တႄႇဢဝ်ဝၼ်းတီႈ 15 လိူၼ်မၢတ်ႊၶျ်ၼႆႉမႃး သိုၵ်းမၢၼ်ႈ ယိုတ်းမိူင်း မႃးပၵ်းပၢင်သဝ်း ၼႂ်းၸၼ်ႉၸွမ် ၶွမ်ႊပိဝ်ႊတိူဝ်ႊ ဝဵင်းမၢၼ်ႈမေႃႇ ၸႄႈမိူင်းၶၢင်လႄႈ ႁဵတ်းႁႂ်ႈလုၵ်ႈႁဵၼ်းၸၼ်ႉၸွမ်ဢိၵ်ႇ မေႃသွၼ် ၸိူဝ်းလိုဝ်ႈတီႈၸၼ်ႉၸွမ်ၼၼ်ႉ လႆႈၶၢႆႉပၢႆႈ ၵႂႃႇယူႇတၢင်ႇတီႈ ဝႃႈၼႆ။

ၵွၼ်ႈၼႃႈၼႆႉ သိုၵ်းမၢၼ်ႈၵႆႉမႃးလိုဝ်ႈတီႈၸၼ်ႉၸွမ် ၶၢဝ်းၵၢင်ၶမ်ႈၵၢင်ၶိုၼ်း ႁိုင်ႁိုင်ၼိုင်ႈပွၵ်ႈၵူၺ်းသေတႃႉ။ ဝၢႆးလင် သိုၵ်းၶၢင်လႄႈ PDF ယိုတ်းလႆႈတပ်ႉပၢင်သဝ်းၶဝ် တီႈမိူင်းမွၵ်ႇယဝ်ႉ သိုၵ်းမၢၼ်ႈမႃးပၵ်းပၢင် သဝ်းယူႇဝႆႉ တင်းပိုၵ်း – လုၵ်ႈႁဵၼ်းၸၼ်ႉၸွမ် လၢတ်ႈဝႆႉတီႈၶၢဝ်ႇ DVB ၼင်ႇၼႆ။

ယၢမ်းလဵဝ် တီႈၸၼ်ႉၸွမ်မၢၼ်ႈမေႃႇၼႆႉ တေမီးပၢင်တွပ်ႇလိၵ်ႈယဝ်ႉလႄႈ လုၵ်ႈႁဵၼ်းတႄႉ ဢမ်ႇမႃး ႁဵၼ်းလိၵ်ႈ။ ယူႇႁိူၼ်းသေ ဢၢၼ်ႇလိၵ်ႈဝႆႉႁင်းၽႂ်မၼ်း။ လုၵ်ႈႁဵၼ်း ၸိူဝ်းယူႇဝႆႉတီႈႁူင်းသဝ်း ဢၼ်မီး ၼႂ်းဝၢင်းၸၼ်ႉၸွမ်ၼၼ်ႉၵေႃႈ ၵႃႈလႆႈၶၢႆႉၵႂႃႇယူႇဝႆႉတၢင်ႇတီႈ ပၢင်တွပ်ႇလိၵ်ႈၸၼ်ႉၸွမ်တႄႉ တေပဵၼ် ၼႂ်းဝၼ်းတီႈ 21 လိူၼ်မၢတ်ႊၶျ်ၼႆႉ – ဝႃႈၼႆ။  

မိူဝ်ႈဝၼ်းတီႈ 15 လိူၼ်မၢတ်ႊၶျ် ယၢမ်းၵၢင်ၶမ်ႈ သိုၵ်းၶလယ 437 ပိုတ်းယိုဝ်းၵွင်ႈလူင် တီႈမိူင်းမွၵ်ႇ မၢၵ်ႇၵွင်ႈလူင် တူၵ်းသႂ်ႇၼႂ်းဝၢၼ်ႈလႄႈ ၼႂ်းဝၢင်းၵျွင်းၽြႃးၶရိတ်ႉယၼ်ႇ တိူဝ်ႉၵူၼ်းမိူင်းမၢတ်ႇၸဵပ်း။