ၼႂ်းလိူၼ်ၻီႊသႅမ်ႊၿိူဝ်ႊ 2019 ၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် မွၵ်ႈ 4 ပွၵ်ႈ။

လႅင်ႇၶၢဝ်ႇတၢင်းၼမ်ႉၶမ်းပွင်ႇၶၢဝ်ႇမႃးဝႃႈ ဝၼ်းတီႈ 10/12/2019 ယၢမ်းၵၢင်ၼႂ် 9 မူင်းပၢႆ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA ပဵၼ် ပၢင် တိုၵ်းၵၼ် ၼႂ်းၵႄႈဝၢၼ်ႈၵွင်းၵၢတ်ႇ လႄႈ ဝၢၼ်ႈႁၢင်ယႅင်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ ယွၼ်ႉသိုၵ်းလူင်ပွင် ၸိုင်ႈမၢၼ်ႈ ထႅမ်ႁႅင်းသိုၵ်း၊ ၽိုတ်ႉၶဝ်ႈၼႂ်းထိူၼ်ႇလႄႈ ၸင်ႇၽႃႇၺႃးၵၼ် လႆႈ ပဵၼ်ပၢင်တိုၵ်းၵၼ်။

ႁွင်ႈၵၢၼ်ၾၢႆႇပွင်ႇၶၢဝ်ႇ တပ်ႉသိုၵ်းတဢၢင်းပိုၼ်ၽၢဝ်ႇ ဢွၵ်ႇဝႆႉဝႃႈ “ တပ်ႉသိုၵ်းလူင်ပွင်ၸိုင်ႈမၢၼ်ႈ တူင်ႉၼိုင်ၽိုတ်ႉၶဝ်ႈ ၸူး ဢွင်ႈတီႈ တပ်ႉသိုၵ်းတဢၢင်း တူင်ႉၼိုင်ယူႇဝႆႉၼၼ်ႉ ယူႇတီႈတၢင်းၾၢႆႇတပ်ႉသိုၵ်းတဢၢင်း လႆႈၵႅတ်ႇၶႄႁႄႉၵင်ႈၶိုၼ်း သေ သွင်ၾၢႆႇ လႆႈပဵၼ်ပၢင်တိုၵ်းၵၼ်၊ တၢင်းၾၢႆႇတပ်ႉသိုၵ်းမၢၼ်ႈ မီးလွင်ႈမၢတ်ႇၸဵပ်းလူႉတၢႆ။ ၵူၺ်းၵႃႈ ပႆႇလႆႈႁူႉ ႁူဝ်ယွႆႈ မၼ်း” ဝႃႈၼႆ။

မိူဝ်ႈဝၼ်းတီႈ 6/12/2019 ယၢမ်းၵၢင်ၼႂ် မွၵ်ႈ 7 မူင်းၶိုင်ႈၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် ႁိမ်းဝၢၼ်ႈၼမ်ႉၸင်ႈ ဢိူင်ႇတူၼ်ႈႁုင်း ၸႄႈဝဵင်းၼမ်ႉၶမ်း။ တင်းသွင်ၾၢႆႇပဵၼ်ပၢင်တိုၵ်းၵၼ် တႄႇ ဢဝ် ၵၢင်ၼႂ် 7:40 မူင်း ထိုင် 8:15 မူင်း ဝႃႈၼႆ။

လိူဝ်ၼၼ်ႉ တၢင်းၸႄႈဝဵင်းၵျွၵ်ႉမႄးၵေႃႈ ၵႆႉၽႃႇၺႃးၵၼ် တုမ်ႉတိူဝ်ႉ ပဵၼ်ပၢင်တိုၵ်းၵၼ်သေ မိူဝ်ႈဝၼ်းတီႈ 10/12/2019 ယၢမ်းၵၢင်ၶမ်ႈၼၼ်ႉ ၵူၼ်းဝၢၼ်ႈဢုမ်းဢုၺ်း ဢိူင်ႇၵုၼ်ၵေႃႇ လႆႈဢွၼ်ၵၼ်ငိူင်ႈဝႄႈၽေးသိုၵ်း မႃးသွၼ်ႈဝႆႉတီႈဝတ်ႉ/ ၵျွင်းထမ်မရုင်ႇ ပွၵ်ႉ 8 ဝဵင်းၵျွၵ်ႉမႄး တင်းမူတ်းႁူဝ်ၵူၼ်း 43 ၵေႃႉ ဝႃႈၼႆ။