လူင်ပွင်ၸိုင်ႈမိူင်းတႆး ပိုၼ်ၽၢဝ်ႇ ႁႂ်ႈ ရူတ်ႉႁပ်ႉၸၢင်ႈ လူတ်းယွမ်းတၢင်ႇၵူၼ်း ႞ ၶိုင်ႈ သေဢမ်ႇၵႃးႁႂ်ႈၶိုၼ်ႈၵႃႈၵႃး 2 ပုၼ်ႈ ဝႃႈၼႆ။
ဝၼ်းတီႈ 28/3/2020 ၼႆႉ ယူႇတီႈလူင်ပွင်ၸိုင်ႈမိူင်းတႆး ဢွၵ်ႇလိၵ်ႈပိုၼ်ၽၢဝ်ႇဝႃႈ သၢႆရူတ်ႉၵႃး ဢၼ်လႅၼ်ႈတၢင်း ၼႂ်း မိူင်းတႆးတင်းမူတ်း ႁႂ်ႈလူတ်းယွမ်းတၢင်ႇၵူၼ်းသေ ႁႂ်ႈၵဵပ်းၵႃႈၵႃး ၶိုၼ်ႈ 2 ပုၼ်ႈ ၊ တႃႇလူတ်းယွမ်းၵူၼ်းၵႂႃႇမႃး ၼိူဝ်သဵၼ်ႈတၢင်းလႄႈ တႃႇလူတ်းပၼ် ႁႃတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈတိတ်းၸပ်းၵၼ် ဝႃႈၼႆ။
ၸၢႆးၶိူဝ်းႁၢၼ် ၵူၼ်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ပေႃးပဵၼ်ၼႆ ၵူၼ်းမိူင်းႁဝ်းၶႃႈ တေယၢပ်ႇၽိုတ်ႇ လွင်ႈဢွၵ်ႇတႃႈဢွၵ်ႇတၢင်း ။ ပိူင်တႅၵ်ႈမၼ်း ၵႃႈၵႃး ၼိုင်ႈၵေႃႉ ပႅတ်ႇႁဵင်ၼႆ မၼ်းတေၶိုၼ်ႈပဵၼ် 2 ပုၼ်ႈၵေႃႈ တေပဵၼ် ၼိုင်ႈၵေႃႉ ၼိုင်ႈမိုၼ်ႇ ႁူၵ်းႁဵင်ပျႃးယဝ်ႉ တေလႆႈၸၢႆႇသွင်ပုၼ်ႈ ၼႆၶႃႈလူး”ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇလူင်ပွင်ၸိုင်ႈၼၼ်ႉ ဢွၵ်ႇဝႆႉဝႃႈ “ယွၼ်ႉတၢင်းပဵၼ်ၶူဝ်ႊဝိတ်ႉ ပဵၼ်ဢၼ်တိတ်းၸပ်းၵၼ်ငၢႆႈ၊ လွင်ႈယႂ်ႇမၼ်း တီႈၵူၼ်းၵိုၼ်းၶွၼ်ႈ ယွၼ်ႉၼၼ် တႃႇတေႁေႉၵင်ႈႁႂ်ႈ လူတ်းယွမ်းလႆႈတၢင်းပဵၼ်ဢၼ်ၼႆႉၼၼ်ႉ ယူႇ တီႈ ၸဝ်ႈရူတ်ႉၵႃးၶဝ် ဢၼ်ႁပ်ႉၵူၼ်းလႅၼ်ႈၼႂ်းမိူင်းတႆး ႁႂ်ႈယွမ်းတၢင်ႇၵူၼ်းဢေႇလိူဝ် ဢၼ်ယၢမ်ႈတၢင်ႇမႃးၸိူဝ်း ၼၼ်ႉ ၼိုင်ႈၶိုင်ႈၼႆသေ ၵႃႈၵႃးၵေႃႈ ႁႂ်ႈလႆႈဢဝ်ၼိုင်ႈၵေႃႉလႂ်ႈ 2 ပုၼ်ႈၵႂႃႇ” ဝႃႈၼႆ။
ၸဝ်ႈၵႃး ႁပ်ႉၸၢင်ႈတၢင်ႇၵူၼ်း ၶျႄႇရီႇမေႇ လၢတ်ႈတီႈၽူႈတွႆႇႁွၵ်ႈဝႃႈ “ ၵႃးႁဝ်းၶႃႈၼႆႉ မိူဝ်ႈၵူႈပွၵ်ႈ ပေႃးႁဝ်းတၢင်ႇ 12 ၵေႃႉၼႆ တေလႆႈလူတ်းၼိုင်ႈၶိုင်ႈၼၼ်ႉၼႃႇတေပဵၼ်ၵႂႃႇ 6 ၵေႃႉၵူၺ်းဢေႃႈ ၶဝ်တႅပ်းတတ်း ပၼ်။ ယွၼ်ႉဢမ်ႇၶႂ်ႈႁႂ်ႈပၼ်ၵူၼ်း တုမ်ၵၼ်ၼၼ်ႉၶႃႈယဝ်ႉ။ ၶဝ်ႁႂ်ႈဢဝ် သွင်ပုၼ်ႈၼႆသေတႃႉ ႁဝ်းၶႃႈ ၵႃႈလႆႈတူၺ်းသေၵဵပ်းဢေႃႈ မၢင်ၵေႃႉ ယၢပ်ႇၵိၼ်းၶၢၼ်ၸႂ်တႄႉၼႆၵေႃႈ လူတ်းယွမ်းပၼ်ၼၼ်ႉၶႃႈၼႃႇ။ ” ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 29/3/2020 ၼၼ်ႉၵေႃႈ ယူႇတီႈၸဝ်ႈလႅင်းၵႃး မၢင်ပိုၼ်ႉတီႈ ၼႂ်းမိူင်းႁူမ်ႈတုမ် ဢွၵ်ႇၶေႃႈပိုၼ် ၽၢဝ်ႇဝႃႈ ၵႃးလူင်ၼိုင်ႈလမ်း တေလႆႈတၢင်ႇၵူၼ်းပႃႈတႂ်ႈ 20 ၵေႃႉ။ သင်ဝႃႈ တၢင်ႇပူၼ်ႉလိူဝ်ၸိုင် တေဢဝ် လိူင်ႈ ဝႃႈၼႆ။
လိူဝ်ၼၼ်ႉ တေပၼ်ၶႂၢင်ႉႁႂ်ႈလႅၼ်ႈတေႃႇထိုင် ဝၼ်းတီႈ 1 လိူၼ်ဢေႊပရိူဝ်ႊပဵၼ်ဝၼ်းလိုၼ်းသုတ်းသေ ပေႃးထိုင် ဝၼ်းတီႈ 20 လိူၼ်ဢေႊပရိူဝ်ႊမႃး တေတူၺ်းငဝ်းလၢႆးသၢႆငၢႆသေ ၸင်ႇပိုတ်ႇလႅၼ်ႈၶိုၼ်း ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ် ၵူၼ်းၸပ်းတၢင်းပဵၼ် မီးယူႇ 13 ၵေႃႉ။ တၢႆ 1 ၵေႃႉ ႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈ ႁႅင်း ပိုၼ်ၽၢဝ်ႇဢွၵ်ႇဝႆႉ။
ယူႇတီႈႁွင်ႈၵၢၼ်ပၢႆးယူႇလီ လုမ်ႈၾႃႉ worldometers ဢွၵ်ႇဝႆႉဝႃႈ ယၢမ်းလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တင်းလုမ်ႈၾႃႉ မီး 799,677 ၵေႃႉ၊ တၢႆ 38,720 ၵေႃႉ။
