တႆးႁွတ်ႈၵဵင်းမႆႇ ၵေႃႉၼိုင်ႈ ပဵၼ်ၽေးဢုပၢတ်ႈ ၺႃးရူတ်ႉၽႃႇတၢႆ

ႁႅင်းၵၢၼ်တႆး ဢႃယု 22 ပီ တီႈၵဵင်းမႆႇ ၸိုင်ႈထႆး ၵိူတ်ႇပဵၼ်ၽေးဢုပၢတ်ႈ ၺႃးရူတ်ႉၵႃး ၽႃႇသေ လႆႈလူႉတၢႆ တီႈႁူင်းယႃ ၸႄႈဝဵင်းႁၢင်လူင်း ဝႃႈၼႆ။

ဝၼ်းတီႈ 25/8/2019 ယၢမ်းၵၢင်ၶိုၼ်း ၸၢႆးဢူင်းမိၼ်ႉ ဢႃယု 22 ပီ လုၵ်ႉတၢင်းၸႄႈဝဵင်းႁၢင်လူင်း မုင်ႈၼႃႈၸူး တၢင်းဝဵင်း ၵဵင်းမႆႇသေ လႆႈၵိူတ်ႇပဵၼ်ၽေးဢုပၢတ်ႈ ရူတ်ႉၶိူင်ႈတင်းၵႃးၽႃႇၵၼ် တီႈ 4 ယႅၵ်ႈသၼ်ပႃႇသၵ်း ၸႄႈဝဵင်းႁၢင်လူင်း ၸႄႈ တွၼ်ႈၵဵင်းမႆႇ ၸိုင်ႈထႆး။ မၼ်းၸၢႆးလႆႈၵႂႃႇလူႉတၢႆ တီႈႁူင်းယႃႁၢင်လူင်း ယၢမ်းၵၢင်ၶိုၼ်း 1 မူင်းပၢႆ ဝႃႈၼႆ။

ၸၢႆးတႆးထိူၼ်ႇ ၽူႈၸွႆႈထႅမ် ႁႅင်းၵၢၼ်ယၢၼ်မိူင်း ၼႂ်းၸႄႈဝဵင်းၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ၵဵဝ်ႇလူၺ်ႈလွင်ႈၾၢႆႇ လႂ်ၽိတ်း၊ ၾၢႆႇလႂ်ထုၵ်ႇဢၼ်ဝႃႈၼၼ်ႉတႄႉ ၸဝ်ႈၼႃႈတီႈပလိၵ်ႈၶဝ်ဝႃႈ ႁႂ်ႈႁဝ်းၶႃႈ ဢဝ်ၶၢပ်ႈတူဝ် ၸၢႆးဢူင်းမိၼ်ႉၼႆႉ ဢဝ်ၵႂႃႇလုမ်းလႃးပူၼ်ႉၶၢပ်ႈတူဝ်သေၵွၼ်ႇ။ ဝၢႆးၼၼ်ႉယဝ်ႉ ၸင်ႇတေႁွင်ႉ မႃးဢုပ်ႇၵၼ် ဝႃႈတၢင်းလႂ်ၽိတ်း/ ထုၵ်ႇ တေလႆႈႁဵတ်းၸိူင်ႉႁိုဝ် ၼႆၸိူဝ်းၼႆႉ”ဝႃႈၼႆ။

ၸၢႆးဢူင်းမိၼ်ႉ ဢႃယု 22 ပီၼႆႉ ပဵၼ်လုၵ်ႈၸၢႆး လုင်းၵေးလေးလႄႈ ပႃႈယဵၼ်ႇ ပဵၼ်ၵူၼ်းၸႃတိ ဝၢၼ်ႈၼွင်ပႃမူၼ်ႇ ဢိူင်ႇ ၼႃးလေႃး ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

တေႃႈလဵဝ် ၶၢပ်ႈတူဝ်တၢႆ ၸၢႆးဢူင်းမိၼ်ႉၼႆႉ လႆႈၼမ်းဢဝ်မႃးဝႆႉတီႈဝတ်ႉပႃႇပဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇဝႆႉ ပေႃး ထိုင်မႃး ဝၼ်းတီႈ 28/8/2019 ၸိုင် ယူႇတီႈပီႈၼွင်ႉၸိူဝ်ႉၶိူဝ်းလႄႈ ဢူၺ်းၵေႃႉဢူၺ်းသေႈ တေဢွၼ်ၵၼ်ပူၼ်ႉၶၢပ်ႈ တူဝ် ႁွပ်ႇႁူဝ်ၶဝ်ႈႁဵဝ်ႈၵႂႃႇ ဝႃႈၼႆ။

ၸၢႆးဢူင်းမိၼ်ႉၼႆႉ ႁဵတ်းၵၢၼ်တီႈပမ်ႉၼမ်ႉမၼ်း ႁိမ်းၸမ်ယႅၵ်ႈသၼ်ပႃႇသၵ်း ၸႄႈဝဵင်းႁၢင်လူင်း ၸႄႈတွၼ်ႈၵဵင်းမႆႇ ၸိုင်ႈထႆး ဝႃႈၼႆ။