ႁၢၼ်ႉၶၢႆၶဝ်ႈၽၵ်းလႄႈ ႁၢၼ်ႉၶၢႆၶူဝ်းၶွင် ၼႂ်းမိူင်းတႆး ဢၼ်လႆႈၸီႉသင်ႇပိၵ်ႉဢိုတ်းဝႆႉ ၽွင်းတၢင်းပဵၼ်ၶူဝ်ႊဝိတ်ႉ – 19 ၽႄႈလၢမ်းဝႆႉၸိူဝ်းၼၼ်ႉ လူင်ပွင်ၸိုင်ႈတေပၼ်ပိုတ်ႇၶိုၼ်း တင်ႈဢဝ် ဝၼ်းတီႈ 1/6/2020 ၼႆႉၵႂႃႇ ပၼ်ၶႂၢင်ႉပိုတ်ႇၶိုၼ်း ယဝ်ႉ ဝႃႈၼႆ။

ဝၼ်းတီႈ 26/5/2020 ပၢင်ၵုမ်လူင်ပွင်ၸိုင်ႈၸႄႈမိူင်းတႆး ဢုပ်ႇဢူဝ်းတႅပ်းတတ်းတူၵ်းလူင်းၵၼ်ဝႃႈ တႄႇဢဝ် ဝၼ်းတီႈ 1/6/2020 ၼႆႉၵႂႃႇ ပၼ်ၶႂၢင်ႉပိုတ်ႇႁၢၼ်ႉၶၢႆၶူဝ်းၶွင်လႄႈ ႁၢၼ်ႉၶဝ်ႈၽၵ်း ဢၼ်လႆႈၸီႉသင်ႇပိၵ်ႉဢိုတ်းဝႆႉ ၽွင်းတၢင်း ပဵၼ်ၶူဝ်ႊဝိတ်ႉ – 19 လၢမ်ႈၽႄႈႁၢဝ်ႈႁႅင်းၼၼ်ႉ၊ ႁၢၼ်ႉတၢင်းၶၢႆၸိူဝ်ႉၼႆႉ တေလႆႈႁဵတ်းၸွမ်းပၵ်းပိူင် ဢၼ်တမ်း ဝၢင်းဝႆႉပၼ်ၼၼ်ႉ ပိူင်ဢၼ်တမ်းပၼ် ဝႃႈၼႆ။

ဢူးၸေႃႇဝိၼ်း ၽူႈၶဝ်ႈၸုမ်းၶွမ်ႊမတီႊၾၢႆႇလိူမ်ႈလႆႇ ၸႄႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “တေႃႈလဵဝ် တိုၵ်ႉႁၢင်ႈႁႅၼ်း တႃႇတေပိုတ်ႇၼႂ်းဝၼ်းတီႈ 1 လိူၼ်ၼႃႈၼႆႉယူႇ။ မိူၼ်ၼင်ႇ ႁၢၼ်ႉၶၢႆၶဝ်ႈၽၵ်းၸိူဝ်းၼႆႉ မိူဝ်ႈၵူႈပွၵ်ႈ တင်းမူတ်းမီးၶူင်ႇၼင်ႈ 10 ၶူင်ႇၼႆ တေပၼ်ၶၢႆ တႃႇ 5 ၶူင်ႇ။ ပေႃးႁၢၼ်ႉၶၢႆၶူဝ်းမီး 500 ႁွင်ႈၼႆ တေပၼ်ႇပုတ်ႈၵၼ်ၶၢႆၵမ်း 250 ႁွင်ႈ” ဝႃႈၼႆ။

ၵၢတ်ႇလူင်ဝဵင်းတူၼ်ႈတီးၼႆႉ တေပိုတ်ႇပၼ်ၶၢႆၵႂႃႇ တႄႇဢဝ် ယၢမ်းၵၢင်ဝၼ်း 10 မူင်း ထိုင် ဝၢႆးဝၼ်း 2 မူင်း ဝႃႈၼႆ။

တွၼ်ႈတႃႇ တေပိုတ်ႇႁူင်းႁႅမ်း/ ႁူင်းလိုဝ်ႈသဝ်း ၸိူဝ်းၼႆႉတႄႉ တေယူႇတီႈ ႁွင်ႈၵၢၼ်ၾၢႆႇလိူမ်ႈလႆႇ၊ ႁွင်ႈၵၢၼ် တွင်ႈတဵဝ်းလႄႈ ႁူင်းႁႅမ်း တေႁူမ်ႈၵၼ် ၵူတ်ႇထတ်း တူၺ်းငဝ်းလၢႆး သေ တေပၼ် ပိုတ်ႇပၼ်ႇၵၢၼ်ၵႂႃႇ ဝႃႈၼႆ။

“တေႃႈလဵဝ် ႁဝ်းၶႃႈ ႁၢင်ႈႁႅၼ်းဝႆႉတႃႇတေပိုတ်ႇႁူင်းႁႅမ်းၶႃႈယဝ်ႉ။ သင်ဝႃႈပိုတ်ႇၼႆ တေလႆႈၵိုင်ႇငၢမ်ႇၸွမ်း မၢႆမီႈ 27 ၶေႃႈၼၼ်ႉ။ ပိူင်တႅၵ်ႈမၼ်း မိူၼ်ၼင်ႇၼႂ်းႁူင်းၼွၼ်းၸိူဝ်းၼႆႉ ၸွင်ႇသိတ်းယႃႈၶႃႈမူင်းမႅင်းႁႃႉ၊ ယဝ်ႉၵေႃႈ သင်ဝႃႈ တၢင်းၾၢႆႇႁဝ်း ႁၢင်ႈႁႅၼ်းၽွမ်ႉယဝ်ႉၼႆ ယူႇတီႈ ၸဝ်ႈၼႃႈတီႈ ၾၢႆႇႁွင်ႈၵၢၼ်တွင်ႈတဵဝ်းဢႅဝ်ႇယဵမ်ႈ လႄႈႁူင်းႁႅမ်း ၶဝ်တေမႃးၵူတ်ႇထတ်းတူၺ်း၊ ၸွင်ႇၵိုင်ႇငၢမ်ႇၸွမ်း မၢႆမီႈ ဢၼ်ၶဝ်တမ်းဝၢင်းပၼ်ဝႆႉၸိူဝ်းၼၼ်ႉ” ၸဝ်ႈၶွင်ႁူင်းႁႅမ်း တီႈတူၼ်ႈတီး ၵေႃႉၼိုင်ႈ လၢတ်ႈၼႄ ၼင်ႇၼႆ။

လိူဝ်ၼၼ်ႉ တွၼ်ႈတႃႇ တီႈၵျေႃႇသိူဝ်း/ႁွင်ႉၽဵင်းၵႂၢမ်း KTV , Night Club ၸိူဝ်းၼႆႉတႄႉ ပႆႇပိုတ်ႇ ႁႂ်ႈပိၵ်ႉဢိုတ်းဝႆႉမိူၼ်ၵဝ်ႇ ဝႃႈၼႆ။

တွၼ်ႈတႃႇ ရူတ်ႉၵႃးႁပ်ႉၸၢင်ႈတေႃႉသူင်ႇၵူၼ်းၼၼ်ႉၵေႃႈ တေလႆႈႁဵတ်းၸွမ်းမၢႆမီႈ ၸွမ်းၼင်ႇၶေႃႈပိုၼ်ၽၢဝ်ႇဝႆႉ မိူဝ်ႈဢွၼ်ၼႃႈၼႆႉ၊ တေလႆႈတၢင်ႇၵူၼ်းၶီႇမၼ်း ၼိုင်ႈၶိုင်ႈၵူၺ်း(မိူၼ်ၼင်ႇ ၼိုင်ႈလမ်းၶီႇလႆႈ 10 ၵေႃႉၼႆ) တေလႆႈ လူတ်းယွမ်းၶိုင်ႈၼိုင်ႈ တေလႆႈၶႂၢင်ႉတၢင်ႇ တႃႇ 5 ၵေႃႉၵူၺ်း ၸင်ႇတေပၼ်ၶႂၢင်ႉႁပ်ႉတေႃႉသူင်ႇၵူၼ်းၵႂႃႇမႃးလႆႈ ဝႃႈၼႆ။