ဝၢႆးသေ သိုၵ်းမၢၼ်ႈယိုတ်းမိူင်းယဝ်ႉ ၼႂ်းမိူင်းႁူမ်ႈတုမ် ပတ်းပိုၼ်ႉ သုၵ်ႉယုင်ႈဢူၼ်ႈၵဝ်း ဢမ်ႇမီးမိူဝ်ႈ ၼိမ်သဝ်းၵတ်းယဵၼ်။ ၵူၼ်းမိူင်းလႆႈမႆႈလႆႈလိူတ်ႇ ၵူႈၸိူဝ်ႉၵူႈပိူင်။ ၼႂ်းၵႄႈ လွင်ႈယၢပ်ႇၽိုတ်ႇလူင်ၼႆႉ သိုၵ်းမၢၼ်ႈသမ်ႉ တဵၵ်းၸႂ်ႉၵူၼ်းမိူင်းၶဝ်ႈႁၢပ်ႇၵၢၼ်သိုၵ်းထႅင်ႈ။

မိူၼ်ၼင်ႇ ဝဵင်းမိူင်းၽျၢၵ်ႈ ၸိုင်ႈတႆး ပွတ်းဢွၵ်ႇၼႆႉၵေႃႈ မိူဝ်ႈဢွၼ်တၢင်းတႄႉ ၶၢၼ်းၵဵပ်း ၵူၼ်းၼုမ်ႇ တႃႇႁဵတ်းသိုၵ်း၊ ၵူၼ်းၼုမ်ႇသမ်ႉ ဢွၼ်ၵၼ်ပၢႆႈၼမ်လႄႈ ၵမ်းၼႆႉသမ်ႉ တဵၵ်းၸႂ်ႉၵူၼ်းၶၢဝ်ႉၵူၼ်းၵႄႇ ၶဝ် ႁၢပ်ႇၵၢၼ်သိုၵ်း။ ဢႃယု 65 ၸိူဝ်းၼႆႉၵေႃႈ ဢမ်ႇလွတ်ႈ ႁႂ်ႈၵႂႃႇၾိုၵ်းၵၢၼ်သိုၵ်းဝႆးဝႆး ဝႃႈၼႆ။

ဝၼ်းတီႈ 10/09/2024 ယၢမ်းႁူဝ်ၶမ်ႈ 4 မူင်းၼၼ်ႉ ၵၢင်ႉၵႄႇ ၼႂ်းၸႄႈဝဵင်းမိူင်းၽျၢၵ်ႈ ၸိုင်ႈတႆးပွတ်းဢွၵ်ႇ ႁွင်ႉႁူပ်ႉထူပ်းၵူၼ်းမိူင်းသေ ဢုပ်ႇလၢတ်ႈလွင်ႈၵဵပ်းၵူၼ်းမိူင်းၵႂႃႇၾိုၵ်းၵၢၼ်သိုၵ်း တႃႇၽွတ်ႈပဵၼ်ၸုမ်းၵႅတ်ႇၶႄၵူၼ်းမိူင်း ၼႂ်းဝၢၼ်ႈၼႂ်းဢိူင်ႇၽႂ်မၼ်း (ပြည်သူ့ကာကွယ်ရေး) ဝႃႈၼႆ။

ၼႂ်းပၢင်ၵုမ်ၼၼ်ႉ ပႃးၽူႈမီးၸၼ်ႉ ၼႂ်းတပ်ႉသိုၵ်းမၢၼ်ႈ လၢႆၵေႃႉလႄႈ ၽူႈယႂ်ႇၵူၼ်းလူင်ၼႂ်းဝၢၼ်ႈၼႂ်းဝဵင်း ၸိူဝ်းၼႆႉ ၶဝ်ႈႁူမ်ႈ။ ၼႂ်းဝၼ်းလဵဝ်ၵူၺ်း ၸတ်းပၢင်ၵုမ်သွင်ပွၵ်ႈ ပွတ်းၼႂ်တႄႉ သိုၵ်းမၢၼ်ႈ ႁွင်ႉထူပ်းၵၢင်ႉၵႄႇဢွၼ်တၢင်း၊ ထိုင်ဝၢႆးဝၼ်းမႃး ၵၢင်ႉၵႄႇၸင်ႇႁွင်ႉထူပ်းၵူၼ်းမိူင်းသေ လၢတ်ႈလွင်ႈသိုၵ်း မၢၼ်ႈၸီႉသင်ႇ။

မိူဝ်ႈႁူဝ်ပီ 2024 ၼၼ်ႉတႄႉ သိုၵ်းမၢၼ်ႈ တဵၵ်းႁႂ်ႈၵၢင်ႉၵႄႇၶဝ် ၵဵပ်းပၼ်သဵၼ်ႈၸိုဝ်ႈ ၵူၼ်းၼုမ်ႇ ဢႃယု 18 ၶိုၼ်ႈၼိူဝ်။ ယၢမ်းလဵဝ်တႄႉ ၵူၼ်းသႅၼ်းဢႃယု 36 ထိုင် 65 ၵေႃႈ တၵ်းလႆႈၵႂႃႇၾိုၵ်းၵၢၼ်သိုၵ်း။ ၵၢင်ႉၵႄႇၶဝ်တႄႉ လၢတ်ႈဝႃႈ ၾိုၵ်းၵၢၼ်သိုၵ်း ပွၵ်ႈၼႆႉ တႃႇမႃးၵႅတ်ႇၶႄ ဢဝ်လွင်ႈႁူမ်ႇလူမ်ႈ ဝၢၼ်ႈ ဝဵင်းၸဝ်ႈၵဝ်ႇၵူၺ်း။ ၼႂ်း 6 ပွၵ်ႉ ၼႂ်းဝဵင်းမိူင်း ၽျၢၵ်ႈၼႆႉ တၵ်းလႆႈႁႃပၼ်ဢဵၼ်ႁႅင်းၵူၼ်းတႃႇ 90 ၵေႃႉ။   ၼႂ်းၼၼ်ႉ 30 ၵေႃႉၼႆႉ တေလႆႈၶဝ်ႈႁၢပ်ႇၵၢၼ်သေတႃႇ 60 ၵေႃႉၼႆႉ တေႁႂ်ႈၵႅမ်ဝႆႉ တႃႇပၼ်ႇပုတ်ႈပႂ်ႉ ႁၢပ်ႇၵၢၼ်  –  ၵူၼ်းမိူင်းၽျၢၵ်ႈ ၵေႃႉၼိုင်ႈ လၢတ်ႈတၢင်းၵႂၢမ်းမၢၼ်ႈၼင်ႇ ၼႆ –

“ၶဝ်လၢတ်ႈ ႁႂ်ႈၵူၼ်းသႅၼ်းဢႃယု 36 တေႃႇထိုင် 65 တၵ်းလႆႈၵႂႃႇၾိုၵ်းၵၢၼ်သိုၵ်းၼႆဢေႃႈ။ ၶဝ်လၢတ်ႈ ဝႃႈတေၽွတ်ႈပဵၼ်ၸုမ်းဝႆႉသေ တႃႇၵႅတ်ႇၶႄၵူၼ်းမိူင်း ၼႂ်းဢိူင်ႇၼႂ်းဝၢၼ်ႈၸဝ်ႈၵဝ်ႇၵူၺ်း ၼႆဢေႃႈ။ ဢမ်ႇလႆႈၵႂႃႇၶဝ်ႈပၢင်တိုၵ်း တီႈလႂ်ၼင်ႇၵဝ်ႇ ၼႆဝႃႇ။ ၼႂ်းပွၵ်ႉႁဝ်းၼႆႉ ပႃးသဵၼ်ႈၸိုဝ်ႈဝႆႉ ပဵၼ် 90 ၵေႃႉဢေႃႈ။ ၶဝ်လၢတ်ႈဝႃႈ ပေႃးၵႂႃႇၾိုၵ်းမႃးယဝ်ႉ ဢၼ်တေလႆႈမႃးႁၢပ်ႇၵၢၼ်ၵမ်းလဵဝ် တႃႇၶၢဝ်းယၢဝ်းသမ်ႉ ႁူဝ်ၼပ်ႉ 30 ၵေႃႉ။ ဢၼ်ၵိုတ်းလိူဝ် 60 ၵေႃႉၼႆႉသမ်ႉ တႃႇ ၵႅမ်ဝႆႉၼႆဢေႃႈ” – ဝႃႈၼႆ။

ပၢင်ၾိုၵ်းသိုၵ်းပွၵ်ႈၼႆႉ တေႁိုင်ၶၢဝ်းတၢင်းၼိုင်ႈလိူၼ် တေလႆႈၾိုၵ်းတီႈၼႂ်းတပ်ႉ ၶမယ 329 ဢၼ်ယူႇတႂ်ႈၸၵၶ 18 တေလႆႈယူႇၵိၼ်ၼွၼ်း ၼႂ်းတပ်ႉတေႃႇပေႃးလူင်းပၢင်သွၼ်။ ပၢင်ၾိုၵ်းသိုၵ်းပွၵ်ႈၼႆႉ သိုၵ်းမၢၼ်ႈ တေဢၢၼ်းတႄႇၼႂ်းလိူၼ်သႅပ်ႊထိမ်ႊပိူဝ်ႊၼႆႉၵႂႃႇလႄႈ ႁႂ်ႈၵူၼ်းတင်းဝဵင်း ၽွမ်ႉႁဵတ်းၸွမ်းၵူႈႁိူၼ်း ၵူၼ်းမိူင်းၽျၢၵ်ႈသိုပ်ႇလၢတ်ႈ။

မိူဝ်ႈတႄႇမၼ်းတႄႉ ႁွင်ႉၵူၼ်းၼုမ်ႇၵႂႃႇၾိုၵ်းၵၢၼ်သိုၵ်း ၵူၺ်းၵႃႈ ၵူၼ်းၼုမ်ႇသမ်ႉ ပၢႆႈၼမ်။ ဝၢႆးၼၼ်ႉၵေႃႈ ၸင်ႇႁႂ်ႈ ၸၢင်ႈၵူၼ်းၵႂႃႇတႅၼ်းလုၵ်ႈလၢင်းၽႂ်မၼ်း။ ႁဵတ်းၼၼ်ၵေႃႈ သိုၵ်းမၢၼ်ႈ ပႆႇႁၢၼ်ႉၸႂ်လႆႈ ယၢမ်းလဵဝ်သမ်ႉ ၵူၼ်းၶၢဝ်ႉ ၵူၼ်းၵႄႇ ဢႃယုထိုင် 65 ၵေႃႈ ယင်းဢမ်ႇလွတ်ႈ တေလႆႈၵႂႃႇၾိုၵ်းၵၢၼ် သိုၵ်းထႅင်ႈ။

ၵၢင်ႉၵႄႇၶဝ်တႄႉ ယွၼ်ႉၵူဝ်သိုၵ်းမၢၼ်ႈႁဵတ်းႁၢႆႉလႄႈ ၵႃႈလႆႈႁဵတ်းၸွမ်းၼင်ႇ သိုၵ်းမၢၼ်ႈၸီႉသင်ႇ။ ၵၢင်ႉၵႄႇၶဝ် ၵႃႈလႆႈ ႁူၺ်းသူၼ်းၵူၼ်းမိူင်းဝႃႈ ၵၢၼ်ၾိုၵ်းသိုၵ်းပွၵ်ႈၼႆႉ ဢမ်ႇလႆႈၵႂႃႇၶဝ်ႈပၢင်တိုၵ်း တေႁႂ်ႈပႂ်ႉဢဝ်လွင်ႈႁူမ်ႈလူမ်ႈ ၵူၼ်းမိူင်းၼႂ်းဢိူင်ႇၼႂ်းဝၢၼ်ႈၵူၺ်း။ တေႁႂ်ႈၽွတ်ႈပဵၼ် ၸုမ်းၵႅတ်ႇၶႄၵူၼ်းမိူင်း ၼႂ်းဝၢၼ်ႈဢိူင်ႇၽႂ်မၼ်း။ တေၸၢင်ႈႁႄႉႁၢမ်ႈလႆႈ လွင်ႈၽူႈလၵ်ႉၸၵ်ႉၶုတ်ႈၼႆသေတႃႉ ၵူၼ်းမိူင်းတႄႉ ဢမ်ႇႁတ်းယုမ်ႇသိုၵ်းမၢၼ်ႈ ဝၢႆးၵႂႃႇၾိုၵ်းၵၢၼ်သိုၵ်းမႃးယဝ်ႉ ၵူဝ်သိုၵ်းမၢၼ်ႈ တဵၵ်းၸႂ်ႉၵႂႃႇၶဝ်ႈ ၼႂ်းပၢင်တိုၵ်းသိုၵ်းသိူဝ် ၵူၼ်းမိူင်းၽျၢၵ်ႈ လၢတ်ႈၼႄဝႆႉၼင်ႇၼႆ –

“ၶဝ်တႄႉလၢတ်ႈဝႃႈ ပေႃးလူင်းပၢင်သွၼ်မႃးယဝ်ႉၵေႃႈ မႃးပႂ်ႉဢဝ်လွင်ႈႁူမ်ႇလူမ်ႈ ပွၵ်ႉဢိူင်ႇဝၢၼ်ႈၽႂ် မၼ်းၵူၺ်း။ ၵူၼ်းလၵ်ႉၸၵ်ႉၶုတ်ႈၵေႃႈ တေဢမ်ႇႁတ်းမႃးၵၢႆ။ ဢၼ်ရူတ်ႉၶိူင်ႈယၢမ်ႈႁၢႆ ၸိူဝ်းၼၼ်ႉၵေႃႈ တေႁႄႉႁၢမ်ႈလႆႈ။ ဝႃႈ ၼၼ်သေတႃႉ ၽႂ်ၵေႃႈဢမ်ႇယုမ်ႇသိုၵ်းမၢၼ်ႈ။ ၵႃႈၶဝ်ပေႉၶႂ်ႈဝႃႈ ဢမ်ႇၵႂႃႇ ၶဝ်ႈပၢင်တိုၵ်းၵေႃႈယဝ်ႉ ဝၢႆးမႃးပေႃး ၶဝ်ဢဝ်ၵွင်ႈငႃသေၸႂ်ႉၵႂႃႇ ၽႂ်တေႁတ်းထဵင်ၶဝ်”- ဝႃႈၼႆ။

ၽူႈၸမ်ၸႂ် သိုၵ်းမၢၼ်ႈ ၶဝ်ဢုပ်ႇၵၼ်ဝႃႈ – ပေႃးလိူၼ်ၼႃႈမႃး သိုၵ်းမၢၼ်ႈ တေလူင်းၵဵပ်းသဵၼ်ႈမၢႆ ႁူဝ်ၵူၼ်း ၼႂ်းမိူင်း ၽျၢၵ်ႈၵႂႃႇထႅင်ႈ။ လွင်ႈၼႆႉၵေႃႈ သိုၵ်းမၢၼ်ႈ တေၶႂ်ႈၶိုင်လၢႆးလႂ်ထႅင်ႈတႄႉ ပႆႇႁူႉၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။

သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းၼႆႉ ၵူၼ်းၼုမ်ႇၵေႃႈ ဢမ်ႇမီးတၢင်းလိူၵ်ႈတၢင်းပႆ ၵူၼ်းမိူင်းၵေႃႈ ႁၢမ်းႁႅၵ်းၵၢၼ်ငၢၼ်း ဢမ်ႇမီးငိုၼ်းၶဝ်ႈ၊ ပၢႆးမၢၵ်ႈမီးတူၵ်း၊ ယၢမ်းလဵဝ်သမ်ႉ ၵူၼ်းမိူင်းလႆႈပၢႆႈၽေးသိုၵ်း သိူဝ်လႄႈ ၽေးသၽႃႇဝထႅင်ႈ။ မၢၵ်ႇၶဝ်ႈတဝ်ႈၼမ်ႉၵေႃႈ လူႉသုမ်း။ သိုၵ်းမၢၼ်ႈသမ်ႉ ပိုၼ်ၽၢဝ်ႇဝႃႈ ပိုၼ်ႉတီႈဢၼ်ၶဝ်လႆႈ ပွႆႇပႅတ်ႈယွမ်းသုမ်း တေႃႇသိုၵ်းၸၢဝ်းၶိူဝ်း ၸိူဝ်းၼၼ်ႉ ၶဝ်တေတိုၵ်းဢဝ်ၶိုၼ်း ႁႂ်ႈလႆႈၼႆလႄႈ ပဵၼ်ၽွင်းၵဵပ်းၵူၼ်းမိူင်းလဵၵ်ႉယႂ်ႇၼုမ်ႇထဝ်ႈ မႃး ၾိုၵ်းၵၢၼ်သိုၵ်းယူႇတိၵ်းတိၵ်း။