၵၢင် ၶၢဝ်ႇထႆးတႅမ်ႈတၢင်ႇဝႆႉၼင်ႇၼႆ။

မိူင်းထႆးၼႆႉ ယွၼ်ႉပိူဝ်ႈႁေႃႈရူတ်ႉဢမ်ႇၸွမ်းမၢႆမီႈသေ ရူတ်ႉၽႃႇတမ်ၵၼ် ႁဵတ်းႁႂ်ႈၵူၼ်းတၢႆ ၼမ်သုတ်း မိူင်းၼိုင်ႈ ၼႂ်းလုမ်ႈၾႃႉ။