မိူဝ်ႈဝႃး ဝၼ်းတီႈ 24/10/2024 ပဵၼ်ဝၼ်း International day of climate Action ဝၼ်းတူင်ႉၼိုင်တွၼ်ႈ တႃႇၾိင်ႈ ၾႃႉရႃႇသီႇၼႆလႄႈ ၸုမ်းႁၵ်ႉသႃ သိင်ႇဝႅတ်ႉလွမ်ႉ EDT (Environmental Defense Team) မွၵ်ႇထိုင်ၵူၼ်းၼုမ်ႇ ဢၼ်မီးၼႂ်းဝဵင်းၵဵင်းမႂ်ႇ ၸိုင်ႈထႆးသေ ၸတ်းႁဵတ်းပၢင်ဢုပ်ႇဢူဝ်း ပၼ်တင်းႁူႉ လွင်ႈႁၵ်ႉသႃ ထိင်းသိမ်းသၽႃႇဝ သိင်ႇဝႅတ်ႉလွမ်ႉ။
မီးၵူၼ်းၼုမ်ႇ မိူင်းႁူမ်ႈတုမ် ၸိူဝ်းႁဵၼ်းလိၵ်ႈလၢႆးလႄႈ ႁဵတ်းၵၢၼ်တူင်ႇဝူင်းၵူၼ်း တီႈဝဵင်းၵဵင်းမႂ်ႇ ၶဝ်ႈႁူမ်ႈ ငိၼ်းထွမ်ႇ ဢုပ်ႇဢူဝ်း မွၵ်ႈ 20 ၵေႃႉ။
ပေႃးဝၼ်း International day of climate Action ၼႆႉ ၵႆႉဢွၼ်ၵၼ်ၸတ်းႁဵတ်း campaign ၵၢၼ်တူင်ႉၼိုင် ပၼ်တင်းႁူႉ ၵဵဝ်ႇၵပ်းၵၢၼ်ႁၵ်ႉသႃသိင်ႇဝႅတ်ႉလွမ်ႉ၊ ၸတ်းႁဵတ်း event ပၢင်ၵႅဝ်ႈမၢႆတွင်း ဢမ်ႇၼၼ် ၽုၵ်ႇသွမ်ႈတူၼ်ႈမႆႉ ၸိူဝ်းၼႆႉ။
တီႈပၢင်ဢုပ်ႇဢူဝ်းၼႆႉ ပိူင်လူင် မီးၽူႈဢွၼ်ႁူဝ် ၸုမ်း EDT ၽူႈလူင်ႉလႅၼ်ႇၾၢႆႇႁၵ်ႉသႃသိင်ႇဝႅတ်ႉလွမ်ႉ မႃးဢုပ်ႇလၢတ်ႈၼႄလွင်ႈ ၾိင်ႈၾႃႉလႅၵ်ႈလၢႆႈ၊ လွင်ႈသိင်ႇဝႅတ်ႉလွမ်ႉလူႉ၊ လွင်ႈဢၼ် ၵူၼ်းမိူင်းမၢၼ်ႈ မိူင်းတႆး ထူပ်းၽေးသၽႃႇဝ ၾူၼ်တူၵ်းႁႅင်းၼမ်ႉထူမ်ႈ မိူၼ်ၼင်ႇ လိူၼ်သႅပ်ႊထႅမ်ႊပိူဝ်ႊ – ဢွၵ်ႊထူဝ်ႊပိူဝ်ႊၼႆႉ။
ဢၼ်ထူပ်းၽေးသၽႃႇဝႁၢႆႉႁႅင်း ပီၼႆႉ ပဵၼ်ယွၼ်ႉ တႄႇတီႈၵူၼ်းမိူင်းၵေႃႉတေႃႇၵေႃႉ ပႅတ်ႈယုၵ်းယၢၵ်း ဢမ်ႇပဵၼ်တီႈပဵၼ်တၢင်း၊ ၸႂ်ႉၶိူင်ႈပလၢတ်ႉသတိၵ်ႉၼမ်၊ တေႃႇထိုင် ၶွမ်ႊပၼီႊယႂ်ႇ ၸဝ်ႈငိုၼ်းသႃး ၸိူဝ်းႁဵတ်းၵၢၼ်ၶုတ်းႁႄႈၶုတ်းၶမ်း တႅပ်းတူၼ်ႈမႆႉယႂ်ႇလူင် ယႃႉၼမ်ႉလိၼ်ႁိၼ်ၽႃ ၸိူဝ်းၼႆႉ ၼမ်မႃးၵူႈမိုဝ်ႉၵူႈဝၼ်း။
ၵွပ်ႈၼႆ ၼင်ႇႁိုဝ် သိင်ႇဝႅတ်ႉလွမ်ႉ တေလီ၊ ၾိင်ႈၾႃႉ တေမၢၼ်ႇ ၵူၼ်းမိူင်း တေယူႇသႃႇလွတ်ႈၽေးၼၼ်ႉ ၵူၼ်းၵူႈ ၵေႃႉ မီးပုၼ်ႈၽွၼ်း တႃႇႁၵ်ႉသႃသိင်ႇဝႅတ်ႉလွမ်ႉၼႆသေ ၸုမ်း EDT ဢုပ်ႇလၢတ်ႈၼႄၵႂႃႇ သေ ဢမ်ႇၵႃး ယင်းပိုတ်ႇ ၼႄပႃး ပွင်ႈၵႂၢမ်းပၼ်တၢင်းႁူႉ Podcast ဢၼ်လုၵ်ႈႁဵၼ်း ၸၼ်ႉၸွမ်ႁဵတ်းဢွၵ်ႇဝႆႉၼၼ်ႉ – လႆႈႁူႉၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ