UNOCHA Myanmar ပိုၼ်ၽၢဝ်ႇမိူဝ်ႈဝၼ်းတီႈ 19/3/2022 ဝႃႈ ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး ပီပၢႆၼႆႉ ၵူၼ်းမိူင်းပတ်းပိုၼ်ႉမိူင်းမၢၼ်ႈ ဢၼ်လႆႈပၢႆႈယၢၼ်ႁိူၼ်းယေးတီႈယူႇ ယွၼ်ႉၽေးသိုၵ်းသိူဝ် မီးယူႇ 889,900 ၵေႃႉယဝ်ႉဝႃႈၼႆ။
သဵၼ်ႈမၢႆၼႆႉ ပဵၼ်ဢၼ်ၵဵပ်းလႆႈတေႃႇထိုင်ဝၼ်းတီႈ 14/3/2022 ။ ပေႃးပၢင်တိုၵ်းယဵၼ် သမ်ႉမီးၵူၼ်းၶိုၼ်းပွၵ်ႈယူႇႁိူၼ်းယေးဝၢၼ်ႈဢိူင်ႇၸဝ်ႈၵဝ်ႇၵေႃႈမီးလႄႈ သဵၼ်ႈမၢႆၸၢင်ႈမီး ၶိုၼ်ႈလူင်းဢိတ်းဢီႈဝႃႈၼႆဝႆႉ။
ၵူၼ်းပၢႆႈၽေးသိုၵ်းႁိမ်းၸမ် 9 သႅၼ်ၼႆႉ ပဵၼ်ၵူၼ်းမိူင်းၸႄႈၵႅင်းၼမ်လိူဝ်ပိူၼ်ႈမီး 195,300 ၵေႃႉ။ ထိသွင်ပဵၼ်မိူင်းယၢင်းလႅင် မီး 93,000 ပၢႆ။ ထိသၢမ်ပဵၼ် မိူင်းယၢင်းၽိူၵ်ႇ မီး 70,000 ပၢႆ။ မိူင်းတႆးပွတ်းၸၢၼ်း ပဵၼ်ထိ 4 မီးၵူၼ်းပၢႆႈၽေးသိုၵ်း 59,000 ပၢႆ။ မိူင်းတႆးပွတ်းႁွင်ႇသမ်ႉမီးၵူၼ်းပၢႆႈၽေးသိုၵ်း 6,000 ပၢႆ။
ပဵၼ်ယွၼ်ႉပၢင်တိုၵ်းသိုၵ်းၵႅတ်ႇၶႄၵူၼ်းမိူင်းလႄႈသိုၵ်းမၢၼ်ႈပိုတ်းယိုဝ်းၵၼ်။ ၵူၼ်းမိူင်းတႆးပွတ်းႁွင်ႇလႄႈ မိူင်းၶၢင် သမ်ႉ လႆႈပၢႆႈၽေးသိုၵ်း ပၢင်တိုၵ်းသိုၵ်းမၢၼ်ႈလႄႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ ပၢင်တိုၵ်းၼႂ်းၵႄႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ပိုတ်းယိုဝ်းၵၼ် ၸိူဝ်းၼႆႉ။
ၵူၼ်း မိူင်းတႆးလႄႈမိူင်းၶၢင်ၸိူဝ်းၼၼ်ႉတႄႉ ၵမ်ႈၼမ် ဢမ်ႇလႆႈပၢႆႈၽေးသိုၵ်းႁိုင် ၊ ပေႃးပၢင်တိုၵ်းယဵၼ် ဢွၼ်ၵၼ်ပွၵ်ႈၶိုၼ်းႁိူၼ်းယေးၸဝ်ႈၵဝ်ႇၶိုၼ်း။ ၸိူဝ်းဢမ်ႇၸၢင်ႈပွၵ်ႈႁိူၼ်းသေ ဢၼ်ယူႇသိုပ်ႇယူႇသဝ်းဝႆႉပၢင်သဝ်းၵူၼ်းပၢႆႈၽေးသိုၵ်း ၵိုတ်းဢိတ်းဢွတ်းၵူၺ်း ။
သဵၼ်ႈမၢႆဢၼ်ၺႃးသိုၵ်းမၢၼ်ႈပိုတ်းယိုဝ်း ယႃႉလႅဝ်ၶူဝ်းၶွင်ၵူၼ်းမိူင်းၵေႃႈ ၵူၼ်းမိူင်းၸႄႈၵႅင်း ၺႃးၼမ်လိူဝ်သုတ်း 2700 ပၢႆလင်ၶႃးႁိူၼ်း။ မိူင်းတႆးပွတ်းၸၢၼ်းၵေႃႈၺႃးမွၵ်ႈႁိမ်းၸမ် 100 လင်ၼႆႉ ၼင်ႇၵဝ်ႇ OCHA Data, Karenni Human Rights Group, Data for Myanmar ၵဵပ်းတုမ်ၶေႃႈမုၼ်းသေ ႁဵတ်းဢွၵ်ႇပိုၼ်ၽၢဝ်ႇဝႆႉၼင်ႇၼႆ။
ၵွပ်ႈၼႆလႄႈ မိူင်းမၢၼ်ႈပတ်းပိုၼ်ႉ ဢၼ်ပၢႆႈၽေးသိုၵ်းလႄႈဢမ်ႇပၢႆႈ ၵူၼ်းမိူင်းဢၼ်လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် ယၢပ်ႇၽိုတ်ႇၶၢၼ်ၸႂ်တႄႉတႄႉ မီးယူႇ 6 လၢၼ်ႉပၢႆ။ တႃႇၸွႆႈထႅမ်ၵူၼ်း 6 လၢၼ်ႉပၢႆၼႆႉ ၾၢႆႇၸွႆႈထႅမ်တူၺ်းလူ ၵူၼ်းတေႃႇၵူၼ်း HRP တိုတ်ႉၸၼ်ဝႆႉၽႅၼ်ၵၢၼ်တႃႇၸွႆႈထႅမ်တူၺ်းလူ ၼႆသေတႃႉ ပီ 2022 ၶဝ်ႈမႃးၼႂ်း 3 လိူၼ် ၸမ် 4 လိူၼ်ယဝ်ႉသေတႃႉ ပႆႇႁၼ်လူင်းၸွႆႈၵူၼ်းမိူင်းတီႈဢၼ်လူဝ်ႇႁႅင်းတႄႉတႄႉၼၼ်ႉသင် UNOCHA Myanmar ပိုၼ်ၽၢဝ်ႇဝႆႉၼင်ႇၼႆ။
