ၵူၼ်းတူၼ်ႈတီး ပွၵ်ႈမိူင်း UAE မႃးၵေႃႉၼိုင်ႈၼၼ်ႉ ၵူတ်ႇထတ်းထူပ်းႁၼ် တိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၼႆ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်းပိုၼ်ၽၢဝ်ႇဢွၵ်ႇဝႆႉ။
မိူဝ်ႈဝၼ်းတီႈ 19/5/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇမႃးဝႃႈ- ထူပ်းႁၼ်ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ထႅင်ႈ 2 ၵေႃႉ ၼႂ်းမိူင်းႁူမ်ႈတုမ်။ ၼႂ်း 2 ၵေႃႉၼၼ်ႉ ပႃးၵူၼ်းတူၼ်ႈတီး ၸိုင်ႈတႆးပွတ်းၸၢၼ်း ၵေႃႉၼိုင်ႈလႄႈ ၵူၼ်းတႃႈၵုင်ႈ ၵေႃႉၼိုင်ႈ ဝႃႈၼႆ။
ၵူၼ်းတူၼ်ႈတီး ၵေႃႉၸပ်းတၢင်းပဵၼ် ၵေႃႉထူၼ်ႈ 192 ၼႆႉ ပဵၼ်ၼၢင်းယိင်း ဢႃယု 34 ပီ၊ လုၵ်ႉမိူင်းႁူမ်ႈတုမ် ၸဝ်ႈၾႃႉဢႃႇရပ်ႉ (UAE- United Arab Emirates) သေပွၵ်ႈၶဝ်ႈမႃး ၼႂ်းမိူင်းႁူမ်ႈတုမ်၊ တေႃႈလဵဝ်ယူႇဝႆႉတီႈ ႁူင်းယႃဝူၺ်ႇပႃႇၵီႇ ၸႄႈဝဵင်းမဵဝ်ႉဢုၵ်ႉၵလႃႇ တိူင်းတႃႈၵုင်ႈဝႆႉ ဝႃႈၼႆ။
မိူင်းႁူမ်ႈတုမ်ပတ်းပိုၼ်ႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်းမီးၵႂႃႇ 193 ၵေႃႉ၊ လူႉတၢႆ 6 ၵေႃႉလႄႈ ယႃၶႅၼ်း 104 ၵေႃႉ ဝႃႈၼႆ။
