ၼႂ်းၶၢဝ်းတၢင်း 20 ဝၼ်းၵူၺ်း ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တီႈဝဵင်းလၢဝ်ႇၵၢႆး ထုင်ႉၵဝ်ႈၵၢင်ႉ ပုင်ႈၶိုၼ်ႈထိုင် 600 ပၢႆ ၊ တိတ်းၸပ်းလၢမ်းၽႄႈႁႅင်းလႄႈ ၼႂ်းဢမ်ႇႁိုင်သင် ၸၢင်ႈပုင်ႈၶိုၼ်ႈထိုင် 1000 ပၢႆယူႇ ၸုမ်းၸွႆႈထႅမ်ႈ ၵူၼ်းပဵၼ်ၶူဝ်ႊဝိတ်ႉ 19 တီႈဝဵင်းၵၢတ်ႇၵဝ်ႇလၢဝ်ႇၵၢႆး လၢတ်ႈ။
မၼ်းၸၢႆးလၢတ်ႈဝႃႈ – “ဢၼ်တႄႇဢဝ်တၢင်းပဵၼ်လၢမ်းၽႄႈၶဝ်ႈမႃးၼႂ်းလၢဝ်ႇၵၢႆးၼႆႉ ပဵၼ်ၵူၼ်းဢၼ်လုၵ်ႉတၢင်ႇတီႈမႃး လၢဝ်ႇၵၢႆး မိူဝ်ႈဝၼ်းတီႈ 16 လိူၼ်ၵျုၼ်ႊပူၼ်ႉမႃး။ ၵွၼ်ႇၸိူဝ်းၶဝ် 5 ၵေႃႉပႆႇမႃးၵူတ်ႇထတ်းထူပ်းႁၼ်မႅင်းၶူဝ်ႊဝိတ်ႉ တီႈလၢဝ်ႇၵၢႆးၼႆႉ ၶဝ်ၵႂႃႇဢႅဝ်ႇ၊ တဝ် တီႈၵူၼ်းၵိုၼ်းၶွၼ်ႈၼႂ်းဝဵင်းလၢဝ်ႇၵၢႆးလၢႆလၢႆတီႈ လႄႈ ယၢမ်းလဵဝ်တီႈၶဝ်ၵႂႃႇဢႅဝ်ႇယဵမ်ႈၸိူဝ်းၼၼ်ႉ ထုၵ်ႇပိၵ်ႉဝႆႉမူတ်းယဝ်ႉ”- ဝႃႈၼႆ။
ယၢမ်းလဵဝ် တၢင်းၶဝ်ႈဝဵင်းဢွၵ်ႇဝဵင်းလႄႈ လၢႆလၢႆတီႈတီႈၵူၼ်းၵိုၼ်းၼၼ်ႉ ယူႇတီႈၸုမ်းၵူၼ်းမိူင်းမႃးပၵ်းတင်ႈပႂ်ႉၵူတ်ႇထတ်းယူႇသေတႃႉ ဢွင်ႈတီႈလိုဝ်ႈသဝ်း ၵူၼ်းတိတ်းၸပ်းၸိူဝ်ႉမႅင်း Quarantine Center ၵႂၢင်ႈၵႂၢင်ႈသမ်ႉဢမ်ႇမီးလႄႈ ပဵၼ်ဢၼ်မႆႈၸႂ်ဝႆႉယူႇ မၼ်းၸၢႆးလၢတ်ႈထႅင်ႈၼင်ႇၼႆ။
”ယွၼ်ႉပိူဝ်ႈၶူဝ်ႊဝိတ်ႉလၢမ်းၽႄႈႁၢဝ်ႈႁႅင်းလႄႈ ၵူၼ်းလုၵ်ႉမိူင်းမၢၼ်ႈတူင်ႈပဵင်းမႃးႁဵတ်းၵၢၼ်ၵေႃႈဢွၼ်ၵၼ်ပွၵ်ႈမိူဝ်းဝၢၼ်ႈၽႂ်မိူင်းမၼ်းၶိုၼ်းမီးယူႇၵူႈဝၼ်း။ ၵူၼ်းပိုၼ်ႉတီႈၵေႃႈပွင်ႉၶၢင်းၵၼ်ဝႃႈ ၵၢၼ်ႁႃလဵင်ႉတွင်ႉ ဢမ်ႇပဵၼ်ၵၢၼ်။ ၽႂ်ဢမ်ႇႁတ်းဢွၵ်ႇႁိူၼ်း၊ ယဵၼ်သီႇသီႇၼင်ႇမိူင်းႁၢမ်း။ ယၢပ်ႇၸႂ်ၵူၼ်းႁႃၵိၼ်လဵင်ႉတွင်ႉပွင်ႉၶၢင်းဝႃႈ ပႆႇၸပ်းတၢင်းပဵၼ်ၶူဝ်ႊဝိတ်ႉ 19 ၊ တေဢိုပ်းၶဝ်ႈသေတၢႆဢွၼ်တၢင်းယူႇယဝ်ႉၼႆဝႃႇ ” ၵေႃႉၸွႆႈထႅမ်ၵူၼ်းၸပ်းတၢင်းပဵၼ်ၼၼ်ႉလၢတ်ႈထႅင်ႈၼင်ႇၼႆ။
လိၵ်ႈဢၼ်ၾၢႆႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၵဝ်ႈၵၢင်ႉ ဢွၵ်ႇဝႆႉႁႂ်ႈဢဝ်ဝႂ်ၵမ်ႉတီႈၵၢင်ႉၵႄႇဝၢၼ်ႈဢိူင်ႇ တႃႇဢွၵ်ႇတၢင်းပွၵ်ႈႁိူၼ်း 
Photo လေက်ကိုင်သူ လောက်ကိုင်သားများစုစည်းရာ – ၵူၼ်းဢၼ်လုၵ်ႉတၢင်ႇတီႈသီႇလႅၼ်မႃးႁဵတ်းၵၢၼ်တီႈဝဵင်းလၢဝ်ႇၵၢႆး ဢွၼ်ၵၼ်ပွၵ်ႈၶိုၼ်းဝၢၼ်ႈၽႂ်မိူင်းမၼ်း
ဢၼ်လမ်ႇလွင်ႈသုတ်းတႄႉ ၾၢႆႇၵဵဝ်ႇၶွင်ႈၶဝ်ထုၵ်ႇလီပိၵ်ႉႁႄႉႁၢမ်ႈသဵၼ်ႈတၢင်း ဢၼ်တေၸၢင်ႈလၵ်ႉၶဝ်ႈၵႂႃႇမႃး ႁႃႁဵတ်းၵၢၼ်/ႁႃၵိၼ်တၢင်းလၢဝ်ႇၵၢႆးၼႆႉ ၸင်ႇတေၸၢင်ႈႁၢမ်ႈတၢင်းပဵၼ်ၶူဝ်ႊဝိတ်ႉ 19 လႆႈ ဝႃႈၼႆ။
ဝၼ်းတီႈ 6 မိူဝ်ႈဝႃးတႄႉ ၾၢႆႇ ႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၵဝ်ႈၵၢင်ႉ ပိုၼ်ၽၢဝ်ႇဝႃႈ ၽႂ်ၶႂ်ႈပွၵ်ႈႁိူၼ်းၶိုၼ်းၵေႃႈ ဢွၼ်ၵၼ်ၵႂႃႇယွၼ်းဝႂ်ႁပ်ႉႁွင်းတီႈ ၾၢႆႇၽွင်းငမ်းဝၢၼ်ႈဢိူင်ႇပွၵ်ႉယွမ်ႇၵေႃႈလႆႈဝႃႈၼႆ။
တေႃႇထိုင်မိူဝ်ႈၼႆႉတႄႉၵူၼ်းၸိူဝ်းယူတ်းယႃတူဝ်ႁၢႆၶႅၼ်းယဝ်ႉသေ လူင်းႁူင်းယႃ ပွၵ်ႈမိူဝ်းႁိူၼ်းတႄႉမီးယူႇ 57 ၵေႃႉယဝ်ႉလႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ