Wednesday, April 24, 2024

ၾႆးမႆႈဝတ်ႉၸလၢႆးၶုမ်ႇ ဝဵင်းလၢႆးၶႃႈ

Must read

မိူဝ်ႈၼႆႉ ဝၼ်းတီႈ 13/3/2024 ယၢမ်းဝၢႆးဝၼ်း 3 မူင်းပၢႆ ၾႆးမႆႈဝတ်ႉၸလၢႆးၶုမ်ႇ ဢိူင်ႇဝၢၼ်ႈထီႇ ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ယွၼ်ႉၾႆးသႅင်လႅတ်ႇ (သူဝ်ႊလႃႊပျႃႊ) သျွတ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ ၾႆးမႆႈဝတ်ႉၸလၢႆးၶုမ်ႇ ယွၼ်ႉၾႆးသႅင်လႅတ်ႇသျွတ်ႉသေ မေႃႈပီႇထီႇ တႅၵ်ႇၼႆၶႃႈဝႃႇ။ တႄႇမႆႈဝၢႆးဝၼ်း 3 မူင်းပၢႆၼႆႉ ထိုင်ယၢမ်းႁူဝ်ၶမ်ႈမွၵ်ႈ 5 မူင်း ၾႆးၸင်ႇတေမွတ်ႇ။ ဢၼ်မႆႈၵႂႃႇၼႆႉ ပဵၼ်ဝိႁၢရ်လူင်ၵမ်းလဵဝ်ၶႃႈယဝ်ႉ။ လွင်ႈၵူၼ်းလူႉတၢႆမၢတ်ႇၸဵပ်းတႄႉ ဢမ်ႇမီး။ ၵူၺ်းၵႃႈ ၶူဝ်းၶွင်ၼႂ်းဝတ်ႉတႄႉ လႅပ်ႈတေဢမ်ႇတၼ်းလႆႈသင်ၶႃႈ”- ဝႃႈၼႆ။

- Subscription -

ဢိင်ၼိူဝ် လွင်ႈၾႆးမႆႈၼႆႉသေ လႆႈလူႉသုမ်းၼႂ်းၾႆးၼၼ်ႉသမ်ႉ မိူၼ်ၼင်ႇ – ရူတ်ႉၶိူင်ႈ 3 လမ်း၊ ၶဝ်ႈပိူၵ်ႇ 120 ထူင်၊ ၶဝ်ႈသၢၼ် 2 ၸေႃး ၊ ၶမ်း 1 ၵျၢပ်ႈလႄႈ ၶူဝ်းၵၢၼ်ႇၶူဝ်းၵျွင်းၽၼ်ႇတႃႇ ပရိၽေႃးၵ ၶိူင်ႈၸႂ်ႉတိုဝ်းတင်းၼမ်။

ဝတ်ႉၸလၢႆးၶုမ်ႇၼႆႉ ယူႇၼႂ်းဢိူင်ႇဝၢၼ်ႈထီႇ ယၢၼ်ဝဵင်း 10 လၵ်း မီးၾၢႆႇႁွင်ႇဝဵင်းလၢႆးၶႃႈ။ ယဝ်ႉၵေႃႈ ပဵၼ်တိူၵ်ႈသွၼ်လိၵ်ႈ သင်ၶၸဝ်ႈၵေႃႈၸႂ်ႈ။ ဝတ်ႉၼႆႉ ပူၵ်းတင်ႈမႃး မိူဝ်ႈပီ 2003 ။ ယၢမ်းလဵဝ် သင်ၶၸဝ်ႈ ဢၼ်ယူႇဝႆႉတီႈဝတ်ႉၼႆႉ မီး 15 တူၼ် ၽူႈၵွၼ်းဝတ်ႉပဵၼ် ၸဝ်ႈသြႃႇ သုၽေႃးထ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း