သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် တီႈလႃႈသဵဝ်ႈ

ႁူဝ်လိူၼ်ၵျူႊလၢႆႊ 2019 ၼႆႉမႃး သိုၵ်းမၢၼ်ႈတင်းသိုၵ်းတဢၢင်း ပဵၼ်ပၢင်တိုၵ်းၵၼ် တီႈတၢင်းဢိူင်ႇမိူင်းယေႃ ၸႄႈဝဵင်း လႃႈသဵဝ်ႈ။

ဝၼ်းတီႈ 1/7/2019 ယၢမ်းၵၢင်ၼႂ် 5:30 မူင်းထိုင် 6:10 မူင်း တပ်ႉသိုၵ်းတဢၢင်း TNLA လႄႈ တပ်ႉသိုၵ်းမၢၼ်ႈ ၸၵၶ 10 ပႃႈတႂ်ႈၶမယ 368 သွင်ၾၢႆႇပဵၼ်ပၢင်တိုၵ်းၵၼ် တီႈတၢင်းပွတ်းဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ႁွင်ႈၵၢၼ်ပိုၼ်ၽၢဝ်ႇ သိုၵ်းတဢၢင်း TNLA ဢွၵ်ႇဝႆႉဝႃႈ “ သိုၵ်းမၢၼ်ႈလုၵ်ႉတၢင်းလွႆႁူဝ်သိူဝ်ၼၼ်ႉ တူင်ႉၼိုင်ၽိုတ်ႉၶဝ်ႈၸူး တပ်ႉသိုၵ်းတဢၢင်းဢၼ်တူင်ႉၼိုင်ယူႇဝႆႉတၢင်းလွႆလၢင်းလႄႈ သွင်ၾၢႆႇၸင်ႇလႆႈပဵၼ်ပၢင်တိုၵ်းၵၼ်” ဝႃႈၼႆ။

ၾၢႆႇၼိုင်ႈတၢင်းၼိုင်ႈ မိူဝ်ႈဝၼ်းတီႈ 30 လိူၼ်ၵျူၼ်ႊ 2019 ၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇသိုပ်ႇ ၵိုတ်းတိုၵ်းထႅင်ႈ တႃႇၶၢဝ်းတၢင်း 2 လိူၼ် တႄႇဢဝ်ဝၼ်းတီႈ 1 လိူၼ်ၵျူႊလၢႆႊ ထိုင် ဝၼ်းတီႈ 31 လိူၼ်ဢေႃႊသ် ဝႃႈၼႆ။

သိုၵ်းမၢၼ်ႈတင်း သိုၵ်းတဢၢင်းၼႆႉ ပဵၼ်ပၢင်တိုၵ်းၵၼ်မႃး ၼႂ်းလိူၼ်ၵျူၼ်ႊပူၼ်ႉမႃးၼႆႉ ဢမ်ႇယွမ်း 20 ပွၵ်ႈယဝ်ႉ။