တပ်ႉၸုမ်းလွတ်ႈလႅဝ်းၵူၼ်းမိူင်းထၼူႉ (ဓနုပြည်သူ့လွတ်မြောက်ရေးတပ်ဦး(DPLA)) ဢွၵ်ႇလိၵ်ႈသၢၼ်ၶတ်း ဢၼ်သိုၵ်းမၢၼ်ႈဢွၼ်ၸတ်းဝၼ်းၸိူဝ်ႉၸၢတ်ႈ ၸၢဝ်းထၼူႉ ၼႂ်းၸိုင်ႈတႆးပွတ်းၸၢၼ်း။

ဝၼ်းတီႈ 20/12/2023 ၼႆႉ မႅၼ်ႈဝၼ်းၸိူဝ်ႉၸၢတ်ႈၸၢဝ်းထၼူႉ  ယူႇတီႈသိုၵ်းမၢၼ်ႈယိုတ်းမိူင်း ပၼ်ႁႅင်းဢီးႁႂ်ႈ ၸတ်းပၢင်ပွႆးၶိုၵ်ႉယႂ်ႇ လွင်ႈၼႆႉ တပ်ႉၸုမ်းလွတ်ႈလႅဝ်းၵူၼ်းမိူင်းထၼူႉ DPLA ဢွၵ်ႇလိၵ်ႈသၢၼ်ၶတ်း  မိူဝ်ႈဝၼ်းတီႈ 19/12/2023  ။

ၼႂ်းၼၼ်ႉပႃးဝႆႉဝႃႈ -“  ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၸမ် 3 ပီၼႆႉ ၵူၼ်းမိူင်းလၢႆတီႈလၢႆတၢင်း ဢိၵ်ႇပႃး ၸၢဝ်းထၼူႉ လႆႈလိူတ်ႇမႆႈယွၼ်ႉလၢႆလွင်ႈလၢႆဢၼ် ယွၼ်ႉၼၼ် ဢမ်ႇထုၵ်ႇလီၸတ်းဝၼ်းၸိူဝ်ႉၸၢတ်ႈ ႁႂ်ႈပေႃးၵိုၼ်းၶိုၵ်ႉ။ ဢမ်ႇထုၵ်ႇလီၵျေႃႇသိူဝ်းၸွမ်းသေၵႂႃႇၶဝ်ႈႁူမ်ႈ ဢၼ် သိုၵ်းမၢၼ်ႈယိုတ်းမိူင်းဢွၼ်ၸတ်း ” – ဝႃႈၼႆဝႆႉ။

ဢိင်ၼိူဝ်လွင်ႈၼႆႉ ၽူႈမီးပုၼ်ႈၽွၼ်းၼႂ်းတပ်ႉ DPLA လၢတ်ႈတီႈၽူႈတွႆႇႁွၵ်ႈဝႃႈ – “ ၵူႈတီႈၵူႈတၢင်း ပိူၼ်ႈဢွၼ်ၵၼ် ၶႂ်ႈၶတ်းၸႂ် ႁႂ်ႈပဵၼ်မိူင်းၾႅတ်ႊတရႄႊယူႇ ဢၼ်ၼႆႉ သိုၵ်းမၢၼ်ႈၶဝ်ဢမ်ႇၸွမ်းႁဵတ်းပၼ်သင်လီလီ။ ႁဝ်းသမ်ႉတေမႃး ၽွမ်ႉၸွမ်း ဢၼ်သိုၵ်းမၢၼ်ႈဢွၼ်ႁူဝ်ၸတ်းႁဵတ်းပွႆးဝၼ်းၸိူဝ်ႉၸၢတ်ႈပၼ်ၼႆႉ ဢမ်ႇၸႂ်ႈလွင်ႈမၼ်း ။ လႅပ်ႈဢမ်ႇႁၼ်ထိုင်ၵၢင်ၸႂ်ပိူၼ်ႈ ဢၼ်တုၵ်ႉယူႇၸိူဝ်းၼၼ်ႉ။  ” – ဝႃႈၼႆ။

ဝၼ်းၸိူဝ်ႉၸၢတ်ႈထၼူႉ ဢၼ်သိုၵ်းမၢၼ်ႈယိုတ်းမိူင်းဢွၼ်ၸတ်း ပီၼႆႉ ပဵၼ်ပွၵ်ႈၵမ်း 6 ၸတ်းတီႈ ၸႄႈဝဵင်း ပၢင်လႃႈ (ပင်းတရ) ၊ ပေႃးထိုင်မႃး ဝၼ်းယႂ်ႇဝၼ်းလူင်ၶွင်ၸၢဝ်းၶိူဝ်းဢၼ်လႂ်ၵေႃႈ သိုၵ်းမၢၼ်ႈၵႆႉပၼ်ႁႅင်းဢီးႁႂ်ႈၸတ်းႁဵတ်း ပွႆးၵိုၼ်း တႃႇၶဝ်တေလႆႈၼမ်ႉမျၢတ်ႈၼမ်ႉတွၼ်း ။

ၼၢင်းယိင်းၸၢဝ်းထၼူႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸၢဝ်းထၼူႉႁဝ်းၼႆႉ ပိူၼ်ႈၵႆႉဝႃႈ ပဵၼ်ၵူၼ်းသိုဝ်ႈယူဝ်းၼႆသေ ၸူမ်းသိူဝ်းၸွမ်းၵႂၢမ်းယွင်ႈပိူၼ်ႈၵူၺ်း ။ တေဝႃႈၸုမ်းၵေႃႈလိၵ်ႈလၢႆးလႄႈၾိင်ႈငႄႈႁဝ်းၵေႃႈ တႅၵ်ႇပဵၼ်လၢႆမူႇလၢႆၸုမ်း။ ၼႆႉၵေႃႈ သိုၵ်းမၢၼ်ႈၶဝ် ဢဝ်တိုဝ်ႉတၢင်းလီသေ ၸႂ်ႉႁဵတ်းၸွမ်းၼင်ႇၶဝ်ၶႂ်ႈပဵၼ်။ ႁဵတ်းႁႂ်ႈႁဝ်း ဢမ်ႇၽွမ်ႉၵၼ် ” – ဝႃႈၼႆ။

ဝၼ်းတီႈ 13/11/2023 ပူၼ်ႉမႃးၼႆႉၵေႃႈ မႅၼ်ႈဝၼ်းၸိူဝ်ႉၸၢတ်ႈၸၢဝ်းၼွင် (ဢင်းသႃး) လႄႈ ယူႇတီႈသိုၵ်းမၢၼ်ႈယိုတ်းမိူင်း တဵၵ်းၸႂ်ႉႁႂ်ႈၵူၼ်းမိူင်းၸတ်းပၢင်ပွႆးၶိုၵ်ႉယႂ်ႇ ။ သိုၵ်းမၢၼ်ႈၼႆႉ လိူဝ်သေၸႂ်ႉၽူႈမီးပုၼ်ႈၽွၼ်းၶဝ် ၸတ်းႁဵတ်းပွႆးယဝ်ႉၼၼ်ႉ မိူၼ်ၼင်ႇ လုၵ်ႈႁဵၼ်းၸၼ်ႉဢွၼ်ၸိူဝ်းၼႆႉၵေႃႈ ၺႃးသင်ႇလၢတ်ႈ ဢမ်ႇၵႂႃႇၶဝ်ႈႁူမ်ႈဢမ်ႇလႆႈ ။ လွင်ႈၼႆႉၵေႃႈ ၸုမ်းလုၵ်ႉၽိုၼ်ႉလႄႈ ၸၢဝ်းၼွင်ၶဝ်  ဢမ်ႇႁၼ်လီၸွမ်း ။