လုၵ်ႈႁဵၼ်းလႄႈ ၶူးသွၼ် ဢွၼ်ၵၼ်ပၵ်းၸႂ် ႁၢင်ႈႁႅၼ်း တႃႇပၢင်တွပ်ႇလိၵ်ႈ ၸၼ်ႉသိပ်း ဢၼ်တေၸတ်းၼႂ်းႁူဝ်လိူၼ် ၼႃႈၼႆႉ ဝႃႈၼႆ။
ဝၼ်းတီႈ 06 – 15/03/2019 ႁွင်ႈၵၢၼ်ၾၢႆႇပၺ်ၺႃ လူင်ပွင်ၸိုင်ႈမိူင်းႁူမ်ႈတုမ် တေၸတ်းႁဵတ်း ပၢင်တွပ်ႇလိၵ်ႈၸၼ်ႉ သိပ်း ပီ 2018-2019 ၼႂ်းမိူင်းႁူမ်ႈတုမ်ပတ်းပိုၼ်ႉ ဝႃႈၼႆ။
တေႃႇၼေႃႇမေႇမဵဝ်းဢူး ၽူႈၵွၼ်းႁူင်းႁဵၼ်း ၸၼ်ႉသုင်မၢႆ 1 ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “တွၼ်ႈတႃႇ လုၵ်ႈဢွၼ်ႇ တေတွပ်ႇၸၼ်ႉသိပ်းတႄႉ လိၵ်ႈဢၼ်လူဝ်ႇသွၼ်ပၼ်တႃႇပီၼႆႉၵေႃႈသွၼ်ပၼ်မူတ်းယဝ်ႉ။ သွၼ်ပၼ် ပႃးၼႂ်းၶၢဝ်းယၢမ်း ၵၢင်ၼႂ်လႄႈ ႁူဝ်ၶမ်ႈ လူးၵွၼ်ႇ။ မိူဝ်ႈၸမ်တွပ်ႇလိၵ်ႈၼႆႉ ႁဝ်းၶႃႈယင်းႁွင်ႉၶူးသွၼ်တီႈၸၼ်ႉၸွမ် မႃးလိုမ်ႉပၼ်လိၵ်ႈလုၵ်ႈဢွၼ်ႇၶိုၼ်းယူႇ။ မိူဝ်ႈပီၵၢႆတႄႉ တီႈႁူင်းႁဵၼ်းမၢႆၼိုင်ႈ တူၼ်ႈတီးၼႆႉ ၽူႈဢွင်ႇပူၼ်ႉၸၼ်ႉ မီးယူႇ 58.2% ပီၼႆႉတႄႉ ယိူင်းဢၢၼ်းၶႂ်ႈႁႂ်ႈၼမ်လိူဝ်ပီၵၢႆ။ ၶႂ်ႈၾၢၵ်ႇထိုင်လုၵ်ႈႁဵၼ်းၶဝ်ဝႃႈတွၼ်ႈတႃႇတေတွပ်ႇၸၼ်ႉ သိပ်းၼႆႉ ဢမ်ႇၸႂ်ႈတၢင်းယၢပ်ႇၽိုတ်ႇ ၼႂ်းၸၢတ်ႈပၢၼ်။ ပဵၼ်ၶူဝ်လႆၼိုင်ႈသိၵ်ႈတွၼ်ႈတႃႇယိူင်းမၢႆ” ဝႃႈၼႆ။
ပၢင်တွပ်ႇလိၵ်ႈၸၼ်ႉသိပ်းပီၼႆႉ လုၵ်ႈႁဵၼ်း ဢွၼ်ၵၼ်ၶတ်းၸႂ်တူၺ်းလိၵ်ႈ ၸိူဝ်းၶဝ်မီးယိူင်းဢၢၼ်း တႃႇလႆႈၶၼႅၼ်း (ဢမၢၵ်ႈ)ၼမ် လႄႈ ႁႂ်ႈပႃးလၢဝ်ၸွင်ႈ(ဂုဏ်ထူး) ၼမ်ၼမ် ဝႃႈၼႆ။
ၼၢင်းသႅင်ႁၢၼ်ႇ လုၵ်ႈႁဵၼ်းၸၼ်ႉသိပ်း လၢတ်ႈတီႈၽူႈတွႆႇႁွၵ်ႈဝႃႈ “ လႆႈၶတ်းၸႂ်တႄႉတႄႉဝႃႈဝႃႈၶႃႈယဝ်ႉ ပေႃးဝႃႈ ၵၢင်ၼႂ်ၼႆၵေႃႈလႆႈလုၵ်ႉ 4:30 မူင်း၊ ၵၢင်ၶိုၼ်းသမ်ႉ လႆႈၼွၼ်း 11:30 မူင်းလႆႈဢၢၼ်ႇလိၵ်ႈၵူႈဝၼ်း။ ၶၢဝ်းယၢမ်း တႄႉ မီးယၢမ်းၵိၼ်ၶဝ်ႈၵူၺ်းၶႃႈ လိူဝ်ၼၼ်ႉ လႆႈတူၺ်းလိၵ်ႈယူႇၵူႈၶမ်ႈၶႃႈယဝ်ႉ။ လွင်ႈယၢပ်ႇၽိုတ်ႇတႄႉမီးယူႇၶႃႈ ၵူၺ်းၵႃႈ ယူႇတီႈႁဝ်းၶတ်းၸႂ်ၵူၺ်းၶႃႈ” ဝႃႈၼႆ။
ၸၢႆးၵျေႃႇလႅင်း လုၵ်ႈႁဵၼ်းၸၼ်ႉသိပ်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၶၢဝ်းတၢင်း 2-3 လိူၼ်ၼႆႉ ႁဝ်းၶႃႈ လႆႈၶတ်းၸႂ် မႃးတႄႉတႄႉၶႃႈ၊ ၶၢဝ်းယၢမ်းႁဝ်းၶႃႈတႃႇလူလိၵ်ႈတူၺ်းလိၵ်ႈတႄႉ မီးထႅင်ႈလိူၼ်ၼႆႉၵူၺ်းၶႃႈ ပေႃးလိူၼ်ၼႃႈမႃးၵေႃႈ ပဵၼ်ၶၢဝ်းတွပ်ႇလိၵ်ႈယဝ်ႉ။ ၶႃႈႁဝ်း ယိူင်းဢၢၼ်းဝႆႉတႄႉ ႁႂ်ႈပႃးလၢဝ်ၸွင်ႈ(ဂုဏ်ထူး) 3 လုၵ်ႈၶႃႈ” ဝႃႈၼႆ။
ၶူးသွၼ်တေႃႇမိၼ်ႉမိၼ်ႉဝိၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းပီၼႆႉတႄႉ ႁၼ်ဝႃႈ လွင်ႈတၢင်းၶတ်းၸႂ် လုၵ်ႈဢွၼ်ႇၶဝ် ႁႅင်းဢေႇသေပီၵၢႆ ၵူၺ်းၵႃႈ ပေႃးၸမ်ပၢင်တွပ်ႇ မႃးတႄႉ ဢမ်ႇၸၢင်ႈဝႃႈၼင်ႇၵဝ်ႇ ဝူၼ်ႉဝႃႈၶဝ်တေမႆႈၸႂ်သေ တေၶတ်း ၸႂ်မႃး။ ယူႇတီႈၶူးၶဝ်ၵေႃႈႁွင်ႉၶူးတီႈၸၼ်ႉၸွမ်ၵူႈပၢႆးပၢႆး မႃးလိုမ်ႉပၼ် သွၼ်ပၼ်လႄႈ ဢုပ်ႇဢူဝ်းသပ်းလႅင်းပၼ် လွင်ႈၶေႃႈထၢမ် ၸိူဝ်းၼႆႉ။ ဢၼ်ၶႂ်ႈပၼ်ႁႅင်းတႄႉ ၶႂ်ႈလၢတ်ႈဝႃႈ ၶႂ်ႈႁႂ်ႈဝႆႉ ပၢႆးယူႇလီပဵၼ်ပိူင်လူင် ၽေးရူတ်ႉၼႆၵေႃႈၼမ် ဢမ်ႇပေႃးၶႂ်ႈႁႂ်ႈၶီႇရူတ်ႉၶိူင်ႈ၊ ႁႂ်ႈတွပ်ႇလိၵ်ႈလႆႈၸွမ်းၸိူင်ႉၼင်ႇ ၶူးၶဝ်သွၼ်ဝႆႉပၼ်တီႈႁူင်းႁဵၼ်း” ဝႃႈၼႆ။
မိူဝ်ႈပီ 2017-2018 ၼႂ်းပတ်ႉပိုၼ်ႉမိူင်းတႆး ဢၼ်ၶဝ်ႈတွပ်ႇၸၼ်ႉသိပ်း မီးယူႇ 52,219 ၵေႃႉ ဢၼ်တွပ်ႇပူၼ်ႉ ၸၼ်ႉ သိပ်းမီး 15,452 ၵေႃႉ ၊ ဢၼ်လႆႈလၢဝ်ၸွင်ႈ 1- 6 လုၵ်ႈ မီး 3775 ၵေႃႉ။
