ၶူဝ်ၵုၼ်လူင် ဢၼ်ၵူၼ်းမိူင်းတႆႇၸႂ်ႉတိုဝ်းၵႂႃႇမႃးၼၼ်ႉ လူင်ပွင်ၸိုင်ႈမၢၼ်ႈတေၵေႃႇသၢင်ႈမႄးၶႂၢၵ်ႈဢွၵ်ႇထႅင်ႈ ၸွမ်းၼင်ႇလႆႈၸႂ်ၵၼ်ဝႆႉတင်း မိူင်းၶႄႇ ဝႃႈၼႆ။
ၶူဝ်ၵုၼ်လူင်ၼႆႉ မီးၼႂ်းၸႄႈဝဵင်းၵုၼ်လူင် ၸိုင်ႈတႆးပွတ်းႁွင်ႇ မီးၼိူဝ်သဵၼ်ႈတၢင်း သႅၼ်ဝီ ၵုၼ်လူင်လႄႈ ၶျိၼ်းသူၺ်ႇႁေႃ ၶဝ်ႈၸူးထိုင်တၢင်းမိူင်းၶႄႇ။
သင်ဝႃႈ ၶူဝ်ၵုၼ်လူင်ၼႆႉ မႄးၵေႃႇသၢင်ႈၶႂၢၵ်ႈၵႂၢင်ႈမႃးယဝ်ႉၸိုင် ၵူၼ်းမိူင်းတႆး တင်း ၵူၼ်းမိူင်းၶႄႇ ပွတ်းယုၼ်ႊ ၼၢၼ်ႊ တေၸၢင်ႈတေႃႉၶူဝ်း ၵႃႉၶၢႆတေႃႇၵၼ်ၵႂႃႇမႃးလႆႈလီ ဝႃႈၼႆ။
ၵူၼ်းမိူင်းပိုၼ်ႉတီႈ သႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ ၶူဝ်တီႈၵုၼ်လူင်ၼၼ်ႉ မၼ်းပဵၼ်ၶူဝ်ၽႅၼ် ၶူဝ်းၶွင် ဢၼ်လုၵ်ႉတၢင်းမိူင်းတႆးသေ ဢွၵ်ႇၵႂႃႇတၢင်းၼၼ်ႉသမ်ႉ ၵမ်ႈၼမ်ပဵၼ်ၶဝ်ႈၵၢပ်ႇ။ ၶူဝ်းၶွင်ဢၼ် လုၵ်ႉမိူင်းၶႄႇ ၶဝ်ႈမႃးသမ်ႉ ၵမ်ႈၼမ်ပဵၼ် ၶူဝ်းၶွင်ၵိၼ်ယႅမ်ႉလႄႈ ၶွင်ၸႂ်ႉတိုဝ်း ၸိူဝ်းၼႆႉ” ဝႃႈၼႆ။
ၶူဝ်ၵုၼ်လူင်ၼႆႉ ၵေႃႇသၢင်ႈႁဵတ်းယဝ်ႉၵႂႃႇမိူဝ်ႈပီ 1965 ပဵၼ်ၶူဝ်ၽႅၼ် ႁပ်ႉလႆႈၼမ်ႉၼၵ်း 40 တၼ်ႊ ဝႃႈၼႆ။
