ပၢင်တွပ်ႇလိၵ်ႈၸၼ်ႉသိပ်းဢၼ်တေၸတ်းၼႂ်းဝၼ်းတီႈ 11 လိူၼ်မၢတ်ႉၶျ်ၼႆႉ ၼႂ်းၸေႈဝဵင်းမိူင်းၵိုင် ၵေးသီး တီႈဢၼ်ပဵၼ်ပၢင်တိုၵ်းယူႇၼၼ်ႉၵေႃႈ တိုၼ်းတေၸတ်းယူႇ ဢမ်ႇမီးလွင်ႈလႅၵ်ႈလၢႆႈၶၢႆႉသုတ်ႉဝၼ်း ဢူးဝိၼ်းမွင်ႇ ၽွင်းလူင်ၾၢႆႇပၢႆးပၺႃႇ လူင်ပွင်ၸိုင်ႈမိူင်းတႆးလၢတ်ႈ။
မၼ်းၸၢႆးလၢတ်ႈတီႈ ႁွင်ႈၵၢၼ်ၶၢဝ်ႇ မႅၼ်ႇမႃႇထၢႆးမ်ဝႃႈ- “ပၢင်တိုၵ်းဢမ်ႇလႆႈပဵၼ်ၵူႈတီႈလႄႈ ဢမ်ႇလႅၵ်ႈလၢႆႈဝၼ်းတွပ်ႇလိၵ်ႈၸၼ်ႉသိပ်း။ တေၸတ်းၵႂႃႇဝၼ်းတီႈ 11 ၼင်ႇလႆႈၶိုင်ပွင်ဝႆႉၼၼ်ႉၵူၺ်း။ မိူဝ်ႈပီႈၵၢႆၵေႃႈ ၽွင်းတေတွပ်ႇလိၵ်ႈၼၼ်ႉၼႂ်းမိူင်းတႆးလၢႆလၢႆတီႈ မီးပၢင်တိုၵ်း။ ၵူၺ်းဢမ်ႇလႆႈသုတ်ႉၶၢႆႉဝၼ်းတွပ်ႇလိၵ်ႈၼင်ႇၵဝ်ႇ ” -ဝႃႈၼႆ။
ၵူၺ်းၵႃႈ တီႈၼႂ်းၸေႊဝဵင်းမိူင်းၵိုင် ၵေးသီး မိူင်းၼွင် ၼႂ်းၸိုင်ႈတႆးပွတ်းၸၢၼ်းၼၼ်ႉ ပၢင်တိုၵ်းၼႂ်းၵႄႈတပ်ႉသိုၵ်းလူင်ပွင်ၸိုင်ႈလႄႈ RCSS ပဵၼ်ႁၢဝ်ႈႁႅင်း တင်ႈတႄႇဝၼ်းတီႈ 27/2/2020 မႃး။ ဝၼ်းမိူဝ်ႈၼႆႉပၢင်တိုၵ်းယဵၼ်ၵႂႃႇၽွင်ႈယဝ်ႉသေတႃႉ ၼႂ်းၵႄႈသွင်ၸုမ်းတိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ။
ၼႂ်းၸိုင်ႈတႆးပတ်းပိုၼ်ႉၼႆႉ မီးပၢင်တွပ်ႇလိၵ်ႈၸၼ်ႉသိပ်း 157 တီႈ။ မီးလုၵ်ႈႁဵၼ်းတေၶဝ်ႈတွပ်ႇလိၵ်ႈ 66499 ၵေႃႉ။ ၼႂ်းၸိုင်ႈတႆးပွတ်းၸၢၼ်း ပၢင်တွပ်ႇလိၵ်ႈ 100 တီႈမီးလုၵ်ႈႁဵၼ်းတွပ်ႇလိၵ်ႈ 41738 ၵေႃႉ၊ ပွတ်းႁွင်ႇ 40 တီႈ လုၵ်ႈႁဵၼ်း 19294 ၵေႃႉလႄႈ ပွတ်းဢွၵ်ႇမီး 17 တီႈ လုၵ်ႈႁဵၼ်းတေတွပ်ႇလိၵ်ႈမီး 5467 ၵေႃႉ။
ပၢင်တွပ်ႇလိၵ်ႈၸၼ်ႉ 10 ပီၼႆႉတေၸတ်းဝၼ်းတီႈ 11 တေႃႇထိုင်ဝၼ်းတီႈ 20 /3/2020 ။
