သိုၵ်းမၢၼ်ႈ ယိုတ်းမိူင်း တီႈၼမ်ႉၽၵ်းၵႃ ယိုဝ်းၵွင်ႈလူင်ၵႂႃႇတၢင်းဝဵင်းမူႇၸေႊ ဢမ်ႇထၢတ်ႇ ႁဵတ်းႁႂ်ႈၵူၼ်းပိုၼ်ႉတီႈ တူၵ်းၸႂ် တိုၼ်ႇသၢၼ်ၵူဝ်ႁႄ မၢင်ၸိူဝ်း ဢွၼ်ၵၼ် ပၢႆႈမူၵ်းၼႂ်းလုၵ်းထႅင်ႉ/ လုၵ်းပႅမ်ႇ (လုၵ်းလိၼ်) ၸိူဝ်းၼႆႉ။
ဝၼ်းတီႈ 21/9/2023 ယၢမ်းၵၢင်ဝၼ်း 11 မူင်းပၢႆ တေႃႇထိုင် 5 မူင်းႁူဝ်ၶမ်ႈ သိုၵ်းမၢၼ်ႈ ယိုတ်းမိူင်း တပ်ႉၶလယ 123 တီႈ ဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ယိုဝ်းၵွင်ၵႂႃႇတၢင်း ဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ယိုဝ်းၵႂႃႇ မၢၵ်ႇလူင် ဢမ်ႇယွမ်း 10 လုၵ်ႈ။
ၵူၼ်းပိုၼ်ႉတီႈ ဢိူင်ႇၼမ်ႉၽၵ်းၵႃ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၼမ်ႉၽၵ်းၵႃၼႆႉ ယိုဝ်းၵွင်ႈလူင်ၸူးတၢင်းၸေႊလၢၼ်ႉ ဢမ်ႇယွမ်း 10 လုၵ်ႈ။ ၵူၼ်းမိူင်းၸိူဝ်းယူႇႁိမ်းႁွမ်းၼႆႉ ဢွၼ်ၵၼ်ၵူဝ်သေ ၶုတ်းလုၵ်းပဵမ်ႇဝႆႉၵူႈႁိူၼ်း၊ ပေႃးယိၼ်းသဵင်ၵွင်ႈလူဝ်ႇဢွၼ်ၵၼ်လူင်းၼႂ်းလုၵ်းၵမ်းလဵဝ်။ ယၢမ်းလဵဝ်ၵေႃႈဢွၼ်ၵၼ်ၶဝ်ႈယူႇၼႂ်းလုၵ်းပဵမ်ႇၼၼ်ႉဝႆႉယူႇ ”- ဝႃႈၼႆ။
ၵမ်ႈၽွင်ႈ ၶုတ်းဝႆႉၸွမ်းၼႂ်းဝၢင်ႈႁိူၼ်း ယေး၊ မၢင်ၸိူဝ်း ၶုတ်းဝႆႉ ၼႂ်းသိုင်ႇၾႆးလႄႈ တႂ်ႈလင်ႈႁိူၼ်း ၸိူဝ်းၼႆႉ ။ ၵမ်ႈၽွင်ႈၵေႃႈတိုၵ်ႉၶုတ်းယူႇသေ ၵမ်ႈၽွင်ႈၵေႃႈၶုတ်းမႃးလႆႈၶၢဝ်းတၢင်းမွၵ်ႈ ၼိုင်ႈလိူၼ်ၼႆႉယဝ်ႉ ဝႃႈၼႆ။
“ ၵူၼ်းမိူင်းတႄႉ ဢမ်ႇလႆႈၼွၼ်းလပ်းလီ ၵၢင်ၶမ်ႈၵၢင်ၶိုၼ်းၵေႃႈ ၼွၼ်း ထွမ်ႇသဵင်ၵွင်ႈယူႇၵူႈၶိုၼ်း။ သင်ဝႃႈ ငဝ်းလၢႆးဢမ်ႇလီ သဵင်ၵွင်ႈတႅၵ်ႇ ပဵၼ်ပၢင်တိုၵ်းပဵၼ်ၵေႃႈ ဢွၼ်ၵၼ်လဵၼ်ႈၶဝ်ႈလုၵ်းလိၼ် ၵမ်းလဵဝ်။ မိူဝ်ႈဝၼ်းၵၢတ်ႇၼမ်ႉၽၵ်းၵႃ သွင်ဝၼ်းပူၼ်ႉမႃးၼႆႉ သိုၵ်းမၢၼ်ႈၼမ်ႉၽၵ်းၵႃ ယိုဝ်းၵွင်ႈလူင် ၵႂႃႇတၢင်း ဝၢၼ်ႈၶူဝ်မုင်း ။ ႁဵတ်းႁႂ်ႈၵူၼ်း သိုဝ်ႉၶၢႆၶူဝ်းၼႂ်းၵၢတ်ႇတိုၼ်ႇသၢၼ်ႈ ၽူင်ႈပၢႆႈ ၵၢတ်ႇပေႃးဝၢႆး ”- ၵူၼ်းဢိူင်ႇၼမ်ႉၽၵ်းၵႃ သိုပ်ႇလၢတ်ႈၼႄၼင်ႇၼႆ။
မိူဝ်ႈဝႃး ဝၼ်းတီႈ 20 ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် တီႈဝၢၼ်ႈၶူဝ်မုင်းထႅင်ႈ ႁၢဝ်ႈႁႅင်း။ ဝၢၼ်ႈၶူဝ်မုင်းၼႆႉ မီးဝႆႉၼႂ်းၵႄႈ ဢိူင်ႇၼမ်ႉၽၵ်းၵႃ – ဝဵင်းမူႇၸေႊ တေယၢၼ်ၵႆတၢင်းဢိူင်ႇၼမ်ႉၽၵ်းၵႃ မွၵ်ႈ 10 လၵ်း။
ပူၼ်ႉမႃး မိူဝ်ႈဝၼ်းတီႈ 1/9/2023 ၼၼ်ႉ သိုၵ်းမၢၼ်ႈ တပ်ႉၶလယ 123 တီႈဢိူင်ႇၼမ်ႉၽၵ်းၵႃၼႆႉ လၢမ်းလိမ်း ယိုဝ်းၵွင်ႈလူင် ၵႂႃႇၵူႈႁူးၵူႈတၢင်းလႄႈ ႁဵတ်းႁႂ်ႈမၢၵ်ႇလူင်တူၵ်းသႂ်ႇၵူၼ်းမိူင်း တီႈၼႂ်းဢိူင်ႇၼမ်ႉၽၵ်းၵႃ လူႉတၢႆ 1 ၵေႃႉ မၢတ်ႇၸဵပ်း 3 ၵေႃႉ ၼႆယဝ်ႉ။
