ၵေႃႉပဵၼ်ၽူဝ်ၶူးသွၼ် ၽူႈၵွၼ်းႁူင်းႁဵၼ်း ၸၼ်ႉငဝ်ႈ(မူလ) တီႈဝၢၼ်ႈၶိူဝ်းဢူင်ႇဢူၺ်ႈ ၸႄႈဝဵင်းမိူင်းၵိုင် ၶိုင်ဢၢင်ႈၵၼ်ႉ ၸၼ် ၼွၼ်းၸွမ်းလုၵ်ႈႁဵၼ်း (ဢွၼ်ႇယိင်း) ဢႃယု 12 ပီ လႄႈ မိူဝ်ႈဝႃးဝၼ်းတီႈ 20/11/2019 ၼႆႉ ပေႃႈမႄႈပီႈၼွင်ႉမႃး ၸႅင်ႈၵႂၢမ်းတီႈတပ်ႉပလိၵ်ႈမိူင်းၵိုင်။

ပူၼ်ႉမႃး မိူဝ်ႈဝၼ်းတီႈ 30/10/2019 ၼၼ်ႉ ဢူးၵျေႃႇၸေႇယ ၵေႃႉပဵၼ်ၽူဝ် ၽူႈၵွၼ်းႁူင်းႁဵၼ်းၸၼ်ႉငဝ်ႈ တီႈဝၢၼ်ႈ ၶိူဝ်းဢူင်ႇဢူၺ်ႈ ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ ၶိုင်ၵၼ်ႉၸၼ် လုၵ်ႈႁဵၼ်း ၼၢင်းဢွမ် (ၸိုဝ်ႈလဵၼ်ႈ) ဢႃယု 12 ပီ ယူႇၸၼ်ႉ 4 ယၢမ်းၵၢင်ၶိုၼ်း မွၵ်ႈ 12 မူင်းၼၼ်ႉ ဝႃႈၼႆ။

လုင်းၸၢႆးလူင် ၽူႈတႅၼ်းသၽႃး ၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈ ဢေႃႈ ပဵၼ်ၽူဝ်ၶူးသွၼ်ၽူႈၵွၼ်းႁူင်းႁဵၼ်း။ လွင်ႈတၢင်းမၼ်းၼႆႉ ၶူးသွၼ်ၽူႈၵွၼ်းႁူင်းႁဵၼ်းၼၼ်ႉ ဢမ်ႇယူႇလီ မၼ်း ၼၢဝ်၊ ၼၢဝ်သေဢမ်ႇလုၵ်ႉလႆႈ ၵမ်းၼႆႉ ၶဝ်ႁွင်ႉလုၵ်ႈဢွၼ်ႇသေ မႃးသွၼ်တီႈၵျွင်း။ ၼွၼ်းတီႈၵျွင်းၼၼ်ႉ ၶႅၼ်ႈၵၼ် ႁွင်ႈ ၼိုင်ႈၵူၺ်း။ ၵမ်းၼႆႉ ၽူဝ်မၼ်းၼၼ်ႉ ၶဝ်ႈၵႂႃႇၼႂ်းႁွင်ႈၼွၼ်းလုၵ်ႈဢွၼ်ႇသေ ပိၵ်ႉသူပ်းလုၵ်ႈဢွၼ်ႇယဝ်ႉ ၵမ်းတၢင်းၼိူဝ် လုၵ်ႈဢွၼ်ႇၼၼ်ႉ ဢဝ်လုၵ်ႈဢွၼ်ႇ တူၵ်းၸႂ်ၵူဝ်သေ ႁွင်ႉႁႆႈ” ဝႃႈၼႆ။

ၼႂ်းႁွင်ႈၼၼ်ႉ လုၵ်ႈဢွၼ်ႇ ၼွၼ်းၸွမ်းၵၼ်လၢႆၵေႃႉ မၼ်းၸၢႆးၸင်ႇပွႆႇ၊ ၵၢင်ၼႂ်မိူင်းလႅင်းမႃး လုၵ်ႈဢွၼ်ႇသွင်ႈ မိူဝ်းႁိူၼ်း ၵမ်းလဵဝ် ၵူၺ်းၵႃႈ လုၵ်ႈဢွၼ်ႇၵူဝ် ဢမ်ႇႁတ်းလၢတ်ႈၽႂ် ထိုင်မႃးဝၼ်း – သွင်ဝၼ်း ၸင်ႇတေလၢတ်ႈၼႄဢူႈမႄႈ ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၵေႃႉပဵၼ်ပေႃႈမႄႈလႄႈ ပီႈၼွင်ႉၸၢဝ်းၶိူဝ်းလုၵ်ႈႁဵၼ်းၼၼ်ႉ လႆႈၵႂႃႇပိုတ်ႇလိူင်ႈဝႆႉတီႈႁူင်း ပလိၵ်ႈၸႄႈဝဵင်းမိူင်းၵိုင်ဝႆႉယဝ်ႉ ႁႂ်ႈဢဝ်လိူင်ႈ ပၼ်တူတ်ႈတၢမ်ႇ ၸွမ်းၼင်ႇပၵ်းပိူင်မၢႆမီႈမီး ဝႃႈၼႆ။

လုင်းၸၢႆးလူင် သိုပ်ႇလၢတ်ႈဝႃႈ “ မိူဝ်ႈၼႆႉ ပလိၵ်ႈၶဝ် တေၶိုၼ်ႈမိူဝ်းသေ ၵႂႃႇၵူတ်ႇထတ်းဢွင်ႈတီႈၼွၼ်း ၼႂ်းႁူင်းႁဵၼ်း ၼၼ်ႉ။ မိူဝ်ႈတႄႇမၼ်း ၶဝ်ၵႂႃႇပိုတ်ႇလိူင်ႈၼၼ်ႉ ယူႇတီႈၵႅမ်ၽူႈၵွၼ်းပလိၵ်ႈ မိူင်းၵိုင် လၢတ်ႈသဵင်ယႂ်ႇ/ လူင် တေႃႇၶဝ် ဢမ်ႇႁပ်ႉၸႅင်ႈၵႂၢမ်း။ ၵမ်းၼႆႉ ႁဝ်းၵပ်းၾူၼ်းလၢတ်ႈၵႂႃႇတီႈႁူင်းပလိၵ်ႈၼၼ်ႉၵမ်းလဵဝ်။ လွင်ႈၼႆႉ မၼ်းပဵၼ်ဢမူႉလုၵ်ႈ ဢွၼ်ႇ သင်သူႁိုတ်းသႂ်ႇ ၵူၼ်းဝၢၼ်ႈၼႆ ၵဝ်တေၶိုၼ်းၸွႆးတြႃးသူၶိုၼ်း လၢတ်ႈၶဝ်ႁဵတ်းၼၼ်။ ယဝ်ႉၵေႃႈ လၢတ်ႈဝႆႉ တီႈ ၵူၼ်းဝၢၼ်ႈ ယႃႇပေၵူဝ် ပေႃးမီးသင်ၵေႃႈလၢတ်ႈမႃး။ မိူဝ်ႈဝႃးတႄႉ ၵူၼ်းဝၢၼ်ႈၶဝ် လႆႈၵႂႃႇပိုတ်ႇလိူင်ႈဝႆႉ တီႈႁူင်းပလိၵ်ႈ ယဝ်ႉ”ဝႃႈၼႆ။

ၽူဝ်ၽူႈၵွၼ်းႁူင်းႁဵၼ်း ၸၼ်ႉငဝ်ႈ(မူလ) တီႈဝၢၼ်ႈၶိူဝ်းဢူင်ႇဢူၺ်ႈၼႆႉ ဢမ်ႇၸႂ်ႈပဵၼ်ၶူးပူင်သွၼ်သင် ပဵၼ်ၽူဝ်ၶူးသွၼ် သေ မႃးယူႇၸွမ်းၵေႃႉပဵၼ်မေး တီႈႁူင်းႁဵၼ်းၼၼ်ႉၵူၺ်း ဝႃႈၼႆ။

“ လွင်ႈလုၵ်ႈဢွၼ်ႇၵႂႃႇၼွၼ်းတီႈႁူင်းႁဵၼ်းၼၼ်ႉ ယွၼ်ႉဝႃႈ ၶူးသွၼ်ၶဝ်ႁွင်ႉသွၼ်ၼွၵ်ႈၶၢဝ်းယၢမ်းလိူဝ်(အချိန်ပို) ထႅင်ႈ၊ လုၵ်ႈႁဵၼ်း ၼၢင်းဢွမ်ၼႆႉ ပဵၼ်ၵူၼ်းဝၢၼ်ႈၶိူဝ်းဢူင်ႇဢူၺ်ႈ။ လိူဝ်ၼၼ်ႉ ၶူးသွၼ် ဢၼ်မႃးပူင်သွၼ် ယူႇတီႈၼၼ်ႈၼၼ်ႉ ၸဵမ်မေး၊ ၸဵမ်ၽူဝ် ၸဵမ်လုၵ်ႈၶဝ် ၵူၼ်းဝၢၼ်ႈဢဝ်ပုၼ်ႈၽွၼ်းသေ လဵင်ႉ/ သူင်ႇပၼ်ၶဝ်ႈသၢၼ်၊ ၼမ်ႉမၼ်း ၸဵမ်ၸိူဝ်းၼႆႉ။ ၵေႃႉပဵၼ်ၽူဝ်ၶူးသွၼ်ၼၼ်ႉတႄႉ ပဵၼ်ၵူၼ်းမႃးၵွပ်ႈယူႇၸွမ်းၵေႃႉပဵၼ်မေးမၼ်းၵူၺ်း” လုင်းၸၢႆးလူင် သပ်းလႅင်းလၢတ်ႈ ၼႄၼင်ႇၼႆ။

ၼႂ်းပီ 2019 ၼႆႉ ပၼ်ႁႃၵၼ်ႉၸၼ်/ လူလၢႆ ပူၼ်ႉပႅၼ်ၼိူဝ်ဢွၼ်ႇယိင်းဢႃယု ဢမ်ႇတဵမ်ၼမ်၊ မိူၼ်ၼင်ႇ လွင်ႈၼၢင်းဢွင်ႇ Vitonia တီႈၼေႇပျီႇတေႃႇ ပၼ်ႁႃ၊ ဢွၼ်ႇယိင်းတၢင်းမိူင်းယႆၼၼ်ႉၵေႃႈ ၺႃးၽူဝ်ၽူႈၵွၼ်းႁူင်းႁဵၼ်းၵၼ်ႉၸၼ်လူလၢႆ ၸိူဝ်းၼႆႉ လိူင်ႈလၢဝ်းယင်းပႆႇယဝ်ႉ။