ဝဵင်းၶူဝ်လမ် ၸိုင်ႈတႆးပွတ်းၸၢၼ်း ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ် ၶူဝ်ႊဝိတ်ႉ 19 တင်းမူတ်း မီးၵႂႃႇ 11 ၵေႃႉယဝ်ႉ ၼႂ်း ၼၼ်ႉ လုၵ်ႈဢွၼ်ႇ ဢႃယုမွၵ်ႈ 7-8 ၶူပ်ႇၵေႃႈပႃး 2 ၵေႃႉ။
မိူဝ်ႈဝႃး ဝၼ်းတီႈ 5/7/2021 တီႈႁူင်းႁဵၼ်းၶႄႇ ဢၼ်မီးဝႆႉတီႈပွၵ်ႉ 1 ဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ထူပ်းႁၼ် လုၵ်ႈဢွၼ်ႇၼႂ်းႁူင်းႁဵၼ်း 2 ၵေႃႉ တိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 ၊ ဝၢႆးၼၼ်ႉ ၶိုၼ်းသိုပ်ႇၵူတ်ႇထတ်းထႅင်ႈလႄႈ ႁၼ်ၵူၼ်းတိတ်းၸပ်းတၢင်းပဵၼ်မႃး ၼႂ်းၶၢဝ်းတၢင်း 3 ဝၼ်းၵူၺ်းမီးၵူၼ်းတိတ်းၸပ်းထိုင် 11 ၵေႃႉလႆႈႁူႉၼင်ႇၼႆ။
ၵူၼ်းၼုမ်ႇ ပိုၼ်ႉတီႈ ၶူဝ်လမ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ပဵၼ်လုၵ်ႈဢွၼ်ႇ ဢႃယု တေမီး မွၵ်ႈ 7-8 ၶူပ်ႇၼႆႉၵူၺ်း တိတ်းၸပ်းၶူဝ်ႊဝိတ်ႉ 19 တီႈၵျွင်းသွၼ်လိၵ်ႈၶႄႇ ဢၼ်ပိုတ်ႇဝႆႉတီႈပွၵ်ႉ 1 ၼၼ်ႉ ပဵၼ်လုၵ်ႈဢွၼ်ႇမႅဝ်ႉ ၵူၼ်းၸၢႆးတင်းသွင်။ ယၢမ်းလဵဝ် ၵျွင်းၶႄႇၼၼ်ႉတႄႉ ပိၵ်ႉဢိုတ်းဝႆႉယဝ်ႉ”- ဝႃႈၼႆ။
ၼႂ်းဝဵင်းၶူဝ်လမ်ၼႆႉ တႄႇဢဝ် ႁူဝ်လိူၼ်ၼႆႉမႃး ဝၼ်းတီႈ 3-4 တေႃႇထိုင်မိူဝ်ႈၼႆႉၶၢဝ်းတင်း 3 ဝၼ်းၵူၺ်းၵူၼ်းၸပ်းတင်းပဵၼ် တင်းမူတ်းမီးၵႂႃႇ 11 ၵေႃႉ။
“ႁၢၼ်ႉတေႃႇထိုင် မိူဝ်ႈဝႃးၼႆႉ တင်းမူတ်းမီး 4 ၵေႃႉ ပဵၼ်ၵူၼ်းႁိူၼ်းလဵဝ်ၵၼ်။ ယၢမ်းလဵဝ်တႄႉ တၢင်းၶဝ်ႈႁိူၼ်းၶဝ် တီႈႁိူၼ်းယေးၶဝ်လႄႈ ဢွင်ႈတီႈၶဝ် ၵႆႉ ၵႂႃႇ မိူၼ်ၼင်ႇ တႃႈၵႃး ၸိူဝ်းၼႆႉ ပိၵ်ႉဢိုတ်းမူတ်းယဝ်ႉ။ ၵူၺ်းၵႃႈ မီးထႅင်ႈဢၼ်ၼိုင်ႈ ႁူင်းႁဵၼ်းၸၼ်ႉသုင်လူင်ပွင် ၸိုင်ႈ တီႈၶူဝ်လမ်ၼႆႉတႄႉ ဢမ်ႇပိၵ်ႉဢိုတ်းၶႃႈ။ တၢင်ႇႁူင်းႁဵၼ်း မိူၼ်ၸၼ်ႉဢွၼ်ႇ ၸၼ်ႉၵၢင် ၸိူဝ်းၼၼ်ႉတႄႉ ဢမ်ႇႁူႉ ၶႃႈ ပိၵ်ႉဢမ်ႇပိၵ်ႉဢၼ်ဝႃႈၼၼ်ႉ”- ၵူၼ်းၼုမ်ႇ ပိုၼ်ႉတီႈ ၶူဝ်လမ် သိုပ်ႇလၢတ်ႈၼႄၼင်ႇၼႆ။
ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉသေ တေႃႇထိုင် ၼႂ်းႁၢင်လိူၼ်မေႊလႄႈ လိူၼ်ၵျုၼ်ႊၼႆႉ မႃး ၼႂ်းမိူင်းတႆးၼႆႉ ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 မီးႁိမ်းၸမ် 2000 ၊ လူႉတၢႆ မီးႁိမ်း 100 ယဝ်ႉ။ ၼႂ်းမိူင်းတႆးပွတ်းႁွင်ႇ ၶႂ်ႈဝႃႈၵူၼ်းၸပ်းတၢင်းပဵၼ်မီးၵူႈဝဵင်း။ၼႂ်းမိူင်းတႆးပွတ်းၸၢၼ်းတႄႉ ၸင်ႇႁႃလၢမ်းၽႄႈတိတ်းၸပ်းလၢႆလၢႆဝၼ်းမႃးၼႂ်းဝူင်ႈၼႆႉၵူၺ်း။ ၵူၺ်းၵႃႈ ႁူင်းႁဵၼ်းလူင်ပွင်ၸိုင်ႈဢၼ်သိုၵ်းမၢၼ်ႈသင်ႇပိုတ်ႇၼၼ်ႉ ယင်းပႆႇသင်ႇပိၵ်ႉၶိုၼ်းသေလင်။
