ပၢင်ၵုမ်ၺီႇလႃႇၶၢမ်ႇ သင်ၶၸဝ်ႈ တီႈဝဵင်းလၢင်းၶိူဝ်း ပွၵ်ႈၵမ်း 57 ပီၼႆႉ ၸဵမ်သင်ၶ – တၵ်ႉၵႃႇ တီႈၸမ်/ၵႆ ၶဝ်ႈႁူမ်ႈဢုပ်ႇဢူဝ်း ၵိုၼ်းၶွၼ်ႈၼမ် ႁူမ်ႈပႃး တိူၵ်ႈၵမ်မထၢၼ်း တီႈၸႄႈမိူင်းမွၼ်းလႄႈ မိူင်းယၢင်းလႅင် ၸိူဝ်းၼႆႉၵေႃႈ ၶဝ်ႈႁူမ်ႈၸွမ်း။

တႄႇဢဝ် ဝၼ်းတီႈ 4-7/2/2023 ယူႇတီႈ သင်ၶၸဝ်ႈ – တၵ်ႉၵႃႇ ၵူၼ်းမိူင်းပိုၼ်ႉတီႈ ဝဵင်းလၢင်းၶိူဝ်း ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်ၵုမ်ၺီႇလႃႇၶၢမ်ႇ သင်ၶၸဝ်ႈ မူႇလမိၼ်းၵုၼ်း ပွၵ်ႈၵမ်း 57 ပီ တီႈတိူၵ်ႈၵမ်မထၢၼ်း ဝဵင်းလၢင်းၶိူဝ်း ၸိုင်ႈ တႆးပွတ်းၸၢၼ်း။

မီးသင်ၶၸဝ်ႈ – တၵ်ႉၵႃႇ ၵူႈၸႄႈဝဵင်း ဢၼ်မီးတိူၵ်ႈၵမ်မထၢၼ်း ၸိူဝ်းၼၼ်ႉ မႃးၶဝ်ႈႁူမ်ႈဢုပ်ႇဢူဝ်းလဝ်ႈ လၢတ်ႈၼႄၵၼ် လွင်ႈငဝ်းလၢႆးၵၢၼ် တိုဝ်းၵမ်တြႃးတီႈတိူၵ်ႈၵမ်မထၢၼ်းၽႂ်မၼ်းလႄႈ လွင်ႈႁၢင်ႈႁႅၼ်းၽႅၼ်ၵၢၼ်မိူဝ်းၼႃႈ ၸဵမ်ၸိူဝ်းၼႆႉ။

ၸဝ်ႈၶူးလူင် ဝိၸႃႇရ (ၵဵင်းတုင်) ၸဝ်ႈၵွၼ်းတိူၵ်ႈၵမ်မထၢၼ်း ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ -“ပၢင်ၵုမ်ၼႆႉ ၸတ်း 4 ဝၼ်း။ ဝၼ်းထူၼ်ႈၼိုင်ႈ တေပဵၼ်ပၢင်ၵုမ်ၸဝ်ႈၼႄတြႃးတင်းမူတ်း ဢုပ်ႇဢူဝ်း ၵၼ်။ ဝၼ်းထူၼ်ႈသွင် ၸဝ်ႈၵွၼ်းတိူၵ်ႈၵမ်မထၢၼ်း တီႈဝဵင်းလႂ်ဝဵင်းၼၼ်ႉ လဝ်ႈလၢတ်ႈၼႄ ငဝ်းလၢႆးၼႂ်း ပိုၼ်ႉတီႈၽႂ်မၼ်း။ ဝၼ်းထူၼ်ႈသၢမ် ၵေႃးပၵ တိူၵ်ႈၵမ်မထၢၼ်း တီႈဝဵင်းလႂ်ဝဵင်းၼၼ်ႉ လဝ်ႈလၢတ်ႈၼႄ ငဝ်းလၢႆးၼႂ်းပိုၼ်ႉတီႈ တိူၵ်ႈၵမ်မထၢၼ်းၽႂ်မၼ်း။ ဝၼ်းထူၼ်ႈသီႇ ၸဝ်ႈ ၼႄတြႃး မႃးဢုပ်ႇဢူဝ်း တႅတ်း တတ်း လွင်ႈပၢင်ၵုမ်ၺီႇလႃႇၶၢမ်ႇပီတေမႃး တေပၼ်ပုၼ်ႈၽွၼ်း ဝဵင်းလႂ်ႁပ်ႉပဵၼ် ၸဝ်ႈတႃႇၼလႄႈ ပၢင်တြႃးၶၢဝ်းမႆႈၼႆႉ တေသိုပ်ႇပိုတ်ႇၵႂႃႇတီႈလႂ် ၸဵမ်ၸိူဝ်းၼႆႉ”- ဝႃႈၼႆ။

ပၢင်ၵုမ်ၺီႇလႃႇၶၢမ်ႇ တီႈတိူၵ်ႈၵမ်မထၢၼ်း ဝဵင်းလၢင်းၶိူဝ်း ပွၵ်ႈၵမ်း 57 ၼႆႉ ၽူႈတၢင်တူဝ် တိူၵ်ႈ ၵမ်မထၢၼ်း ၼႂ်းမိူင်းတႆးပတ်းပိုၼ်ႉ မႃးၶဝ်ႈႁူမ်ႈ ဢုပ်ႇဢူဝ်း 36 တိူၵ်ႈ ၊ မိူင်းယၢင်းလႅင် 2 တိူၵ်ႈ ၵမ်မထၢၼ်းတိုဝ်ႉၸၢႆးၶႃး လႄႈ ၵွင်းမူးၶမ်း၊ တိူၵ်ႈၵမ်မထၢၼ်းမိူင်းမွၼ်းသမ်ႉ ပဵၼ်တီႈဝဵင်းသထူင်ႇ တိူၵ်ႈၼိုင်ႈ။

ပွႆးၺီႇလႃႇၶၢမ်ႇပီၼႆႉ ပီႈၼွင်ႉဝဵင်းလၢင်းၶိူဝ်းႁဵတ်းပႃး ပၢင်လူႇတၢၼ်း မၢႆတွင်း တိူၵ်ႈၵမ်မထၢၼ်း ဝဵင်းလၢင်းၶိူဝ်း ၵေႃႇတင်ႈမႃးၶွပ်ႈတဵမ် 75 ပီၵွၼ်းသႅင် ။

ပၢင်ၵုမ်ၺီႇလႃႇၶၢမ်ႇသင်ၶၸဝ်ႈ တီႈလၢင်းၶိူဝ်း ဝၼ်းလိုၼ်းသုတ်းၼႆႉ တႅပ်းတတ်းဝႃႈ ၺီႇလႃႇၶၢမ်ႇ မူႇလမိၼ်းၵုၼ်း ပွၵ်ႈၵမ်း 58 ပီ ပီတေမႃးၼႆႉ တေၸတ်းႁဵတ်းတီႈဝဵင်းမိူင်းပၼ်ႇ။ ပွၵ်ႈၵမ်း 59 သမ်ႉ တေပဵၼ်တီႈ ဝဵင်းၸေႊလၢၼ်ႉ ။