ၵူၼ်းမိူင်းလႅၼ်လိၼ်တႆး-ထႆး မုင်ႈမွင်းပိုတ်ႇၶူဝ်လႅၼ်လိၼ်သွင်မိူင်း

ၵူၼ်းမိူင်းပိုၼ်ႉတီႈ ၸိူဝ်းယူႇၸွမ်းလႅၼ်လိၼ် တႆး – ထႆး (မႄႈသၢႆ – တႃႈၶီႈလဵၵ်း) ႁူပ်ႉတၢင်းယၢပ်ႇၵၢၼ်ၵႃႉၶၢႆ၊ ၵၢၼ်ၵႂႃႇမႃး ႁႃၵိၼ်လဵင်ႉတွင်ႉၸိူဝ်းၼႆႉ ႁူပ်ႉတၢင်းယၢပ်ႇ လၢႆၸိူဝ်းလၢႆလွင်ႈလႄႈ မုင်ႈမွင်း လူင်ပွင်ႈၸိုင်ႈ ထႆး/မၢၼ်ႈ ၸဵဝ်းပိုတ်ႇ ၽၵ်းတူလႅၼ်လိၼ်ၶိုၼ်း။

ၽၵ်းတူ/ ၶူဝ်လႅၼ်လိၼ်တႆး – ထႆး (မႄႈသၢႆ – တႃႈၶီႈလဵၵ်း) ၼႆႉ ယူႇတီႈတၢင်းလူင်ပွင်ၸိုင်ႈမိူင်းထႆး ၸီႉသင်ႇ ပိၵ်ႉဢိုတ်းမႃး တင်ႈတႄႇ မိူဝ်ႈဝၼ်းတီႈ 23/3/2020 တေႃႇထိုင်မႃးယၢမ်းလဵဝ် ပႆႇပိုတ်ႇ တေမီးၶၢဝ်းတၢင်း ၸမ် 3 လိူၼ်ယဝ်ႉ။ ၵူၼ်းမိူင်း ၸိူဝ်းယူႇၸွမ်းလႅၼ်လိၼ်တႆး – ထႆး ဢွၼ်ၵၼ်တူၵ်းတၢင်းယၢပ်ႇၽိုတ်ႇ တုမ်ႉတိူဝ်ႉၵၢၼ်ပၢႆးမၢၵ်ႈမီးလႄႈ ၵၢၼ်ႁႃၵိၼ် လဵင်ႉတွင်ႉၵၼ်ႁၢဝ်ႈႁႅင်း။

ၸၢႆးသၢမ် ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ၵႃႈၸူဝ်ႈပိၵ်ႉၶူဝ်မႃးၼႆႉ ၵၢၼ်ပၢႆးမၢၵ်ႈမီး ၵၢၼ်ႁႃၵိၼ်လဵင်ႉတွင်ႉၼႆႉ တေလႆႈဝႃႈ တုမ်ႉတိူဝ်ႉၵၼ်ႁႅင်းတႄႉတႄႉၶႃႈယဝ်ႉ။ တေႃႈလဵဝ်ၼႆႉ ၽႂ်ၽႂ်ၵေႃႈ မွင်းပိုတ်ႇၶူဝ်ၵၼ်ၵူၺ်းၶႃႈယဝ်ႉ။ ထႅင်ႈၾၢႆႇၼိုင်ႈၵေႃႈ တေႃႈလဵဝ် ႁူင်းႁဵၼ်းတၢင်းမိူင်းထႆးၵေႃႈ တေပိုတ်ႇလိူၼ်ၼႃႈယဝ်ႉ၊ လွင်ႈၼႆႉ လုၵ်ႈဢွၼ်ႇဢၼ်မီးယူႇတၢင်းတႃႈၶီႈလဵၵ်းသေ ၵႂႃႇၶိုၼ်ႈႁဵၼ်းတၢင်းမိူင်းထႆးၼၼ်ႉ တေႁဵတ်းႁိုဝ်ၵႂႃႇၶိုၼ်ႈႁူင်းႁဵၼ်းၵၼ်ၶႃႈယဝ်ႉ သင်ပိၵ်ႉၶူဝ် ၸိူဝ်းၼႆႉ” ဝႃႈၼႆ။

ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ လုၵ်ႈဢွၼ်ႇ ၸိူဝ်းၵႂႃႇၶိုၼ်ႈႁူင်းႁဵၼ်း တၢင်းၾင်ႇမိူင်းထႆး မႄႈသၢႆၼၼ်ႉ မီးတင်းၼမ်။ ပေႃးထိုင်မႃးလိူၼ်ၵျူႊလၢႆႊၼႆႉ တၢင်းၾင်ႇမိူင်းထႆး၊ မိူင်းႁူမ်ႈတုမ်ၵေႃႈ တေပိုတ်ႇႁူင်းႁဵၼ်းယဝ်ႉလႄႈ သင်ႇ ဢမ်ႇပိုတ်ႇ ၽၵ်းတူလႅၼ်လိၼ် လုၵ်ႈႁဵၼ်း တေ ႁူပ်ႉတၢင်းယၢပ်ႇ။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “လွင်ႈတေပိုတ်ႇၶူဝ်ၼႆႉ တေပိုတ်ႇမိူဝ်ႈလႂ် ဢၼ်ဝႃႈၼၼ်ႉ ပႆႇလႆႈႁူႉၶႃႈ။ လႆႈငိၼ်းဝႃႈ တၢင်းၾၢႆႇၸဝ်ႈၼႃႈတီႈ တၢင်းမိူင်းမၢၼ်ႈလႄႈ မိူင်းထႆးၵေႃႈ တိုၵ်ႉငူပ်ႉငီႉၵၼ်ယူႇ လွင်ႈတေပိုတ်ႇၶူဝ်ၼႆႉ။ ယွၼ်ႉဝႃႈ လိူၼ်ၵျူႊလၢႆႊ လိူၼ်ၼႃႈၼႆႉသမ်ႉ ႁူင်းႁဵၼ်းတၢင်းၾင်ႇမိူင်းထႆး ၵေႃႈ တေပိုတ်ႇယဝ်ႉလႄႈ လုၵ်ႈဢွၼ်ႇဢၼ်ယူႇတၢင်းၾင်ႇတႃႈၶီႈလဵၵ်း ၸိူဝ်းၶိုၼ်ႈႁူင်းႁဵၼ်းတၢင်းမိူင်းထႆးဝႆႉၸိူဝ်းၼၼ်ႉ သင်ဝႃႈ ပိၵ်ႉၶူဝ်ဝႆႉၸိူင်ႉၼႆ တေႁဵတ်းႁိုဝ်ၵႂႃႇႁူင်းႁဵၼ်းၵၼ် သင်ဝႃႈဢမ်ႇပိုတ်ႇၶူဝ်” ဝႃႈၼႆ။

ပိူဝ်ႈတႃႇၵုမ်းၵမ်တၢင်းပဵၼ်ၶူဝ်ႊဝိတ်ႉ – 19 ၼင်ႇႁိုဝ် ပေႃးတေဢမ်ႇလၢမ်းၽႄႈႁၢဝ်ႈႁႅင်း ၼၼ်ႉ ယူႇတီႈလူင်ပွင်ၸိုင်ႈထႆး ၸီႉသင်ႇႁႂ်ႈပိၵ်ႉဢိုတ်း ၽၵ်းတူၶဝ်ႈဢွၵ်ႇၸွမ်းလႅၼ်လိၼ်ၵူႈတီႈတီႈ ၸဵမ်ၽၵ်းတူၶဝ်ႈဢွၵ်ႇ ပဵၼ်တၢင်းၵၢၼ် ဢမ်ႇပဵၼ် တၢင်းၵၢၼ်။ ၼႂ်းၼၼ်ႉ ပႃးၸဵမ် ၶူဝ်လႅၼ်လိၼ်တႆး – ထႆး (မႄႈသၢႆ – တႃႈၶီႈလဵၵ်း) ။

ၸၢႆးၼုမ်ႇတုၺ်ႈ သိုပ်ႇလၢတ်ႈဝႃႈ “ဢၼ်မိူင်းထႆး သင်ႇပိၵ်ႉဢိုတ်းၶူဝ် မႄႈသၢႆ – တႃႈၶီႈလဵၵ်းၼႆႉ ၶဝ်သင်ႇပိၵ်ႉဢိုတ်းၵူၼ်းၶဝ်ႈဢွၵ်ႇၵႂႃႇမႃး ဢၼ်လဵဝ်ၵူၺ်း၊ လွင်ႈၶူဝ်းၵုၼ်ႇၶဝ်ႈဢွၵ်ႇ တီႈၶူဝ်မၢႆ 2 ၼၼ်ႉတႄႉ တိုၵ်ႉၶဝ်ႈဢွၵ်ႇ ၵႂႃႇမႃး မိူၼ်ၵဝ်ႇယူႇ” ဝႃႈၼႆ။

ၾၢႆႇၼိုင်ႈတၢင်းၼိုင်ႈ ၽၵ်းတူၸွမ်းလႅၼ်တႆး – ၶႄႇ ပဵၼ်တၢင်းၵၢၼ် ဢမ်ႇပဵၼ်တၢင်းၵၢၼ်တင်းမူတ်း၊ ၼႂ်းၼႆႉပႃးၸဵမ် ၽၵ်းတူႁေႃၶမ်းလူင်၊ မၢၼ်ႈဝဵင်းလႄႈ ၸၢင်ႉၽိူၵ်ႇ ၼႂ်းၸႄႈဝဵင်းမူႇၸေႊ ၸိူဝ်းၼၼ်ႉၵေႃႈ ယူႇတီႈလူင်ပွင်ၸိုင်ႈမိူင်းၶႄႇ ၸီႉသင်ႇပိၵ်ႉဢိုတ်း ႁၢမ်ႈၵူၼ်းၶဝ်ႈဢွၵ်ႇၵႂႃႇမႃး ၵူႈႁူးၵူႈတၢင်း၊ တင်ႈတႄႇဢဝ် ဝၼ်းတီႈ 1/4/2020 မႃးတေႃႇထိုင် ယၢမ်းလဵဝ် ပႆႇပိုတ်ႇ။ ၵူၼ်းမိူင်းၸိူဝ်းယူႇၸွမ်းလႅၼ်လိၼ်တႆး – ၶႄႇ ၸိူဝ်းၼၼ်ႉၵေႃႈ ထူပ်းတၢင်းယၢပ်ႇၽိုတ်ႇမိူၼ်ၵၼ်။