ပၢင်ပွႆးယုၵ်ႉယွင်ႈ ၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ် ပီၼႆႉပဵၼ် ပွၵ်ႈထူၼ်ႈ 47 တေၸတ်းၶိုၵ်ႉယႂ်ႇ မိူၼ်မိူဝ်ႈၵူႈပီပူၼ်ႉမႃး ဝႃႈၼႆ။

ဝၼ်းတီႈ 4-6/2/2023 ၸိုင် တူၵ်းမႅၼ်ႈလိူၼ် 3 မႂ်ႇ 14 ၶမ်ႈ၊ လိူၼ် 3 မူၼ်းလႄႈ လိူၼ် 3 လွင်ႈ 1 ၶမ်ႈ ယူႇ တီႈ ၵေႃပွင်ၵၢၼ် ပွင်ပဵၼ်ပၢင်ပွႆး တေဢွၼ်ႁူဝ်ၸတ်းႁဵတ်း ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈထူၼ်ႈ 47 တီႈဝတ်ႉ မွၵ်ႇၸၢမ် ဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး ၼႆယဝ်ႉ။

ၸၢႆးသႅင်ယ ႁူဝ်ပဝ်ႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉ ပီၼႆႉတေၸတ်းယႂ်ႇ ၶိုၼ်ႈ ယွၼ်ႉဢမ်ႇလႆႈၸတ်းႁဵတ်းယႂ်ႇမႃးၼႆႉ တေမီး 3 ပီယဝ်ႉ။ တင်ႈတႄႇတၢင်းပဵၼ်ၶူဝ်ႊဝိတ်ႉ 19 ၼၼ်ႉမႃး။ ပိုၼ်းပဵၼ်မႃး ပွႆးယုၵ်ႉယွင်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ်ၼႆႉ မိူဝ်ႈတႄႇမၼ်း တေဢၢၼ်းၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆး ၵူၺ်း။ ၵမ်းၼႆႉ ၸဝ်ႈၼႃႈတီႈထႆးၶဝ် ၼႄႉၼွၼ်းဝႃႈ ႁႂ်ႈမၼ်းၵဵဝ်ႇၵပ်းတၢင်းၾိင်ႈငႄႈလိၵ်ႈလၢႆး ဢမ်ႇလီႁႃႉ? ။ မိူဝ်ႈၽွင်း ၼၼ်ႉ သမ်ႉတူၵ်းမႅၼ်ႈလိူၼ်သၢမ်မူၼ်းလႄႈ ယွၼ်ႉၼၼ် တႄႇဢဝ်ၼၼ်ႉမႃးၵေႃႈ ၸတ်းႁဵတ်းမႃးပွႆးယုၵ်ႉယွင်ႈၸဝ်ႈၶူးလိၵ်ႈ တႆး ၼႂ်းလိူၼ် 3 မူၼ်း မႃးၵူႈပီယဝ်ႉ”- ဝႃႈၼႆ။

ပၢင်ပွႆး ယုၵ်ႉယွင်ႈၸဝ်ႈၶူးမေႃလိၵ်ႈတႆးၼႆႉ မိူဝ်ႈပၢၼ် ပေႃႈၵမ်ႈၼမ်းသႅင် (ပူႇႁဵင်သႅင်) ဝၢၼ်ႈမႂ်ႇမွၵ်ႇၸၢမ်တင်း မုၼ်ၸဝ်ႈ သေႃးၽီႇတ ၸဝ်ႈၵွၼ်းဝတ်ႉမွၵ်ႇၸၢမ်လႄႈ ၸဝ်ႈၸၢင်ႉ ဢမ်ႇၼၼ် ၸဝ်ႈသိူဝ်ဝၢႆႇ (သိူဝ်လိူၼ်ၾႃႉ) လုၵ်ႈၸဝ်ႈၾႃႉလူင် မိူင်း ယွင်ႁူၺ်ႈ ႁူမ်ႈတင်း ၸဝ်ႈသင်ၶ၊ ၽူႈဢွၼ်ႁူဝ်လႄႈ ၽူႈႁၵ်ႉလိၵ်ႈလၢႆးလႄႈၾိင်ႈငႄႈတႆး ၼႂ်းမိူင်းထႆး ဢွၼ်ၵၼ် ၵေႃႇတင်ႈ ၵေႃသေ တႄႇႁဵတ်းမႃး တီႈဝတ်ႉဝၢၼ်ႈမႂ်ႇမွၵ်ႇၸၢမ် မိူဝ်ႈပီ 1967 ပဵၼ်ပီဢွၼ်တၢင်းသုတ်း။ ဝၢႆးၼၼ်ႉမႃး သိုပ်ႇတၢမ်လၢမ်း ၵၼ်ႁဵတ်းမႃးၵူႈၶူပ်ႇပဵၼ်ပီ ႁၢၼ်ႉတေႃႇထိုင်ယၢမ်းလဵဝ်။

ထႅင်ႈလွင်ႈၼိုင်ႈ တီႈဝၢၼ်ႈမႂ်ႇမွၵ်ႇၸၢမ်ၼႆႉ ၸဝ်ႈသင်ၶလႄႈၽူႈယႂ်ႇၵူၼ်းလူင်ၶဝ် လႆႈတႅပ်းတတ်းဢဝ်ဝၼ်းလိူၼ်သၢမ်မူၼ်း ပဵၼ်ဝၼ်းယုၵ်ႉယွင်ႈၶူးမေႃလိၵ်ႈတႆးသေ ႁဵတ်းပွႆးယုၵ်ႉယွင်ႈမႃး။ ၼင်ႇႁိုဝ် တေပဵၼ်တီႈမၢႆတွင်း(ဢၼုသွၼ်) ၸဝ်ႈၶူးမေႃ လိၵ်ႈတႆးၶဝ်ၸဝ်ႈၼႆသေ လႆႈဢွၼ်ၵၼ်ၵေႃႇတင်ႈဝႆႉႁေႃ ၸဝ်ႈၶူးမေႃ လင်ၼိုင်ႈ ပဵၼ်ႁၢင်ႈတိုၵ်းသွင်ၸၼ်ႉ။

ႁေႃၸဝ်ႈၶူးမေႃၼႆႉ ၸၼ်ႉတႂ်ႈလၢင်ႈ ႁၢင်ႈႁႅၼ်းဝႆႉ ၶူဝ်းၶွင်ၵိုၵ်းပိုၼ်းဢၼ်ၵဵဝ်ႇတင်းၾိင်ႈတႆးၵူႈတီႈတီႈ ႁူမ်ႈတင်းလိၵ်ႈလၢႆး ပၢႆပေႇ ဢၼ်ၸဝ်ႈၶူးမေႃၶဝ်ၸဝ်ႈ လႆႈတႅမ်ႈဝႆႉၸိူဝ်းၼၼ်ႉ ၼင်ႇၵႃႈဝၵ်ႉမႃးႁႃလႆႈ။ ဢၢၼ်းၵဵပ်းႁွမ် တွမ်ၶွၼ်ႈပႃးၽိုၼ်လိၵ်ႈ ၸဝ်ႈၶူးမေႃၶဝ်ဝႆႉမိူၼ်ႁူင်းတူၺ်းလိၵ်ႈပုၼ်ႈတႃႇၽူႈလဵပ်ႈႁဵၼ်း၊ ၽူႈၶူၼ်ႉၶႂႃႉၶဝ် မႃးလဵပ်ႈႁဵၼ်းၼႂ်းဝၼ်းၼႃႈ ၸိူဝ်းၼႆႉ။ ၼႂ်း ၼၼ်ႉ တေမီးလွင်ႈပိုၼ်း၊ လွင်ႈလိၵ်ႈလၢႆး၊ လွင်ႈၾိင်ႈငႄႈ၊ ႁူမ်ႈတင်းၶိူင်ႈမႆႉ ၶိူင်ႈမိုဝ်း ဢၼ်ၵဵဝ်ႇတင်း လိၵ်ႈလၢႆးလႄႈ ၾိင်ႈ ငႄႈၸၢဝ်းၶိူဝ်းတႆးၵူႈၶိူဝ်းၶိူဝ်း ၼႆထႅင်ႈ။