တႆးႁွတ်ႈၵဵင်းမႆႇ(ႁႅင်းၵၢၼ်ယၢၼ်မိူင်း) ၵေႃႉၼိုင်ႈ ၺႃးလူတ်ႉၶိူင်ႈၽႃႇတၢႆ ၼႂ်းၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ ၸိုင်ႈထႆး။
ဝၼ်းတီႈ 05/06/2017 ယၢမ်းၵၢင်ၼႂ် 11 မူင်း ၸၢႆးၺုၼ်ႉမွင်ႇ (ၸၢႆးၸၼ်) ဢႃယု 41 ပီ လႆႈလူႉသဵင်ႈၵႂႃႇတီႈႁူင်း ယႃၼၶွၼ်းၾိင်း(ပႃႇငႄႉ) ၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ ၸိုင်ႈထႆး။ လႆႈပဵၼ်ၽေးၵိုင်ႉၵၢင်ႉ လူတ်ႉၶိူင်ႈ ၽႃႇၺႃးၵၼ် တီႈပႃႇႁူၵ်ႉ ဢိူင်ႇလွတ်ႊၵႅဝ်ႊ ၸႄႈဝဵင်းမႄႈရိမ်း မိူဝ်ႈဝၼ်းတီႈ 04/06/2018 ယၢမ်းၵၢင်ၶမ်ႈ 8:30 မူင်း ဝႃႈၼႆ။
ၸၢႆးလိူၼ်ၶမ်း ၽူႈပွင်ၵၢၼ်ၾၢႆႇၸွႆႈထႅမ်ၵူၼ်းတၢႆ ဢမ်ႇမီးပီႈၼွင်ႉဝတ်ႉပႃႇပဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းပဵၼ် လူတ်ႉၶိူင်ႈတင်း 2 လမ်း ၽႃႇၺႃးၵၼ်။ လူတ်ႉၶိူင်ႈလမ်းဢၼ်ၽႃႇၺႃးၸၢႆးၺုၼ်ႉမွင်ႇၼၼ်ႉ ပဵၼ်လူတ်ႉၶိူင်ႈ ၵူၼ်း မိူင်း/ ၵူၼ်းထႆး။ ၵူၺ်းၵႃႈ လူတ်ႉၶိူင်ႈ တင်းသွင်ၾၢႆႇ ဢမ်ႇမီးဝႂ်ႁပ်ႉႁွင်းလူတ်ႉၶိူင်ႈ(ၽေႃးရေႃးပေႃး)ၼင်ႇၵၼ်။ တႃႇတေလႆႈ ငိုၼ်းၵမ်ႉထႅမ်တီႈဝႂ်ႁပ်ႉႁွင်းလူတ်ႉၶိူင်ႈၼၼ်ႉၵေႃႈ ဢမ်ႇလႆႈ။ ၸဝ်ႈလူတ်ႉၶိူင်ႈၽူႈၽႃႇသႂ်ႇၸၢႆးၺုၼ်ႉမွင်ႇ ၼၼ်ႉၵေႃႈ ဢမ်ႇမႃးၸွႆႈသင်သေဝၢတ်ႇ” ဝႃႈၼႆ။
တူဝ်တၢႆ ၸၢႆးၺုၼ်ႉမွင်ႇၼႆႉ လႆႈမႃးဝႆႉတီႈဝတ်ႉပႃႇပဝ်ႈ ၸႄႈဝဵင်းၵဵင်းမႆႇ ၸိုင်ႈထႆး။ မိူဝ်ႈၼႆႉ ဝၼ်းတီႈ 7 ယၢမ်း 1 မူင်းဝၢႆးဝၼ်း ပူၼ်ႉၶၢပ်ႈတူဝ်ႁွပ်ႇႁူဝ်ၶဝ်ႈႁဵဝ်ႈ တီႈပႃႇႁဵဝ်ႈသၼ်ႊတီႊထမ်ႊ ၵဵင်းမႆႇ ဝႃႈၼႆ။
ၸၢႆးၺုၼ်ႉမွင်ႇ(ၸၢႆးၸၼ်) ဢႃယု 41 ပီ ပဵၼ်လုၵ်ႈၸၢႆး လုင်းယေႇ- ပႃႈလူႇ ပဵၼ်ၵူၼ်းၸႃတိ ဝၢၼ်ႈႁူဝ်ပၢင်ႇ ဝဵင်း ၵႃလိ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ တႄႇၼႃႈႁိူၼ်းၵိုၵ်းၸွမ်း ၼၢင်းငူၺ်ႇ မီးလုၵ်ႈ ယိင်းႁူမ်ႈၵၼ် 2 ၵေႃႉ။ လုၵ်ႈယိင်းၵေႃႉၼိုင်ႈ ဢႃယု 10 ပီ။ ထႅင်ႈၵေႃႉၼိုင်ႈ ဢႃယု 7 ၶူပ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ