တီႈမိူင်းမၢၼ်ႈၼႆႉ ယွၼ်ႉပိူဝ်ႈပၢင်တိုၵ်းသိုၵ်းသိူဝ်ၼႂ်းမိူင်းသေ ၵူၼ်းမိူင်းလႆႈပၢႆႈၽေးသိုၵ်းသိူဝ်ၼပ်ႉႁူဝ်လၢၼ်ႉ၊ ၵူၼ်းမိူင်းၸိူဝ်းဢၼ်ႇထူပ်းၽေးသိုၵ်းၵေႃႈ ဢမ်ႇၸၢင်ႈႁႃၵိၼ်လဵင်ႉတွင်ႉလီလီ။
UN OCHA ပိုၼ်ၽၢဝ်ႇဝႃႈ ပတ်းပိုၼ်ႉမိူင်းႁူမ်ႈတုမ်ၼႆႉ ၵူၼ်းထူပ်းၽေးဢိုပ်းယၢပ်ႈမီး 18 လၢၼ်ႉပၢႆ ၊ ၼႂ်းၼၼ်ႉ လုၵ်ႈဢွၼ်ႇ 6 လၢၼ်ႉပၢႆ ထူပ်းၽေးဢိုပ်းယၢၵ်ႈၵိၼ်းၸႂ်ႁႅင်း ဝႆႉဝႃႈၼႆ။
ႁွင်ႈၵၢၼ်ၶၢဝ်ႇ Asianews ဢၼ်ပၵ်းမိူင်းဢီႇတလီႇတႄႉတႅမ်ႈတၢင်ႇဝႆႉဝႃႈ ႁူဝ်ၼပ်ႉၵူၼ်းထူပ်းၽေးဢိုပ်းယၢၵ်ႈၼႂ်းမိူင်းမၢၼ်ႈ 18 လၢၼ်ႉပၢႆၼႆႉ ၼမ်လိူဝ်ႁူဝ်ၼပ်ႉ ၽွင်းသိုၵ်းမၢၼ်ႈပႆႇယိုတ်းဢႃႇၼႃႇၸိုင်ႈမိူင်း ပဵၼ် 19 ပုၼ်ႈ ၵွပ်ႈၼႆလႄႈ ၸၢင်ႈလၢတ်ႈလႆႈတႅတ်ႈတေႃးဝႃႈ ယွၼ်ႉသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ဝႃႈၼႆ။
လိၵ်ႈပိုၼ်ၽၢဝ်ႇၽိုၼ်ၼႆႉဢွၵ်ႇမႃးၸဵမ်မိူဝ်ႈ ၵၢင်လိူၼ်တီႊသႅမ်ႊပိူဝ်ႊပူၼ်ႉမႃးသေတႃႉ တေႃႇထိုင်ယၢမ်းလဵဝ် ဢၼ်လႆႈပၢႆႈၽေးသိုၵ်းသိူဝ်တိုၵ်ႉမီးယူႇထႅင်ႈၵူႈဝၼ်းလႄႈ ႁူဝ်ၼပ်ႉၵူၼ်းယၢပ်ႇၽိုတ်ႇဢိုပ်းယၢၵ်ႈတိုၵ်ႉတေမီးၼမ်မႃးထႅင်ႈ – ၸုမ်းၸွႆႈထႅမ်ၵူၼ်းမိူင်းထူပ်းၽေးသိုၵ်းလၢတ်ႈၼင်ႇၼႆ။
ယၢမ်းလဵဝ်လုၵ်ႈဢွၼ်ႇဢၼ်ထူပ်းၽေးဢိုပ်းယၢၵ်ႈၼႆႉ ပဵၼ်ၼႂ်းမိူင်းၶျၢင်း၊ မိူင်းတႆး ၊ မိူင်းယၢင်းလႅင် လႄႈတိူင်းၸေႈၵႅင်းၸိူဝ်းၼႆႉ။ လုၵ်ႈဢွၼ်ႇၸိူဝ်းၼႆႉ တုမ်ႉတိူဝ်ႉပႃးပၢႆးးၸႂ်၊ ယၢမ်းလဵဝ် ပေႃးလႆႈငိၼ်းသဵင်ၶိူင်ႈမိၼ်ယိုဝ်းသိုၵ်းမႃးၼႆ သမ်ႉပေႃးတူၵ်းၸႂ်ၵူဝ်ႁႄ ႁႃတၢင်းပၢႆႈယူႇၼႂ်းလုၵ်းၼႂ်းႁူး၊ မိူၼ်ၼင်ႇၼႂ်းမိူင်းတႆးပွတ်းႁွင်ႇသမ်ႉ သိုၵ်းၵဝ်ႈၵၢင်ႉ MNDAA ၵဵပ်းသိုၵ်းလုၵ်ႈဢွၼ်ႇပႃးလႄႈ ႁဵတ်းႁႂ်ႈလုၵ်ႈဢွၼ်ႇလႆႈၵူဝ်လၢႆပႃႈလၢႆၾၢႆႇ ၊တုမ်ႉတိူဝ်ႉ ၵူႈပႃႈၵူႈၾၢႆႇ – ဝႃႈၼႆ။
လုၵ်ႈဢွၼ်ႇထူပ်းၽေးဢိုပ်းယၢၵ်ႈၼႆႉ တုမ်ႉတိူဝ်ႉထိုင်ပၢႆးတူဝ်ပၢႆးၸႂ်ၵူၺ်းဢမ်ႇၵႃး တုမ်ႉတိူဝ်ႉပႃးလွင်ႈယူႇသဝ်းၵိၼ်သၢင်ႈ တေႃႇထိုင်ပေႃးၵေႃႉယႂ်ႇလႄႈ ပဵၼ်ဢၼ်လမ်ႇလွင်ႈတႄႉတႄႉဝႃႈဝႃႈ – သင်ပဵၼ်လႆႈ ဢမ်ႇထုၵ်ႇလီပၼ်လုၵ်ႈဢွၼ်ႇထူပ်းၽေးဢိုပ်းယၢၵ်ႈလႃးလႃး -မေႃယႃလူင်ပၢႆးၸႂ် ႁူင်းယႃလူင်ဝဵင်းတႃႈၵုင်ႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ