ၼႂ်းလိူၼ်ဢေႃႊၵတ်ႊသ်ၼႆႉ ၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်းၵႃ တိူဝ်ႉၺႃး ၸၢၵ်ႇမၢၵ်ႇသိုၵ်းမၢၼ်ႈ တူၵ်းသႂ်ႇ လူႉတၢႆထင်တီႈ 4 ၵေႃႉ မၢတ်ႇၸဵပ်း 3 ၵေႃႉ။
ဝၼ်းတီႈ 30/8/2023 ယၢမ်းၵၢင်ၼႂ် 10 မူင်းပၢႆ ၽူႈၸၢႆး ၸၢဝ်းၶႄႇ ၵူၼ်းဝၢၼ်ႈႁူဝ်ပုင်ႇ ၼႂ်းဢိူင်ႇၼမ်ႉၽၵ်းၵႃ ၸႄႈ ဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ တိူဝ်ႉၺႃးမၢၵ်ႇလူင် သိုၵ်းမၢၼ်ႈ တပ်ႉၶလယ 123 ၼမ်ႉၽၵ်းၵႃ သေ တၢႆထင်တီႈၼႂ်းသူၼ် ႁိမ်းႁိူၼ်းမၼ်းၸၢႆး။
ၵူၼ်းမိူင်းဢိူင်ႇၼမ်ႉၽၵ်းၵႃ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇလူင် သိုၵ်းမၢၼ်ႈ တပ်ႉ 123 တီႈၼမ်ႉၽၵ်း ၵႃၼႆႉ လၢမ်းလိမ်းယိုဝ်းၵႂႃႇၵူႈႁူးၵူႈတၢင်းသေ မၢၵ်ႇလူင်ၼၼ်ႉ တူၵ်းသႂ်ႇ ၽူႈၸၢႆးၸၢဝ်းၶႄႇ ၵူၼ်းဝၢၼ်ႈႁူဝ်ပုင်ႇ တၢႆထင်တီႈ ၼႂ်းသူၼ်မၼ်းၸၢႆး။ မႅၼ်ႈမိူဝ်ႈမၼ်းၸၢႆး တိုၵ်ႉႁဵတ်းၵၢၼ်သူၼ်ဝႆႉ ။ ၶၢပ်ႈတူဝ်တၢႆ မၼ်းၸၢႆးတႄႉ မိူဝ်ႈဝႃး ယူႇတီႈ ၸုမ်း ၸွႆႈထႅမ်ၶဝ် မႃးဢဝ်ၵႂႃႇ လုမ်းလႃးပၼ်ယဝ်ႉၶႃႈ”- ဝႃႈၼႆ။
လိူဝ်ၼၼ်ႉ မၢၵ်ႇလူင် သိုၵ်းမၢၼ်ႈၼႆႉ တူၵ်းသႂ်ႇထႅင်ႈ ၵူၼ်းၼမ်ႉၽၵ်းၵႃ လႆႈတိူဝ်ႉမၢတ်ႇၸဵပ်းၸွမ်းထႅင်ႈ 3 ၵေႃႉ ၼႂ်း ၼၼ်ႉ ၸၢႆး 2 ၵေႃႉ ယိင်း 1 ၵေႃႉ ယၢမ်းလဵဝ် ၵူၼ်းမၢတ်ႇၸဵပ်းၼႆႉ လႆႈသူင်ႇယူတ်းယႃဝႆႉတီႈ ႁူင်းယႃဝဵင်းၵူတ်ႉၶၢႆလႄႈ ဝဵင်းလိူဝ်ႇ ၼႆယဝ်ႉ။
ႁူဝ်လိူၼ်ဢေႃႊၵတ်ႊသ်ၼႆႉ သိုၵ်းမၢၼ်ႈ တပ်ႉၶလယ 123 ၼမ်ႉၽၵ်းၵႃ လၢမ်းလိမ်းယိုဝ်းၵွင်ႈလူင်ၵႂႃႇ ၵူႈႁူးၵူႈတၢင်းသေ မၢၵ်ႇလူင် တူၵ်းသႂ်ႇ ၵူၼ်းဝၢၼ်ႈၼမ်ႉၶုမ်လႄႈ ဝၢၼ်ႈႁူဝ်ၼမ်ႉ (ဝၢၼ်ႈယေးယၢင်/ ဝၢၼ်ႈၸၢဝ်းၶၢင်) ႁဵတ်းႁႂ်ႈ ၵူၼ်းဝၢၼ်ႈ တိူဝ်ႉၺႃးၸၢၵ်ႇမၢၵ်ႇလူႉတၢႆထင်တီႈ 3 ၵေႃႉ။
“ပူၼ်ႉမႃး မွၵ်ႈ 20 ဝၼ်းၼႆႉ သိုၵ်းမၢၼ်ႈ တပ်ႉ 123 ၼႆႉ ယိုဝ်းၵွင်ႈလူင်ၵႂႃႇတူၵ်းတႅၵ်ႇ တိူဝ်ႉသႂ်ႇ ထဝ်ႈၸၢႆး ဢႃယု 60 ပၢႆ ၸၢဝ်း လွႆ ၵေႃႉၼိုင်ႈ လူႉတၢႆၵိုၵ်းႁိူၼ်း တီႈဝၢၼ်ႈၼမ်ႉၶုမ်။ ယဝ်ႉၵေႃႈ မၢၵ်ႇလူင်ၶဝ်ၼႆႉ ၵႂႃႇတူၵ်းသႂ်ႇထႅင်ႈ သွင်မႄႈလုၵ်ႈ တီႈဝၢၼ်ႈ ႁူဝ်ၼမ်ႉ (ဝၢၼ်ႈၸၢဝ်းၶၢင်) ၼၼ်ႉၵေႃႈ လူႉတၢႆထင်တီႈ တင်းသွင်မႄႈလုၵ်ႈ။ မႄႈလုၵ်ႈဢွၼ်ႇၼၼ်ႉ တေမီး ဢႃယု 50 ပၢႆ လႄႈ လုၵ်ႈမၼ်းသမ်ႉတေမီးမွၵ်ႈ 8 ၶူပ်ႇ။ ၼၼ်ႉၵေႃႈ တၢႆလၢႆလၢႆ သိုၵ်းမၢၼ်ႈ ဢမ်ႇမႃးတူၺ်းဢဝ်ပုၼ်ႈၽွၼ်းသင်ပၼ်”- ၵူၼ်းပိုၼ်ႉတီႈ ၼမ်ႉၽၵ်းၵႃ သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 29/8/2023 ၼႆႉ သိုၵ်းမၢၼ်ႈ တပ်ႉၶလယ 123 တီႈၼမ်ႉၽၵ်းၵႃၼႆႉ ယိုဝ်းၵွင်ႈလူင်ၵႂႃႇတၢင်း ၼမ်ႉဢုမ် ဝဵင်းမူႇၸေႊ ဢမ်ႇယွမ်း 20 လုၵ်ႈ။ မိူဝ်ႈဝႃး ဝၼ်းတီႈ 30 ၼႆႉ ယိုဝ်းၵွင်ႈလူင်ၵႂႃႇထႅင်ႈ ဢမ်ႇယွမ်း 20 လုၵ်ႈ။ မိူဝ်ႈၼႆႉ ဝၼ်း တီႈ 31 ယၢမ်းဝၢႆးဝၼ်းမွၵ်ႈ 3 မူင်း သိုၵ်းမၢၼ်ႈၼႆႉ ယိုဝ်းၵွင်ႈလူင် ၵႂႃႇတၢင်းဝၢၼ်ႈၼမ်ႉဢုမ်ထႅင်ႈ ပဵၼ်လၢႆလုၵ်ႈ ၵူၼ်းၼမ်ႉ ၽၵ်းၵႃလၢတ်ႈ။
မိူဝ်ႈဝႃး ဝၼ်းတီႈ 30/8/2023 ယၢမ်းၵၢင်ၼႂ် သိုၵ်းတဢၢင်း TNLA ဢဝ်ရူတ်ႉၶိူင်ႈလမ်းၼိုင်ႈလႄႈ ၵႃးလမ်းၼိုင်ႈ ၶဝ်ႈယိုဝ်း တပ်ႉသိုၵ်းမၢၼ်ႈ ၶလယ 123 တီႈၼမ်ႉၽၵ်းၵႃၼႆႉသေပၢႆႈ ဝၢႆးယိုဝ်းယဝ်ႉ သိုၵ်းမၢၼ်ႈၼႆႉ ဢဝ်ၵွင်ႈလူင် လၢမ်းလိမ်းယိုဝ်းၵွင်ႈ လူင်ၵႂႃႇၵူႈႁူးၵူႈတၢင်းသေ တိူဝ်ႉၺႃးၵူၼ်းၼမ်ႉၽၵ်းၵႃ မၢတ်ႇၸဵပ်း 3 ၵေႃႉ။ ၼႂ်းၼၼ်ႉ ၸၢႆး 2 ၵေႃႉ ယိင်း 1 ၵေႃႉ ၼႆယဝ်ႉ။
