ၸိုင်ႈတႆး ပွတ်းႁွင်ႇ ၼႂ်းၸႄႈဝဵင်းၼမ်ႉတူႈ တၢင်းဢိူင်ႇမိူင်းယဵၼ်ၼၼ်ႉ ဝၢႆးသိုၵ်း TNLA ႁႅၼ်း သိုၵ်းၶိုၼ်ႈတိုၵ်း တပ်ႉၸူဝ်ႈၶၢဝ်းၶွင် SSPP ယဝ်ႉ ၶၢဝ်းတၢင်း 3-4 ဝၼ်းၼႆႉ သွင်ၾၢႆႇပဵၼ် ပၢင်တိုၵ်းၵၼ်လၢႆၵမ်း – ၵူၼ်းမိူင်း 500 ပၢႆ လႆႈပၢႆႈယၢၼ်ႁိူၼ်းယေးတီႈယူႇ။

ယၢမ်းလဵဝ် ၵူၼ်းဝၢၼ်ႈသႃႇဢွၼ်ႇ၊ ဝၢၼ်ႈသႃႇလူင်၊ ဝၢၼ်ႈၵုင်းမူင်ႈ၊ ဝၢၼ်ႈဢၢႆႇ ၸႄႈဝဵင်းၼမ်ႉတူႈ ႁူဝ်ၵူၼ်း 300 ပၢႆ  ပၢႆႈၽေးသိုၵ်းႁွတ်ႈမိူင်းယဵၼ်၊ တႃႇ 200 ပၢႆမီးဝႆႉယူႇတီႈၵျွင်းမိူင်းယဵၼ်၊ 100 သမ်ႉ ယွၼ်းပိုင်ႈႁူမ်ႈပိုင်ႈၽူၺ်း ယူႇၸွမ်းပီႈၼွင်ႉ ၼႂ်းဝၢၼ်ႈမိူင်းယဵၼ်။

ၵူၼ်းဝၢၼ်ႈ ၼႃးသၢင်း လင်ႁိူၼ်း 80 ပၢႆ ၊ ႁူဝ်ၵူၼ်း 184 ပၢႆ၊ ၵူၼ်းဝၢၼ်ႈလွၵ်းလူင် 15 လင်ႁိူၼ်း ႁူဝ်ၵူၼ်း 71 ၵေႃႉ ဢွၼ်ၵၼ်ပၢႆႈမႃးယူႇတီႈ ၵျွင်းပၢင်ႇၶမ်း ၾၢႆႇဢွၵ်ႇမိူင်းယဵၼ် မွၵ်ႈ 2 လၵ်း၊ ၵူၼ်းဝၢၼ်ႈၼႃးပႅင်း 17 လင်ႁိူၼ်း ႁူဝ်ၵူၼ်း 60 ၵေႃႉသမ်ႉပၢႆႈမႃးယူႇတီႈ ၵျွင်းဝဵင်းၼၼ်ႈ – ဝႃႈၼႆ။

တင်ႈတႄႇဝၼ်းတီႈ 4/5/2018 TNLA ႁႅၼ်းသိုၵ်း ၶိုၼ်ႈလေႃႇတပ်ႉ SSPP ၼႂ်းထုင်ႉမိူင်းယဵၼ်ယဝ်ႉ၊ သွင်ၾၢႆႇ သိုပ်ႇပဵၼ်ပၢင်တိုၵ်းၵၼ်လၢႆၵမ်း။ သိုၵ်း TNLA သိုပ်ႇထႅမ်ႁႅင်းသိုၵ်းသၢမ်ငႃး – မၢႆးသႅင်ငိုၼ်း ၼမ်းငႃးသိုၵ်း ထႅမ်တၢင်းၼႃးလိၼ်း၊ မၢႆးပူဝ်ႇပေႉ ထႅမ်တၢင်းဝၢၼ်ႈဢၢႆႇ၊ မၢႆးၼမ်ႉၶၢႆ ထႅမ်တၢင်းဝၢၼ်ႈသႃႇလူင် – တင်းမူတ်း ႁႅင်းသိုၵ်း 500 ပၢႆ ။

မိူဝ်ႈဝၼ်းတီႈ 4/5/2018 ၽွင်း TNLA ၶိုၼ်ႈယိုဝ်း SSPP တီႈဝၢၼ်ႈသႃႇဢွၼ်ႇၼၼ်ႉ မီးႁႅင်းသိုၵ်း 100 ပၢႆ ၵူၺ်းသေ တႃႉ ယၢမ်းလဵဝ် သိုပ်ႇထႅမ်ႁႅင်းသိုၵ်းထုင်ႉၼၼ်ႉ ထႅင်ႈ 500 ပၢႆ ။

မိူဝ်ႈပၢင်တိုၵ်း ဝၼ်းတီႈ 4-5/5/208 ၼၼ်ႉ သိုၵ်းၾၢႆႇ SSPP တိူဝ်ႉမၢတ်ႇ တူၵ်းသုမ်းၼႂ်းပၢင်တိုၵ်း ၵေႃႉၼိုင်ႈ၊ မၢတ်ႇၸဵပ်း 2 ၵေႃႉ၊ ၾၢႆႇသိုၵ်း TNLA တၢႆ 6 ၵေႃႉမၢတ်ႇ 4 ၵေႃႉ ။ လႆႈႁူႉၶၢဝ်ႇၼင်ႇၼႆသေတႃႉ ဢၼ်ပိုတ်ႇလၢတ်ႈ ပဵၼ်တၢင်းၵၢၼ် တႄႉဢမ်ႇမီး။

ယွၼ်ႉပၢင်တိုၵ်းသေ မၢၵ်ႇလူင်တူၵ်းသႂ်ႇႁိူၼ်းၵူၼ်းဝၢၼ်ႈသႃႇဢွၼ်ႇ ႁိူၼ်းလုင်းၸၢႆးလုၵွႆၼမ်၊ တူဝ်လုင်းၸၢႆးၵေႃႈတိူဝ်ႉၸၢၵ်ႇမၢၵ်ႇ လႆႈသူင်ႇယႃတူဝ် ဝဵင်းလႃႈသဵဝ်ႈ။ လိူဝ်ၼၼ်ႉ ၵူၼ်းဝၢၼ်ႈ ၽူႈယိင်းၵေႃႉၼိုင်ႈၵေႃႈ တိူဝ်ႉမၢတ်ႇလႄႈလႆႈသူင်ႇယူတ်းယႃတီႈ ႁူင်းယႃၼမ်ႉတူႈဝႆႉ ဝႃႈၼႆ။ သိုၵ်း TNLA တင်း SSPP ၼႆႉပဵၼ်ဢူၺ်းလီၵၼ်မႃးၸဵမ်လ်ႂသေဢမ်ႇၵႃး ၶဝ်ႈပႃးပဵၼ်လုၵ်ႈၸုမ်း FPNCC ဢၼ် UWSA ဢွၼ်ႁူဝ်ဝႆႉၼၼ်ႉ တင်းသွင်ၸုမ်း။