တီႈၼႂ်းၸႄႈမိူင်းၵူႊၵျႃႊရတ်ႉ ဢၼ်မီးၼႂ်းတွၼ်ႈတၢင်းတူၵ်းၸိုင်ႈမိူင်းၵြႃး ဢိၼ်ႊတီႊယႃႊၼၼ်ႉ ၼႂ်းလိူၼ်ၵျူႊလၢႆႊ ၼႆႉ ၵူၼ်းမိူင်းၸပ်းတၢင်းပဵၼ် ၸိူဝ်ႉမႅၼ်းဝၢႆႊရၢတ်ႉသ် ဢၼ်ႁဵတ်းႁႂ်ႈ ဢွၵ်းဢေႃၵႂ်ႈ ၽႄႈလၢမ်းၸပ်းၵၼ်လႄႈ တၢႆ ႁိမ်းၸမ် 60 ၵေႃႉ၊ ႁဵတ်းႁႂ်ႈၸုမ်းၾၢႆႇယူႇလီလႄႈၾၢႆႇလိူမ်ႈလႆႈ ပိုၼ်ၽၢဝ်ႇပဵၼ်ငဝ်းလၢႆးၶိုၵ်ႉၶၵ်ႉသေပႂ်ႉတူၺ်းတၢင်းပဵၼ် ၼႆႉယူႇ ဝႃႈၼႆ။

တႃႇတေႁႄႉၵင်ႈလႆႈတၢင်းပဵၼ်ၸိူဝ်ႉမႅင်းဢၼ်တၢင်ႇၸိုဝ်ႈဝႆႉဝႃႈ ၶျၼ်ႊတီႊပူႊရႃႊၼႆႉ ၸဝ်ႈၼႃႈတီႈၸိုင်ႈမိူင်းလႆႈလူင်းပိုၼ်ႉတီႈၼႂ်းဝၢၼ်ႈၼႂ်းဢိူင်ႇ တီႈၵူၼ်းၸၼ်ႉထၢၼ်ႈပိုၼ်ႉၶဝ်ယူႇသဝ်းသေ ၸွႆႈႁဵတ်းလွင်ႈမူတ်းသႂ်၊ သိတ်းယႃႈယႃ ၶႃႈမူင်ႈမႅင်းလႄႈၶႃႈယုင်းလၢႆး ၸိူဝ်းၼႆႉဝႆႉယူႇ ၶၢဝ်ႇရၢႆႊထိူဝ်ႊ တႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။

ႁွင်ႈၵၢၼ်ၾၢႆႇပၢႆးယူႇလီ ၸႄႈမိူင်းၵူႊၵျႃႊရတ်ႉတႄႉပိုၼ်ၽၢဝ်ႇဝႆႉဝႃႈ ၸိူဝ်ႉမႅင်းတၢင်းပဵၼ်ၼႆႉ မၼ်းၽႄႈလၢမ်းၶၢဝ်း ၾူၼ်တူၵ်းသေ ၼမ်ႉထူမ်ႈ၊ ၼမ်ႉၶၢင်ႉၶမ် ၼႂ်းဢိူင်ႇၼႂ်းဝၢၼ်ႈၸိူင်ႉၼႆ။ ယွၼ်ႉၸိူဝ်ႉမႅင်းတၢင်းပဵၼ်သႅၼ်းၼႆႉသေ ဢၼ်လႆႈလူႉတၢႆၵေႃႈ ပဵၼ်လုၵ်ႈဢွၼ်ႇဢႃယု ပႃႈတႂ်ႈ 15 ပီ ၵမ်ႈၼမ်။

မႅင်းဢၼ် တေႃႉၸိူဝ်ႉမႅင်းတၢင်းပဵၼ်ၼႆႉ သမ်ႉပဵၼ်ယုင်း၊ မႅင်းမူၼ်းလႄႈ ႁိၼ်ႉ ၽႄႉ ၸိူဝ်းယူႇသဝ်းၽႄႈၶႆႇၼႂ်းႁိူၼ်းလိၼ် ႁိူၼ်းၶႃးလႄႈၼႂ်းလိၼ်တႅၵ်ႇၶၢပ်ႇၸိူဝ်းၼႆႉ။ ၾၢင်ႁၢင်ႈတၢင်းပဵၼ်တႄႉ တေပဵၼ်ၼိူဝ်ႉလိူတ်ႇၼိူဝ်ႉမႆႈဝၼ်းႁိုင်၊ ထိုင်တီႈဢွၵ်းဢေႃၵႂ်ႈ ႁူဝ်ၶႆႈႁူဝ်ၸဵပ်းသေ ပေႃးယူတ်းယႃဢမ်ႇၶိုတ်းတၼ်း ၸၢင်ႈထိုင်တၢႆ ဝႃႈၼႆ။