လုၵ်ႈႁဵၼ်းတႆး ႁွတ်ႈမိူင်းထႆး ႁူမ်ႈၵၼ် လူင်းပိုၼ်ႉတီႈ ႁႃငိုၼ်းၵွင်ၵၢင် တႃႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆး ပွတ်းႁွင်ႇ။

မိူဝ်ႈဝႃး ဝၼ်းတီႈ 5/11/2023 ယၢမ်းၵၢင်ၶမ်ႈ 8 မူင်း ထိုင် 10 မူင်း ၵၢင်ၶိုၼ်း ယူႇတီႈ ၸုမ်းလုၵ်ႈႁဵၼ်းၸၼ်ႉၸွမ် ၵဵင်းမႂ်ႇ ႁူမ်ႈၵၼ် လူင်းပိုၼ်ႉတီႈ ႁႃငိုၼ်းၵွင်ၵၢင် တီႈၼႃႈၸၼ်ႉၸွမ်ၵဵင်းမႂ်ႇ (CMU) ၸိုင်ႈထႆး တင်းမူတ်း လႆႈငိုၼ်းလူႇၶၢမ်ႇ 7,903 ဝၢတ်ႇ ၼႆယဝ်ႉ။

လုၵ်ႈႁဵၼ်းတႆး တီႈၸၼ်ႉၸွမ်ၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ လုၵ်ႈႁဵၼ်းတႆး၊ ၶၢင်လႄႈ ထႆး ၸိူဝ်းၼႆႉ ႁူမ်ႈၵၼ် လူင်းပိုၼ်ႉတီႈ ႁွင်ႉၽဵင်းၵႂၢမ်းသေ လူႇၶၢမ်ႇငိုၼ်းၵွင်ၵၢင် တီႈၼႃႈၸၼ်ႉၸွမ်ၵဵင်းမႂ်ႇၼႆႉ မီးပီႈၼွင်ႉၶႄႇ၊ ထႆးလႄႈ ၾရင်ႇ ၸိူဝ်း ၼႆႉ ႁူမ်ႈၸွႆႈ လႆႈငိုၼ်း 7,903 ဝၢတ်ႇၶႃႈဢေႃႈ။ ငိုၼ်းၸိူဝ်းၼႆႉ ႁဝ်းၶႃႈ တေဢဝ်မိူဝ်းၸွႆႈထႅမ်ပၼ် ၵူၼ်းပၢႆႈၽေးသိုၵ်း ႁဝ်းၶႃႈ ၼႂ်းမိူင်းတႆးပွတ်းႁွင်ႇ”- ဝႃႈၼႆ။

ဢိင်ၼိူဝ် လွင်ႈလုၵ်ႈႁဵၼ်းၸၼ်ႉၸွမ် ၵဵင်းမႂ်ႇ လူင်းပိုၼ်ႉတီႈ ႁႃငိုၼ်းၵွင်ၵၢင် တႃႇၸွႆႈထႅမ်ၵူၼ်းပၢႆႈၽေးသိုၵ်းၼႆႉသေ ပူၼ်ႉမႃး မိူဝ်ႈဝၼ်းတီႈ 29/10/2023 ၼၼ်ႉ လူင်းပိုၼ်ႉတီႈ ႁႃငိုၼ်းၵွင်ၵၢင် တီႈဝတ်ႉပႃႇပဝ်ႈလႄႈ ဝတ်ႉၵူႇတဝ်ႈ တင်းမူတ်း လႆႈငိုၼ်း ၵမ်ႉၸွႆႈ ငိုၼ်းထႆး 61,505 ဝၢတ်ႇလႄႈ ငိုၼ်းမၢၼ်ႈ 180,000 ပျႃး ၼႆယဝ်ႉ။

ငိုၼ်းၵွင်ၵၢင် တီႈလႆႈမႃး ၸိူဝ်းၼၼ်ႉ ယူႇတီႈ လုၵ်ႈႁဵၼ်းၸၼ်ႉၸွမ်ၵဵင်းမႂ်ႇၶဝ် လႆႈသူင်ႇမိူဝ်းၸွႆႈထႅမ် ၵူၼ်းပၢႆႈၽေးသိုၵ်း မိူၼ် ၼင်ႇ – ၸႄႈဝဵင်းလႃႈသဵဝ်ႈ၊ သႅၼ်ဝီလႄႈ သီႇပေႃႉ ၸိူဝ်းၼႆႉ။

ဝၼ်းတီႈ 6/11/2023 ယၢမ်းႁူဝ်ၶမ်ႈ ယူႇတီႈ လုၵ်ႈႁဵၼ်းၸၼ်ႉၸွမ် ၵဵင်းမႂ်ႇၼႆႉ တေလူင်းပိုၼ်ႉတီႈ ႁႃငိုၼ်းၵွင်ၵၢင် တႃႇၸွႆႈ ထႅမ် ၵူၼ်းပၢႆႈၽေးသိုၵ်းထႅင်ႈ တီႈဝဵင်းလၢမ်းပုၼ်း ၸိုင်ႈထႆး ၼႆယဝ်ႉ။