သိုၵ်းလူင်ပွင်ၸိုင်ႈမၢၼ်ႈ ၶဝ်ႈယိုဝ်းသိုၵ်းတႆး RCSS/SSA တီႈႁိမ်းဝၢၼ်ႈတမ်းၶွၼ်ႇ ၸႄႈဝဵင်းၵျွၵ်ႉမႄး ဝႃႈၼႆ။

ဝၼ်းတီႈ 19/02/2019 ယၢမ်းၵၢင်ၼႂ် ယူႇတီႈႁွင်ႈၵၢၼ်ပိုၼ်ၽၢဝ်ႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဢွၵ်ႇဝႃႈ သိုၵ်းလူင်ပွင်ၸိုင်ႈမၢၼ်ႈလႄႈ သိုၵ်း RCSS/SSA လႆႈပဵၼ်ပၢင်တိုၵ်းၵၼ် တီႈႁိမ်းဝၢၼ်ႈတမ်းၶွၼ်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၾၢႆႇ RCSS/SSA လႆႈလူႉတၢႆ 2 ၵေႃႉ ဝႃႈၼႆဝႆႉ။

ၵူၼ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ လႆႈလူႉတၢႆ 2 ၵေႃႉ။ မီးၵူၼ်းၵႂႃႇပွင်ႇၶၢဝ်ႇ ပၼ်သိုၵ်း မၢၼ်ႈ ၼႃႇ။ လႆႈႁူႉဝႃႈ သိုၵ်းမၢၼ်ႈမႃးငွႆးယိုဝ်းၼႆဢိူဝ်ႈ။ ပူၼ်ႉမႃးပႆႇပေႃးႁိုင် 2-3 ဝၼ်းၼႆႉၵူၺ်း။ ၵူၼ်းဝၢၼ်ႈတႄႉ ဢမ်ႇပဵၼ် သင်၊ ၵမ်ႈၽွင်ႈတၼ်းပၢႆႈဝႆႉၵွၼ်ႇ” ဝႃႈၼႆ။

သေႃႇမိၼ်းထုၼ်း ၵႅမ်ၸွမ်ႁၢၼ် သိုၵ်းမၢၼ်ႈ လၢတ်ႈတီႈသိုဝ်ႇၶၢဝ်ႇ RFA ဝႃႈ “ ႁဝ်းၶႃႈ လႆႈငိၼ်းဝႃႈ မီးၸုမ်းယိပ်းၵွင်ႈ ၵၢင်ႇၼုင်ႈ ၶူဝ်းၵူၼ်းႁိူၼ်းသေ ၵဵပ်းၶွၼ်ႇၵူၼ်းဝၢၼ်ႈယူႇၼႆလႄႈ ၸင်ႇလႆႈၶဝ်ႈၵႂၢတ်ႇလၢင်ႉသေသွင်ၾၢႆႇ လႆႈပဵၼ် ပၢင်တိုၵ်းၵမ်းၼိုင်ႈ” ဝႃႈၼႆ။

ႁွင်ႈၵၢၼ်ၾၢႆႇပွင်ႇၶၢဝ်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ လၢတ်ႈဝႃႈ မီးၸုမ်းယိပ်းၵွင်ႈၵၢင်ႇ 5 ၵေႃႉ ၼုင်ႈၶူဝ်း ၵူၼ်းႁိူၼ်း သေ ၵဵပ်းၶွၼ်ႇၵူၼ်းဝၢၼ်ႈယူႇ။ ယူႇတီႈၾၢႆႇတပ်ႉသိုၵ်းမၢၼ်ႈ လႆႈၶဝ်ႈၵႂၢတ်ႇလၢင်ႉသေ ပဵၼ်ပၢင်တိုၵ်းၵၼ် ၾၢႆႇ ၸုမ်း ယိပ်းၵွင်ႈၵၢင်ႇ လႆႈတၢႆ 2 ၵေႃႉ လိူဝ်ၼၼ်ႉ သိမ်းလႆႈပႃးထႅင်ႈၶိူင်ႈၵွင်ႈၵၢင်ႇၵမ်ႈၽွင်ႈ ဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈၼႆႉ ပိုၼ်ၽၢဝ်ႇဝႆႉပဵၼ်တၢင်းၵၢၼ်မိူဝ်ႈဝၼ်းတီႈ 21/12/2018 ၼၼ်ႉဝႃႈ လႆႈၸီႉသင်ႇဝႆႉတိူင်း သိုၵ်း 4 ဢၼ် (ယပၶ၊ ယလၶ၊ မပၶလႄႈ တိူင်းသိုၵ်းသၢမ်ၸဵင်ႇ)၊ သိုၵ်းတပ်ႉမတေႃႇတေၵိုတ်းတိုၵ်းၾၢႆႇလဵဝ်တႃႇၶၢဝ်း တၢင်း 4 လိၼ် (21/12/2018 တေႃႇထိုင် 30/04/2019) ဝႃႈၼႆဝႆႉ။