ဝၼ်းလိူၼ်သီႇမူၼ်းပူၼ်ႉမႃးၼႆႉ ပဵၼ်ဝၼ်းၸိူဝ်ႉၸၢတ်ႈပဢူဝ်းၶွပ်ႈတဵမ် 71 ပီ ၊ ၼႂ်းဝၼ်းၼၼ်ႉ ၽူႈၼမ်းပဢူဝ်းမွၵ်ႇလၢတ်ႈဝႃႈ တေၶတ်းၸႂ်ႁႂ်ႈၵေႃႇတင်ႈလႆႈ ၸႄႈမိူင်းႁင်းၶေႃၵႂႃႇဝႃႈၼႆ။
ၸဝ်ႈသိုၵ်းလူင်ၶုၼ်ႇဢူၵ်ႉၵႃႇ ၽူႈၵိူဝ်းၵုမ် ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း PNLO လၢတ်ႈမိူဝ်ႈဝၼ်းတီႈ 8/3/2020 ဝၼ်းလိူၼ်သီႇမူၼ်း ၼၼ်ႉဝႃႈ – တႃႇၵေႃႇတင်ႈမိူင်းႁူမ်ႈတုမ်ၾႅတ်ႇတရႄႊလႄႈ တႃႇတေမီးမႃးၸႄႈမိူင်းပဢူဝ်း ႁင်းၶေႃ ယူႇၵိုၵ်းမိူင်းႁူမ်ႈတုမ်ၵႂႃႇ၊ ပေႃးမီးသုၼ်ႇလႆႈပူၵ်းတင်ႈ ၸႄႈမိူင်းမႂ်ႇၸိုင် ပီႈၼွင်ႉ ဝႃႉ၊ ပလွင်ႈ ၊ပဢူဝ်း တေၸၢင်ႈမီးတိုဝ်ႉတၢင်း တႃႇတေမီးၸႄႈမိူင်းႁင်းၶေႃလႆႈယူႇ – ဝႃႈၼႆ။
ၵဵဝ်ႇၵပ်းလွင်ႈၼႆႉသေ ၸၢႆးလဵၵ်ႉၽူႈၶၢၼ်ပၢၵ်ႇ ပႃႇတီႇႁူဝ်သိူဝ် SNLD လၢတ်ႈဝႃႈ – “ပေႃးၶႂ်ႈယွၼ်း တႄႉတႄႉ လူဝ်ႇလႆႈတူၺ်း ၵႃႇလ ၻေႇသ လီလီၵွၼ်ႇ။ ပိူင်လူင်လမ်ႇလွင်ႈသုတ်းတႄႉ လူဝ်ႇလႆႈတူၺ်းၶိုၼ်း ပိုၼ်းၶိူဝ်း ၸဝ်ႈၵဝ်ႇလီလီ ။ ပေႃးမီးဢဵၼ်ႁႅင်းမႃးဢိတ်းဢွတ်းၵေႃႈၵုမ်ႇၶႂ်ႈ ယွၼ်းမိူင်း ၊ ယွၼ်းၼႃႈတီႈၽွင်းငမ်းတူဝ်ၵဝ်ႇ ။ ၸိူဝ်းၶႂ်ႈဢဝ်ၼမ်ႉတွၼ်းၵၢၼ်မိူင်း သမ်ႉ ႁဵတ်းၵႅင်ႈဢမ်ႇႁူႉ သေပွႆႇဝႆႉ၊ ပေႃးတုမ်ႉတိူဝ်ႉ ဢတ်ႉတ ၵၢၼ်မိူင်းၶဝ်မႃးသမ်ႉ ၸႂ်ႉဢဵၼ်ႁႅင်းတိုၵ်းတေႃးၽဵဝ်ႈမူၺ်ႉၼႆတိၵ်းတိၵ်းတႄႉ လွင်ႈငမ်းယဵၼ်ဢၼ်ဝႃႈၼၼ်ႉၵေႃႈ တေႁၢင်ႇယၢၼ်ၵႆၵႂႃႇတိၵ်းတိၵ်းၵူၺ်းယဝ်ႉ ” – ဝႃႈၼႆ။
ၶုၼ်ႇဢူၵ်ႉၵႃႇ လၢတ်ႈတီႈၶၢဝ်ႇ 7 Day ဝႃႈ – “တႃႇႁဝ်းၶႃႈတေမီး ၸႄႊမိူင်းႁင်းၶေႃၼႆ မၼ်းၵေႃႈတေ ဢမ်ႇငၢႆႈၼင်ႇၵဝ်ႇ။ တၢင်းယၢပ်ႇၽိုတ်ႇတႄႉ တေပဵၼ်မိူၼ်ၼင်ႇ – ၵူၼ်းၶိူဝ်းၸိူဝ်းယူႇၵိုၵ်းၵပ်းမိူင်းမႃးသေ ဢၼ်ၶဝ်ဝႃႈၶဝ်ပဵၼ်ၸဝ်ႈၶွင်ၸႄႊမိူင်း၊ ဢၼ်ဢဝ်ၸိုဝ်ႈၶိူဝ်းၶဝ်တင်ႈဝႆႉၸိုဝ်ႈၸႄႊမိူင်းၼၼ်ႉ ၶႃႈၼေႃႈ။ ၵူၺ်းၵႃႈ ပေႃးၶဝ်မီးပိုၼ်ႉႁူႉ ၾႅတ်ႊတရႄႊမႃး ၶဝ်ၵေႃႈတေၸႂ်ၵႂၢင်ႈမႃးသေ ယိူင်းဢၢၼ်းႁဝ်းၶႃႈၵေႃႈၸၢင်ႈပဵၼ်မႃးလႆႈယူႇ။ ၸိုင်ႈမိူင်းၾႅတ်ႇတရႄႊဢၼ်ဝႃႈၼႆႉ လႆႈဢဝ်လွင်ႈၸႂ်ယႂ်ႇၸႂ်ၵႂၢင်ႈၸိူင်ႉၼႆသေ ၵေႃႇတင်ႈမႃးလွၼ်ႉလွၼ်ႉ ”-ဝႃႈၼႆ။
ဝၢႆးဢဝ်ၵွၼ်းၶေႃႁူမ်ႈမၢၼ်ႈတူင်ႈပဵင်း တေႃႇပၢၼ်ၸဝ်ႈၾႃႉ ပွႆႇၽႃႈဢႃႇၼႃႇ- မိူင်းႁူမ်ႈတုမ် ၸိုင်ႈတႆးမီး 34 ၸႄႈမိူင်း၊ ပဢူဝ်း 2 ၸႄႈမိူင်း၊ ထၼူႉ 7 ၸႄႈမိူင်း၊ ပလွင်ႈ (တဢၢင်း) 1 ၸႄႈမိူင်း၊ ဝႃႉ ဢၼ်ၽွင်းငမ်းလူၺ်ႈ ၸဝ်ႈၾႃႉဢွၼ်ႇလၢႆလၢႆၸဝ်ႈႁူမ်ႈၵၼ်ၼၼ်ႉ 1 ၸႄႈမိူင်း၊ ၶႄႇၵူဝ်းၵၢင်ႉ 1 ၸႄႈမိူင်း၊ တႆးသမ်ႈ 22 ၸႄႈမိူင်း ၸိူဝ်းၼႆႉ ႁူမ်ႈၵၼ်ယူႇသဝ်းမႃး။
ဝၼ်းၸိူဝ်ႉၸၢတ်ႈပဢူဝ်းၼႆႉသမ်ႉ တႄႇမၵ်းမၼ်ႈ ၼႂ်းလုၵ်ႈလိူၼ်မၢတ်ႉ မိူဝ်ႈပီ 1948 ။ မၢႆဢဝ်ဝၼ်း ၶုၼ်ႁေႃၶမ်း သူႇရိယၸၼ်ႇတႃႇ ၽွင်းငမ်းမိူင်းသထူင်ႇ ၵိူတ်ႇဝၼ်းလိူၼ်သီႇမူၼ်း ၼၼ်ႉ သေမၵ်းမၼ်ႈမႃး။
ၽွင်းၼၼ်ႉ ၸၢဝ်းပဢူဝ်းႁူမ်ႈၵၼ်ၼႄၵၢင်ၸႂ် တုၵ်းယွၼ်း 3 ၶေႃႈ။ 1- ယႃႇႁႂ်ႈႁွင်ႉၶဝ်ဝႃႈ “တွင်ႇသူႇ” ႁႂ်ႈႁွင်ႉဝႃႈ “ပဢူဝ်း” ။ 2- ၽူႈတၢၼ်း ၽရထၢတ်ႈ သူၺ်ႇၸႃႇယၢၼ်ႇ သထူင်ႇၼၼ်ႉ ပဵၼ်ၶုၼ်ႁေႃၶမ်း သူႇရိယ ၸၼ်ႇတႃႇ ဢၼ်ဝႃႈပဵၼ်ၶုၼ်ပဢူဝ်း။ 3- ဢဝ်ဝၼ်းၵိူတ်ႇ ၶုၼ်ႁေႃၶမ်း သူႇရိယၸၼ်ႇတႃႇၵိူတ်ႇ ဝၼ်းလိူၼ်သီႇမူၼ်းၼၼ်ႉ မၢႆပဵၼ်ဝၼ်းၸိူဝ်ႉၸၢတ်ႈပဢူဝ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ