လူင်ပွင်ၸိုင်ႈ ပိုၼ်ၽၢဝ်ႇယိုတ်ႈၶၢဝ်းယၢမ်း ၵုမ်းၵမ်ၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ထိုင်လိူၼ်ၵျုၼ်ႊၼႆႉသဵင်ႈ ၊ ၼင်ႇႁိုဝ် တၢင်းပဵၼ် ပေႃးတေဢမ်ႇလၢမ်ႈၽႄႈ ႁၢဝ်ႈႁႅင်းဝႃႈၼႆ။

လိၵ်ႈပိုၼ်ၽၢဝ်ႇ ယိုတ်ႈၶၢဝ်းယၢမ်း ထိုင်လိူၼ်ၵျုၼ်ႊသဵင်ႈဝၼ်းတီႈ 12/6/2020 ယူႇတီႈငဝ်ႈငုၼ်း ၶွမ်ႊမတီႊၸၼ်ႉၸိူဝ်ႉၸၢတ်ႈ ၾၢႆႇၵုမ်းၵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ဢွၵ်ႇလိၵ်ႈပိုၼ်ၽၢဝ်ႇ ပၼ်ၾၢင်ႉထိုင်ၵူၼ်းမိူင်း၊ ပိူဝ်ႈတႃႇၵုမ်းၵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉ ပေႃးတေဢမ်ႇသိုပ်ႇ လၢမ်းၽႄႈႁၢဝ်ႈႁႅင်းၼၼ်ႉ တေယိုတ်ႈၶၢဝ်းယၢမ်းတေႃႇထိုင် ဝၼ်းတီႈ 30/6/2020 ၼႆႉ -ၼႆယဝ်ႉ။

မိူဝ်ႈတႄႇမၼ်း ယူႇတီႈငဝ်ႈငုၼ်းၶွမ်ႊမတီႊၸၼ်ႉၸိူဝ်ႉၸၢတ်ႈ ၾၢႆႇၵုမ်းၵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ပိုၼ်ၽၢဝ်ႇဝႆႉတေႃႇထိုင်ဝၼ်းတီႈ 15/6/2020 ၼႆႉၵူၺ်း။ ၵူၺ်းၵႃႈ ထိုင်မႃးဝၼ်းတီႈ 12 ၼႆႉ သိုပ်ႇပိုၼ်ၽၢဝ်ႇ ယိုတ်ႈၶၢဝ်းယၢမ်းၵႂႃႇ ထႅင်ႈ ဝႃႈၼႆ။

လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ပိူဝ်ႈတႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆသေ လူင်ပွင်ၸိုင်ႈၶဝ် ယိုတ်ႈၶၢဝ်းယၢမ်းၵႂႃႇထႅင်ႈၼႆႉ ႁဝ်းၶႃႈၵူၼ်းမိူင်းၵေႃႈ ႁၼ်လီၸွမ်းယူႇ၊ ၵူၺ်းၵႃႈ ၵူၼ်းမိူင်းႁဝ်းၶႃႈ တေႁဵတ်းၵၢၼ်ၵႂႃႇၼႆႉ မၼ်းတိူဝ်းယၢပ်ႇမႃးထႅင်ႈၶႃႈ။ တေႁဵတ်းၵၢၼ်သင် တေႁဵတ်းပၢင်သင်ၵေႃႈ မၼ်းဢမ်ႇပဵၼ်ၵၢၼ် ဢမ်ႇၸၢင်ႈႁဵတ်းသင် တုမ်ႉတိူဝ်ႉၵၢၼ်သိုဝ်ႉၵၢၼ်ၶၢႆ ၵူၼ်းႁဵတ်းၵၢၼ်ၶႃႈယဝ်ႉ ပေႃးယိုတ်ႈၶၢဝ်းယၢမ်း ၵႂႃႇထႅင်ႈတိၵ်းတိၵ်းတႄႉ” ဝႃႈၼႆ။

ၵၢၼ်ယိုတ်ႈၶၢဝ်းယၢမ်း တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ -19 ၼႆႉ ယိုတ်ႈထိုင်လိူၼ်ၵျုၼ်ႊၼႆႉသဵင်ႈၵူၺ်းဢမ်ႇၵႃး လွင်ႈပၵ်းပိူင်မၢႆမီႈဢၼ်တမ်းဝၢင်းပၼ်ဝႆႉ တင်းမူတ်းၼၼ်ႉၵေႃႈ ဢမ်ႇယွၼ်ႇယၢၼ်းပၼ်သင် ဝႆႉမိူၼ်ပၵ်းၵဝ်ႇပိူင်ၵဝ်ႇ မူတ်းမူတ်းၵူၺ်း ဝႃႈၼႆ။

ၼႂ်းပၵ်းပိူင်မၢႆမီႈဢၼ်ၵူၼ်းမိူင်း တၵ်းလႆႈႁဵတ်းၸွမ်းၼၼ်ႉသမ်ႉ တေဢမ်ႇလႆႈၶွၼ်ႈတုမ်ၵူၼ်းၼမ်၊ တေဢမ်ႇလႆႈၸတ်းႁဵတ်းပွႆး လၢမ်းသင်၊ ယဝ်ႉၵေႃႈ သင်ဝႃႈဢွၵ်ႇတၢင်းၼွၵ်ႈၼႆ တေလႆႈသႂ်ႇၽႃႈတူမ်းသူပ်း (Mask) ၸဵမ်ၸိူဝ်းၼႆႉ။

တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်းမီး 261 ၵေႃႉ။ လူႉတၢႆ 6 ၵေႃႉ၊ ယူတ်းယႃ 90 ၵေႃႉလႄႈ ယႃၶႅၼ်း 165 ၵေႃႉ ယူႇတီႈႁွင်ႈၵၢၼ်ပၢႆးယူႇလီ ပိုၼ်ၽၢဝ်ႇဢွၵ်ႇဝႆႉ။