သိုၵ်းမၢၼ်ႈ တင်ႈၸႂ်ယိုဝ်းၵွင်ႈလူင် သႂ်ႇၼႂ်းမူႇဝၢၼ်ႈ တီႈဝဵင်းမိူင်းမွၵ်ႇ တႅၵ်ႇတိူဝ်ႉသႂ်ႇ ဢွၼ်ႇယိင်းတႆး လူႉတၢႆထင်တီႈ 3 ၵေႃႉ မၢတ်ႇ 2 ၵေႃႉ ယွၼ်ႉသိုၵ်း KIA တင်း PDF ယူႇၼႂ်းဝၢၼ်ႈ။
ဝၼ်းတီႈ 11/3/2024 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်း ယိုဝ်းၵွင်ႈလူင် ၶဝ်ႈၼႂ်းဝၢၼ်ႈၼၢင်းဢီႇ ဢိူင်ႇ ၵုင်းလေႃး ၸႄႈဝဵင်းမိူင်းမွၵ်ႇ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင် တူၵ်းသႂ်ႇႁိူၼ်းယေးၵူၼ်းဝၢၼ်ႈ လူႉၵွႆ 3 လင် ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ဢွၼ်ႇယိင်းတႆး ဢၼ်ပၢႆႈၽေးသိုၵ်းမႃးသွၼ်ႈဝႆႉၼၼ်ႉ လူႉတၢႆ ဝႃႈၼႆ။
ၵူၼ်းပိုၼ်ႉတီႈ ဝဵင်းမိူင်းမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈသမ်ႉ ယူႇၼွၵ်ႈဝၢၼ်ႈသေ ယိုဝ်းမႃး ယွၼ်ႉသိုၵ်းၶၢင်တင်း PDF ယူႇဝႆႉၼႂ်းဝၢၼ်ႈလႄႈ မၢၵ်ႇလူင်ၶဝ်ၼၼ်ႉ မႃးတူၵ်းသႂ်ႇႁိူၼ်းၵူၼ်းဝၢၼ်ႈ လူႉၵွႆ 3 လင် ၵူၺ်းဢမ်ႇၵႃး ၸၢၵ်ႇမၢၵ်ႇတိူဝ်ႉသႂ်ႇ ဢွၼ်ႇယိင်း ၵူၼ်းဝၢၼ်ႈတႃႈလီ ဢၼ်ပၢႆႈမႃးသွၼ်ႈဝႆႉ တီႈဝၢၼ်ႈၼၢင်းဢီႇၼႆႉ လူႉတၢႆၸွမ်းထႅင်ႈ 3 ၵေႃႉ မၢတ်ႇ 2 ၵေႃႉ။ ဢၼ်လူႉတၢႆ 3 ၵေႃႉၼၼ်ႉ တေမီးဢႃယု 16 ပီ ၊ 18 ပီ လႄႈ 20 ပီ”- ဝႃႈၼႆ။
တႄႇဢဝ် ဝၼ်းတီႈ 7 ၼႆႉမႃး သိုၵ်းၶၢင် KIA လေႃႇတိုၵ်း တပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်းၸႄႈဝဵင်းမိူင်း မွၵ်ႇ ၸႄႈမိူင်းၶၢင်သေ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇလူင်ၸွႆႈထႅင်ႈ တင်းၼမ်လႄႈ မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈၸေႈႁၵ်ႉ ထုၵ်ႇၾႆးမႆႈယွၵ်းယွႆ 3 လင် ဝႃႈၼႆ။
ၵူၼ်းပၢႆႈၽေးသိုၵ်း မိူင်းမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ဢလူဝ်ႉ – တုၵ်ႉၶတႄႉ တုၵ်ႉၶဝႃႈၼၼ်ႉယဝ်ႉ ႁဝ်းၵူၼ်းပၢႆႈၽေးတႄႉ ပေႃးပၢႆႈၶဝ်ႈထိူၼ်ႈ ပေႃးတူမ်ႈႁုင်ၵႂၼ်းၾႆးဢွၵ်ႇတီႈလႂ်ၵေႃႈ သိုၵ်းမၢၼ်ႈသမ်ႉ ဢဝ် မၢၵ်ႇလူင်ယိုဝ်းသႂ်ႇ။ ပေႃးပၢႆႈၶဝ်ႈမႃး ၼႂ်းဝၢၼ်ႈၵေႃႈ ဢမ်ႇလွတ်ႈ ထုၵ်ႇမၢၵ်ႇလူင် ယိုဝ်းသႂ်ႇ။ ၵမ်ႉမႃးပၢႆႈၶဝ်ႈ ၼႂ်းထိူၼ်ႇ ၵမ်ႉမႃးပၢႆႈၶဝ်ႈဝၢၼ်ႈၶိုၼ်း ႁဵတ်းၸိူင်ႉၼႆယူႇတိၵ်းတိၵ်းၶႃႈဢေႃႈ”- ဝႃႈၼႆ။
ဢွင်ႈတီႈ ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမိူင်းမွၵ်ႇၼႆႉသမ်ႉ ၵမ်ႈၼမ် ပဵၼ်ဝၢၼ်ႈတႆး မိူၼ်ၼင်ႇ – တၢင်း ဝၢၼ်ႈၵုင်းလေႃး၊ ဝၢၼ်ႈၸေႈႁၵ်ႉ၊ ဝၢၼ်ႈၼွင်ၵွၼ်ႇ၊ ဝၢၼ်ႈတႃႈသၢႆး၊ ၼွင်မၢၼ်ႈ၊ လိုမ်ႈလၢင်း၊ ႁူဝ်သႅင်ႈ၊ လွႆၸႃႇ ၊ ဝၢၼ်ႈၸူင်ႊၽူင်းယၢင်၊ ဝၢၼ်ႈၼၢင်းဢီႇ၊ ဝၢၼ်ႈၼမ်ႉတိုင်း လႄႈ ဝၢၼ်ႈတႃႈလီ ၸိူဝ်းၼႆႉ။
