ၼမ်ႉထူမ်ႈ ဝဵင်းလွႆၶေႃ ၸႄႈမိူင်းယၢင်းလႅင် ထူမ်ႈပႃးႁိူၼ်းယေးၵူၼ်းမိူင်းလႄႈ တီႈယူႇတၼ်းသဝ်း ၵူၼ်းပၢႆႈၽေးသိုၵ်း – လႆႈဢွၼ်ၵၼ်သိုပ်ႇပၢႆႈထႅင်ႈ ဝႃႈၼႆ။

သိုၵ်းမၢၼ်ႈ ယိုတ်းမိူင်း ပိုတ်ႇၾၢႆမိူင်းပၢႆး မိူဝ်ႈႁၢင်လိူၼ်ၵျူႊလၢႆႊၼၼ်ႉ ႁဵတ်းႁႂ်ႈၼမ်ႉထူမ်ႈၶဝ်ႈထိုင် ဝဵင်းမိူင်းပၢႆး လႆလူင်းထိုင်တီႈ ဝဵင်းလွႆၶေႃ ၼွင်းထူမ်ႈႁိူၼ်းယေးၵူၼ်းမိူင်း တေႃႇထိုင်ဝၼ်းမိူဝ်ႈၼႆႉ ၼမ်ႉယင်းပႆႇႁႅင်ႈ။

ၸုမ်းၵႅတ်ႇၶႄၵူၼ်းမိူင်း ဝဵင်းလွႆၶေႃ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “မိူဝ်ႈၶဝ်တႄႇပိုတ်ႇၾၢႆၼၼ်ႉ ၼမ်ႉတေထူမ်ႈ ၼႂ်းၸႄႈဝဵင်းမိူင်းပၢႆး ဢၼ်မီးၼႂ်းမိူင်းတႆး ပွတ်းၸၢၼ်းဢွၼ်တၢင်း ပေႃးယဝ်ႉ ၼမ်ႉၸင်ႇလုၵ်ႉတီႈၼၼ်ႈလႆလူင်းမႃး ၼႂ်းဝဵင်းလွႆၶေႃ ဢၼ်မီး ၼႂ်းမိူင်းယၢင်းလႅင်ၼႆႉ။ တႄႇၸဵမ်မိူဝ်ႈ သိုၵ်းမၢၼ်ႈပိုတ်ႇၾၢႆၼမ်ႉယဝ်ႉ တေႃႇထိုင်မိူဝ်ႈလဵဝ် ၼမ်ႉတိုၵ်ႉသိုပ်ႇၶိုၼ်ႈဢမ်ႇထၢတ်ႇ”- ဝႃႈၼႆ။

ယွၼ်ႉၼမ်ႉၶိုၼ်ႈလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ဢၼ်မီးၼႂ်းဝဵင်းလွႆၶေႃၼၼ်ႉ ယၢပ်ႇၽိုတ်ႇၶဝ်ႈ ၼမ်ႉတၢင်းၵိၼ်လႄႈ တႃႇၽုၵ်ႇသွမ်ႈၼႆ ၸုမ်းၸွႆႈထႅမ် တူင်ႇဝူင်းၵူၼ်း ဝဵင်းလွႆၶေႃ လၢတ်ႈၼႄၼင်ႇၼႆ။

“ၵူၼ်းပၢႆႈၽေးသိုၵ်း လႆႈသိုပ်ႇပၢႆႈၽေးၼမ်ႉထူမ်ႈထႅင်ႈ။ ၵူၼ်းၸိူဝ်းၶမ်ဝႆႉ ၼႂ်းဝဵင်းၵေႃႈ ယၢပ်ႇၽိုတ်ႇ တၢင်းၵိၼ်ယႅမ်ႉ။ ယၢမ်းလဵဝ် တႃႇတေႁဵတ်းသူၼ်ႁဵတ်းၼႃးၵေႃႈ ဢမ်ႇၸၢင်ႈ။ ဢမ်ႇမီးႁွင်ႈၼမ်ႉမိူင်ၼမ်ႉလႄႈ ၼမ်ႉဢမ်ႇၸၢင်ႈလႆ တႃႇ ၼမ်ႉတေယွမ်းၶိုၼ်းတႄႉ တေလႆႈၸႂ်ႉၶၢဝ်းယၢမ်းႁိုင်ယူႇ”– ဝႃႈၼႆ။

လိူဝ်ၼၼ်ႉ ၵူၼ်းပၢႆႈၽေးသိုၵ်း ႁဵင်ပၢႆ ဢၼ်လႆႈသိုပ်ႇပၢႆႈၽေးၼမ်ႉထူမ်ႈယူႇ ယၢမ်းလဵဝ်ၼႆႉ ဢမ်ႇမီးမူႇလႂ်ၸုမ်းလႂ် ၶဝ်ႈမႃးၸွႆႈထိုင်လႆႈလႄႈ ယၢပ်ႇၽိုတ်ႇတၢင်းၵိၼ်တၢင်းယႅမ်ႉဝႆႉ။

တေႃႇထိုင်ယၢမ်းလဵဝ် ၼမ်ႉထူမ်ႈႁၢဝ်ႈႁႅင်းဝႆႉယူႇၵေႃႈ သိုၵ်းမၢၼ်ႈ တပ်ႉၶမယ 422 ပႆႇဢိုတ်းပၼ် ၶိုၼ်းၽၵ်းတူၼမ်ႉ။

ၵွပ်ႈၼႆလႄႈ ၼမ်ႉၸၢင်ႈသိုပ်ႇထူမ်ႈထႅင်ႈ ဝၢၼ်ႈသူၼ်ႁိူၼ်းယေး ၸိူဝ်းယူႇသဝ်းႁိမ်းႁွမ်း ဝဵင်းလွႆၶေႃ ထႅင်ႈယူႇၼႆ – IEC ၶွင်ႊသီႊၽွင်းငမ်းၸူဝ်ႈၵၢင် မိူင်းယၢင်းလႅင်ၵေႃႈ ပိုၼ်ၽၢဝ်ႇပၼ်ၾၢင်ႉဝႆႉၼင်ႇၼႆ။

ပၢင်ယၼ်ႇသိုၵ်း 1111 ၼၼ်ႉ တပ်ႉသိုၵ်းယၢင်းလႅင် ႁူမ်ႈလူၺ်ႈ PDF သေ ၵုမ်းလႆႈဝဵင်းမိူင်းပၢႆးဝႆႉယဝ်ႉ။ ယူႇတီႈ တပ်ႉသိုၵ်းမၢၼ်ႈ ၶမယ 422 တႄႉ ပႆႇၵုမ်းလႆႈ တေႃႇထိုင်ယၢမ်းလဵဝ်။

တႅမ်ႈ – ၼၢင်းသႅင်ၶမ်း (ၽူႈသိုဝ်ႇၶၢဝ်ႇၾိုၵ်းၵၢၼ်)