သိုၵ်းလူင်ပွင်ၸိုင်ႈမၢၼ်ႈ ၸႂ်ႉၵူၼ်းဝၢၼ်ႈတေႃႉသူင်ႇၶဝ်ႈၼမ်ႉတၢင်းၵိၼ် ပၼ်တီႈတပ်ႉပၢင်သဝ်းၶဝ် တီႈလွႆတွၼ်း ၼႂ်းၸႄႈဝဵင်းမိူင်းၵိုင်။

မိူဝ်ႈဝႃး 13/4/2020 ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်းလူင်ပွင်ၸိုင်ႈမၢၼ်ႈ ၸၵၶ 17 တဵၵ်းၶၢၼ်းၸႂ်ႉႁႅင်းလၢႆၵူၼ်းဝၢၼ်ႈ တၢင်ႇၶိူင်ႈၵိၼ်ယႅမ်ႉ ၶိုၼ်ႈသူင်ႇပၼ်ၶဝ်တီႈၼိူဝ်လွႆတွၼ်း ၼႂ်းၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း။

ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ “ တီႈမိူင်းၵိုင်ၼႆႉ ၵူၼ်းမိူင်းၼႂ်းပိုၼ်ႉတီႈ ႁိမ်းႁွမ်းလွႆတွၼ်း တိုၵ်ႉလႆႈၺႃးသိုၵ်းမၢၼ်ႈပူၼ်ႉပႅၼ်သုၼ်ႇလႆႈၵူၼ်း တဵၵ်းၸႂ်ႉႁႅင်းလၢႆယူႇ။ တဵၵ်းၶၢၼ်းရူတ်ႉ/ ၵႃး/ ထူဝ်ႈ ၵူၼ်းဝၢၼ်ႈ ႁႂ်ႈတေႃႉ ၶဝ်ႈၼမ်ႉတၢင်းၵိၼ် သူင်ႇပၼ်ၶဝ် ၼိူဝ်လွႆတွၼ်း ။ ၵူၼ်းမိူင်းႁၢမ်းၵၢၼ် ႁၢမ်းငၢၼ်းယွၼ်ႉၶဝ်။ လိူဝ်ၼၼ်ႉ လႆႈလွမ်ၵူဝ်သိုၵ်းမၢၼ်ႈပႃးထႅင်ႈ” ဝႃႈၼႆ။

ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉဝႃႈ “ မိူဝ်ႈဝၼ်းတီႈ 05/04/2020 ၶၢဝ်းယၢမ်း 7:30 မူင်းၵၢင်ၼႂ်ၼၼ်ႉ တပ်ႉသိုၵ်းမၢၼ်ႈ တႂ်ႈ ၸၵၶ (17) ႁႅင်း သိုၵ်း 50 ၵေႃႉ ၶီႇၵႃး 4 လမ်း လႄႈၵႃးတၢင်ႇသၢႆး 1 လမ်း တၢင်ႇၶဝ်ႈ ၼမ်ႉတၢင်းၵိၼ် (ယဵၵ်ႉၶႃႇ) လုၵ်ႉတၢင်းဝဵင်းၵေးသီးမႃး ၶဝ်ႈမႃးတၢင်းဝၢၼ်ႈလူင်ၸၢမ်ဢိူင်ႇႁူဝ်ၶၢႆး ၸႄႈဝဵင်းမိူင်းၵိုင်။

လိူဝ်ၼၼ်ႉ တပ်ႉသိုၵ်းမၢၼ်ႈသိုပ်ႇၶၢၼ်းရူတ်ႉၵႃးၵူၼ်းဝၢၼ်ႈ ဝၢၼ်ႈလူင်ၸၢမ်ထႅင်ႈ 6 လမ်း တၢင်ႇၶူဝ်း ၵိၼ်ယႅမ်ႉၶဝ် ၶိုၼ်ႈလွႆတွၼ်း မိူဝ်ႈၶၢဝ်းယၢမ်း 10:30 မူင်းၵၢင်ၼႂ် ။ လုင်းၼေႇ၊ လုင်းၼၼ်ႇတႃႇ၊ လုင်းထေး၊ လုင်းယၼ်ႇၼႃႉ၊ လုင်းၵုင်ႇတရ လႄႈလုင်းဢေႃး ၵူၼ်းဝၢၼ်ႈလူင်ၸၢမ် လႆႈတေႃႉၶူဝ်းတပ်ႉသိုၵ်းသႂ်ႇရူတ်ႉသႂ်ႇထူဝ်ႈၶဝ်သေ ႁေႃႈၶိုၼ်ႈ သူင်ႇပၼ်ၼိူဝ်လွႆတွၼ်း”- ဝႃၼႆ။

မိူဝ်ႈႁၢင်လိူၼ် ၾႅပ်ႊၿိဝ်ႊရီႊ တပ်ႉသိုၵ်းလူင်ပွင်ၸိုင်ႈမၢၼ်ႈၶိုၼ်ႈယိုဝ်းတပ်ႉပၢင်သဝ်းသိုၵ်းတႆး RCSS/SSA တီႈၼိူဝ်လွႆတွၼ်း။ ပဵၼ်ပၢင်တိုၵ်း ထပ်းၵၼ်လၢႆဝၼ်း။ ၵူၼ်းဝၢၼ်ႈၵူၼ်းမိူင်း လႆႈပၢႆႈၽေးသိုၵ်းၼပ်ႉႁူဝ်ပၢၵ်ႇ။ တပ်ႉသိုၵ်းမၢၼ်ႈ ၶိုၼ်ႈယူႇတႅၼ်းတီႈပၢင်သဝ်းသိုၵ်းတႆးသေ ၶၢၼ်းမႆႉၶၢၼ်းတွၵ်ႇ/ တွင် တီႈၵူၼ်းဝၢၼ်ႈယူႇထုင်ႉလွႆတွၼ်းၼၼ်ႉမႃးဢမ်ႇ ထၢတ်ႇ တေႃႇထိုင်ဝၼ်းမိူဝ်ႈၼႆႉ။