သင်ၶၸဝ်ႈလႄႈ တၵ်ႉၵႃႇ ႁူမ်ႈၵၼ် ၶုတ်းႁၼ်ႁုၼ်ႇႁၢင်ႈၽြႃးၵဝ်ႇၵႄႇ ၼႂ်းဢိူင်ႇၼႃးမၢၵ်ႇၶေႃ ပဵၼ်ၽြႃးၵေႃႇမိူင်း၊ ၽြႃးၼ ၵႃးမုင်း၊ ၽြႃးမႆႉၺွင်ႇၽေႃးထီႉလႄႈ ၼၢႆးၾၼ်ၶဝ်ႈ ၸိူဝ်းၼႆႉ။
တႄႇဢဝ် ဝၼ်းတီႈ 31/8/2022 ၼၼ်ႉမႃးထိုင် ဝၼ်းတီႈ 8/9/2022 ၼႆႉ ယူႇတီႈ သင်ၶၸဝ်ႈလႄႈတၵ်ႉၵႃႇ ႁူမ်ႈၵၼ် ၶုတ်း ႁၼ်ႁုၼ်ႇႁၢင်ႈၽြႃး တီႈၵွင်းမူးၵဝ်ႇၵႄႇ ဢၼ်မီးဝႆႉၾၢႆႇဢွၵ်ႇဝၢၼ်ႈၶၢႆးႁဵဝ်း ယၢၼ်ၵႆဝၢၼ်ႈ မွၵ်ႈ 1 လၵ်း ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ဢိူင်ႇၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ – “သြႃႇၸဝ်ႈဢွၼ်ႁူဝ်သေ ၵႂႃႇၽဵဝ်ႈယိူဝ်ႈယႃႈယုမ်း တီႈၵွင်းမူးၵဝ်ႇ ၵႄႇ တီႈႁူၺ်ႈလၼ်ႈ။ ၵူႈပွၵ်ႈ ဢွင်ႈတီႈၼၼ်ႉ ပဵၼ်ဝၢၼ်ႈၵဝ်ႇဝတ်ႉၵဝ်ႇ။ ယၢမ်းလဵဝ်တႄႉ ဢမ်ႇမီးၵူၼ်းယူႇယဝ်ႉ ပဵၼ်သူၼ်ၶဝ်ႈၵၢပ်ႇမူတ်းယဝ်ႉ။ သြႃႇၸဝ်ႈၶဝ်တီႇတီႇၽဵဝ်ႈၽဵဝ်ႈသေ ၶၢဝ်းတၢင်းၸမ် 10 ဝၼ်းၼႆႉ ၶုတ်းႁၼ်ၽြႃး ၵေႃႇမိူင်း 17 သူႇ၊ ၽြႃး ၼၵႃးမုင်း 1 သူႇ၊ ၽြႃးမႆႉၺွင်ႇၽေႃးထီႉ 1 သူႇ၊ ၼၢႆးၾၼ်ၶဝ်ႈ 1 ၸဝ်ႈလႄႈ ပႄႉတွင်း 2 တူဝ်”- ဝႃႈၼႆ။
ႁၢင်ႈၽြႃးၵဝ်ႇၵႄႇ ဢၼ်ၶုတ်းလႆႈၸိူဝ်းၼႆႉ ယူႇတီႈသင်ၶၸဝ်ႈ တေပၢင်းဢဝ်မိူဝ်းဝႆႉ တီႈဝတ်ႉၶၢႆးႁဵဝ်း တႃႇတၵ်ႉၵႃႇသတ်ႉ ထႃး ပေႃးတေလႆႈလူႇတၢၼ်း ဝႆႈသႃ ဝႃႈၼႆ။
“ၽြႃးၼႆႉ တေပဵၼ်ၽြႃးၵဝ်ႇၵႄႇ ပေႃးတူၺ်းပီဢၼ်တႅမ်ႈဝႆႉ တီႈႁုၼ်ႇႁၢင်ႈၼၼ်ႉ တေဢမ်ႇယွမ်း 150 ပီ။ ၽြႃးၵေႃႇမိူင်း ဢၼ်ၶုတ်းႁၼ်ၼႆႉ တေသုင်မွၵ်ႈ ၶိုပ်ႈပၢႆ၊ ၽြႃးၼၵႃးမုင်းသမ်ႉ တေသုင်မွၵ်ႈ 5 ပႅၵ်ႉ ၼႆႉၶႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄ ၼင်ႇၼႆ။
လိူဝ်ၼၼ်ႉ တေယူႇတီႈသင်ၶၸဝ်ႈလႄႈ တၵ်ႉၵႃႇ တေသိုပ်ႇၶုတ်းၵႂႃႇထႅင်ႈ ႁႂ်ႈထူပ်းႁၼ်တင်းမူတ်းသေ တေပၢင်းဢဝ်မႃး လုမ်းလႃးဝႆႉတီႈ ဝတ်ႉၶၢႆးႁဵဝ်း။ တေႃႈလဵဝ် သင်ၶၸဝ်ႈလႄႈ တၵ်ႉၵႃႇ တိုၵ်ႉသိုပ်ႇၶုတ်းၵႂႃႇထႅင်ႈဝႆႉယူႇ ဝႃႈၼႆ။
