တႆးႁွတ်ႈၵဵင်းမႆႇ (ႁႅင်းၵၢၼ်တႆး) ၽူႈယိင်းဢႃယု 36 ပီ ၵေႃႉၼိုင်ႈ ၺႃးၵႃးၽႃႇသေ ယၢမ်းလဵဝ်ပဵၼ်တုၵ်ႉၶိတဝႆႉ ယူတ်းယႃ တူဝ်ယူႇတီႈႁိူၼ်းသဝ်း ဢမ်ႇလႆႈႁပ်ႉငိုၼ်းၵႃႈသၢႆႈတႅၼ်းတီႈၸဝ်ႈၵႃးၼၼ်ႉသေဝၢတ်ႇ ဝႃႈၼႆ။

မိူဝ်ႈဝၼ်းတီႈ 8/10/2019 ပူၼ်ႉမႃးၼၼ်ႉ ၼၢင်းသီၼူၼ်း ဢႃယု 36 ပီ ၺႃးၵႃး 6 လေႃႉ တမ်ၽႃႇသႂ်ႇ တီႈၼႃႈၶူင်းၵၢၼ် ၵေႃႇသၢင်ႈမူႇဝၢၼ်ႈႁိူၼ်းယေး ၵၢၼ်းၵၼူၵ်ႇ 1 ၸႄႈဝဵင်းသၼ်ၵမ်ႇၽႅင်း ၸႄႈတွၼ်ႈၵဵင်းမႆႇ ၸိုင်ႈထႆး။ ထိုင်ယၢမ်းလဵဝ် မၼ်းၼၢင်းဢမ်ႇလႆႈႁပ်ႉငိုၼ်း ၵႃႈသၢႆႈ တႅၼ်းတီႈၸဝ်ႈၵႃးၼၼ်ႉသေဝၢတ်ႇ။

ၼၢင်းသီၼူၼ်း ၵေႃႉၺႃးၵႃးၽႃႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈၺႃးၵႃးၽႃႇ တီႈတၢင်းသၼ်ၵမ်ႇၽႅင်း ၽိူဝ်ႇႁူႉ တူဝ်မႃးၵေႃႈ တူဝ်ၶႃႈ ပေႃးၵႂႃႇမီးႁူင်းယႃ ပႃႇငႄႉယဝ်ႉၶႃႈ။ ၸဝ်ႈၵႃးၼၼ်ႉ တႄႉ မႃးသူႇၸႂ်းတူၺ်းၶႃႈမွၵ်ႈ 2 ဝၼ်းၵူၺ်းၶႃႈ။ ၽိူဝ်ႇမႃးယူႇတီႈႁိူၼ်း တီႈလမ်းပုၼ်းၼႆႉ ဢမ်ႇမႃးတူၺ်း ဢမ်ႇထူဝ်းမႃးသေ ပွၵ်ႈၶႃႈ။ ယူႇတီႈၶႃႈထူဝ်းႁႃၶဝ်ၵေႃႈ ပွၵ်ႈ – သွင်ပွၵ်ႈၵေႃႈ ဢမ်ႇႁပ်ႉသၢႆၶႃႈ။ လိူဝ်ၼၼ်ႉ ငိုၼ်းၵႃႈယူတ်းယႃၵေႃႈဢမ်ႇဢွၵ်ႇ ပၼ် ဢမ်ႇသၢႆႈတႅၼ်းပၼ်သေဝၢတ်ႇၶႃႈ” ဝႃႈၼႆ။

ၸဝ်ႈၵႃးမႃးၸႂ်းတီႈႁူင်းယႃသေယင်းလၢတ်ႈၸႃယွမ်းႁပ်ႉဝႃႈ မၼ်းၽိတ်း တေယွမ်းၸၢႆႇပၼ်ၵႃႈယူတ်းယႃတင်းမူတ်းၼႆ သေတႃႉ ထိုင်ယၢမ်းလဵဝ် ၵပ်းသိုပ်ႇဢမ်ႇလႆႈ ဝႃႈၼႆ။

ၵႃႈယူတ်းယႃတူဝ် ၼၢင်းသီၼူၼ်း တီႈႁူင်းယႃပႃႇငႄႉၼၼ်ႉ တင်းမူတ်းလႆႈသဵင်ႈ မွၵ်ႈ 1 သႅၼ်ဝၢတ်ႇပၢႆ။ ၸဝ်ႈၵႃးဢၼ် ၽႃႇမၼ်းၼၢင်းၼၼ်ႉ ဢမ်ႇႁပ်ႉပုၼ်ႈၽွၼ်းသင်သေလွင်ႈ ဢမ်ႇပၼ်ငိုၼ်းၸွႆႈၵႃႈယူတ်း ယႃသင် ၸၢႆးတႆးထိူၼ်ႇလၢတ်ႈ ၼႄတီႈၽူႈတွႆႇႁွၵ်ႈၼင်ႇၼႆ။

“ တင်းမူတ်း လႆႈသဵင်ႈၵႃႈယူတ်းယႃ 1 သႅၼ်ဝၢတ်ႇပၢႆ။ ယူႇတီႈတူဝ်ၶႃႈသေ လႆႈၵႂႃႇလူင်းလၢႆးမိုဝ်းဢဝ်ဢွၵ်ႇမႃးၶႃႈဢေႃႈ။ ႁဝ်းၶႃႈလႆႈပၼ်ဝႆႉ 5,000 ဝၢတ်ႇ။ ယဝ်ႉၵေႃႈ ၵႃႈ(ၽေႃရေႃးပေႃး) ရူတ်ႉပၼ်မႃး 30,000 ဝၢတ်ႇ တင်းမူတ်း ႁူမ်ႈၵၼ် လႆႈ ပၼ်ဝႆႉတီႈႁူင်းယႃ 35,000 ဝၢတ်ႇ။ တၢင်းၾၢႆႇၸဝ်ႈၵႃးဢၼ်ၽႃႇၼၼ်ႉ ဢမ်ႇႁပ်ႉပုၼ်ႈၽွၼ်းသင်သေလွင်ႈ။ တင်း ၸဝ်ႈၵႃးလႄႈ တင်းႁဝ်း မႃးဢုပ်ႇဢူဝ်းၵၼ်တီႈႁူင်းပလိၵ်ႈသေ တူၵ်းလူင်းၵၼ် ၸဝ်ႈၵႃးၼၼ်ႉဝႃႈ ၶဝ်တေႁပ်ႉပုၼ်ႈ ၽွၼ်းသေ ၸၢႆႇၵႃႈႁူင်းယႃ။ ၵမ်းၼႆႉ တၢင်းၾၢႆႇၶွမ်ႊပၼီႊရူတ်ႉၼၼ်ႉ ၵပ်းသိုပ်ႇႁႃမၼ်းဢမ်ႇလႆႈ ယူႇတီႈၾၢႆႇၶွမ်ႊပၼီႊ ထူဝ်းၸႅင်ႈမႃးတီႈႁဝ်းၶႃႈ ၸဝ်ႈၵႃးၼၼ်ႉ ထူဝ်းႁႃဢမ်ႇလႆႈ မၼ်းပၢႆႈယဝ်ႉ။ ၵဵဝ်ႇၵပ်းလွင်ႈၼႆႉ ႁဝ်းၶႃႈ တိုၵ်ႉတေလမ်းလိူင်ႈ ဢမူႉၶၻီႊမၼ်းယူႇ တေၵႂႃႇဢုပ်ႇတၢင်းၸဝ်ႈၼႃႈတီႈပလိၵ်ႈၶဝ်ထႅင်ႈၵမ်းၼိုင်ႈယူႇၶႃႈလွင်ႈၼႆႉ” ဝႃႈၼႆ။

ၼၢင်းသီၼူၼ်းၼႆႉ ယၢမ်းလဵဝ် လုပ်ႇၵုမ်ႇလုတ်ႈဝႆႉလႄႈ ဢမ်ႇၸၢင်ႈပႆတၢင်းသေဢမ်ႇၵႃး ၼမ်ႉထူမ်ႈပွတ်ႇမၼ်းၼၢင်းလႄႈ လႆႈလုတ်ႇဢဝ်ထူင်ၼမ်ႉၼႂ်းမၼ်းဢွၵ်ႇ ဝႃႈၼႆ။

ၸၢႆးတႆးထိူၼ်ႇ သိုပ်ႇလၢတ်ႈဝႃႈ “ တေႃႈလဵဝ်ၼႆႉ တေလႆႈဝႃႈ ပဵၼ်ၵူၼ်းတုၵ်ႉၶိတၵႂႃႇယဝ်ႉ။ ၵဵဝ်ႇၵပ်းလွင်ႈၼႆႉ ၶႃႈႁဝ်းတင်း ၸၢႆးပိူင်း HRDF ၵေႃႈ ၼင်ႇႁိုဝ် ၼွင်ႉၶဝ်ပေႃးတေလႆႈၵႃႈသၢႆႈတႅၼ်းၵုမ်ႇထူၼ်ႈၼၼ်ႉ တေၶတ်းၸႂ်ႁဵတ်းၵႂႃႇ ႁႂ်ႈမီးလွင်ႈ ၽဵင်ႇပဵင်းပဵၼ်ထမ်း” ဝႃႈၼႆ။

ၼၢင်းသီၼူၼ်းၼႆႉ ပဵၼ်ၵူၼ်းၸႃတိ ဝၢၼ်ႈပၢင်ႇ ဢိူင်ႇမိူင်းၶုၼ် ၸႄႈဝဵင်းမိူင်းၵိုင်။ မီးလုၵ်ႈဝႆႉ 1 ၵေႃႉ ဢႃယု 13 ပီ။ ၶဝ်ႈ ႁဵတ်းၵၢၼ် တၢင်းမိူင်းထႆး မီးၶၢဝ်းတၢင်း 10 ပီပၢႆ ႁဵတ်းၵၢၼ်ၵေႃႇသၢင်ႈ။ ပဵၼ်လုၵ်ႈယိင်းလုင်းမေႇထႃႇ ပႃးၼၢင်းၸၢမ်ႇ မၢတ်ႈ။ တေႃႈလဵဝ် ယူႇဝႆႉတီႈဝၢၼ်ႈထီႉ ၸႄႈဝဵင်းလမ်းပုၼ်း ၸိုင်ႈထႆး။