ၽူဝ်ၽူႈၵွၼ်းႁူင်းႁဵၼ်း ၸၼ်ႉသုင်(ဢထၵၽႄ) ဝဵင်းမိူင်းယႆ မိူင်းတႆးပွတ်းႁွင်ႇၼၼ်ႉ ဝၢင်းယႃ ၵၼ်ႉၸၼ်ဢွၼ်ႇယိင်း ၸၼ်ႉၸဵတ်း 2 ၵေႃႉ ဝႃႈၼႆ။

ဝၼ်းတီႈ 15/9/2019 ယၢမ်းၵၢင်ၶမ်ႈ ဢွၼ်ႇယိင်း မၶိၼ်ႇဢေး(ၸိုဝ်ႈလဵၼ်ႈ) ဢႃယု 14 ပီ ၺႃးၵေႃႉပဵၼ်ၽူဝ်ၽူႈၵွၼ်းႁူင်း ႁဵၼ်း တီႈဝၢၼ်ႈၼမ်ႉပႃတိုင်း ဢိူင်ႇၼႃးၽႅမ်း ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ၊ လဵင်ႉယႃႈယႃ ၼွၼ်းလပ်းသေ ၵၼ်ႉၸၼ်။ မၶိၼ်ႇမႃႇ (ၸိုဝ်ႈလဵၼ်ႈ) ပဵၼ်ဢူၺ်းၵေႃႉမၶိၼ်ႇဢေးၼၼ်ႉ သမ်ႉၺႃးၵၼ်ႉၸၼ်မိူဝ်ႈ လိူၼ်ၵျုၼ်ႊပူၼ်ႉမႃး။

ၶူးသွၼ်ၼႂ်းႁူင်းႁဵၼ်း တီႈဝၢၼ်ႈၼမ်ႉပႃတိုင်း ဢၼ်ၸွႆႈထႅမ်လုၵ်ႈႁဵၼ်း 2 ၵေႃႉၼၼ်ႉ လၢတ်ႈတီႈၽူႈတွႆႇ ႁွၵ်ႈဝႃႈ “ မၼ်း ၸၢႆးလဵင်ႉယႃႈယႃပၼ်လုၵ်ႈဢွၼ်ႇၵေႃႉၼိုင်ႈသေလူလၢႆမိူဝ်ႈၼွၼ်းလပ်းလိုမ်းတူဝ်ၵႂႃႇ။ ထိုင်မႃးထႅင်ႈဝၼ်းၼိုင်ႈ ယၢမ်းၵၢင် ၼႂ်ၽိူဝ်ႇႁူႉတူဝ်မႃး ပွႆႇပူၺ်သေ ၼွၼ်းယူႇၶၢင်ႈ ၽူဝ်ၽူႈၵွၼ်းႁူင်းႁဵၼ်းဝႆႉ” ဝႃႈၼႆ။

ၽူဝ်ၽူႈၵွၼ်းႁူင်းႁဵၼ်းၼႆႉ ဢမ်ႇၸႂ်ႈဝႃႈၵၼ်ႉၸၼ် မၶိၼ်ႇဢေးၼႆႉ ပဵၼ်ပွၵ်ႈဢွၼ်တၢင်းၵူၺ်း မိူဝ်ႈပူၼ်ႉမႃး ၶၢဝ်းတၢင်း 6 လိူၼ်ၼၼ်ႉၵေႃႈ ယၢမ်ႈၵၼ်ႉၸၼ် မၼ်းၼၢင်းမႃးယဝ်ႉၵမ်းၼိုင်ႈ ဝႃႈၼႆ။

ၽူဝ်ၽူႈၵွၼ်းႁူင်းႁဵၼ်း တီႈဝၢၼ်ႈၼမ်ႉပႃတိုင်း ဢိူင်ႇၼႃးၽႅမ်းၼႆႉ မၼ်းၸၢႆးပိုတ်ႇႁၢၼ်ႉၶၢႆၶူဝ်းယွႆႈ(ကုန်စုံဆိုင်) ဝႆႉ ဝႃႈၼႆ။

ၶူးသွၼ် ၽူႈၸွႆႈထႅမ်ၼၼ်ႉ သိုပ်ႇလၢတ်ႈဝႃႈ “ ဢူးဢွင်ႇမဵဝ်းထႅၵ်ႉ ဢၼ်ၵၼ်ႉၸၼ် ဢွၼ်ႇယိင်း 2 ၵေႃႉၼၼ်ႉ မိူဝ်ႈဝၼ်း တီႈ 15/9/2019 ယၢမ်းၵၢင်ၶမ်ႈၼၼ်ႉ မၼ်းၸၢႆးႁွင်ႉ မၶိၼ်ႇဢေး ၵႂႃႇႁဵတ်းလွင်ႈမူတ်းသႂ် ယဝ်ႉၵေႃႈ လဵင်ႉယႃႈၼွၼ်းလပ်း လုၵ်ႈဢွၼ်ႇသေ လူလၢႆၼွၼ်းၸွမ်း” ဝႃႈၼႆ။

သိုပ်ႇလၢတ်ႈဝႃႈ “ ႁဝ်းၶႃႈ တဵၵ်းထၢမ်လုၵ်ႈဢွၼ်ႇ။ လုၵ်ႈဢွၼ်ႇႁႆႈသေ ဢမ်ႇလၢတ်ႈသင်။ ၶႃႈႁဝ်း ဢမ်ႇႁူႉဝႃႈ တေႁဵတ်း ၸိူင်ႉႁိုဝ်။ ယွၼ်ႉဝႃႈ ပဵၼ်ၽူဝ်ၽူႈၵွၼ်းႁူင်းႁဵၼ်း။ တေႃႈလဵဝ်တႄႉ ပလိၵ်ႈၶဝ် လႆႈၵုမ်းၶင်တူဝ်မၼ်းၸၢႆးဝႆႉ တီႈႁူင်းပလိၵ်ႈ ယဝ်ႉ” ဝႃႈၼႆ။

ဢွၼ်ႇယိင်း 2 ၵေႃႉ ဢၼ်ၺႃးၵၼ်ႉၸၼ်ၼႆႉ ဢႃယု 14 ပီ ပဵင်းၵၼ် ယဝ်ႉၵေႃႈ ၶိုၼ်ႈႁူင်းၸၼ်ႉၸဵတ်းမိူၼ်ၵၼ်။ ၼႂ်းၼၼ်ႉ ဢွၼ်ႇယိင်း ထႅင်ႈၵေႃႉၼိုင်ႈ ၸိုဝ်ႈႁွင်ႉ မၶိၼ်ႇမႃႇ(ၸိုဝ်ႈလဵၼ်ႈ) ဢမ်ႇမီးပေႃႈမႄႈ ဝႃႈၼႆ။

ၵဵဝ်ႇလူၺ်ႈလွင်ႈဢွၼ်ႇယိင်း 2 ၵေႃႉဢၼ်ၺႃးၵၼ်ႉၸၼ်ၼၼ်ႉ ၵေႃႉပဵၼ်ၽူဝ်ၽူႈၵွၼ်းႁူင်းႁဵၼ်းၼၼ်ႉ ပၢႆလွၵ်ႇငိုတ်ႈ ဢွၼ်ႇယိင်း 2 ၵေႃႉၼၼ်ႉဝႆႉထႅင်ႈဝႃႈ ယႃႇပေလၢတ်ႈၼႄၽႂ်။

ၶူးသွၼ် သိုပ်ႇလၢတ်ႈဝႃႈ “ လုၵ်ႈဢွၼ်ႇ 2 ၵေႃႉၼႆႉ ဢမ်ႇႁတ်းလၢတ်ႈ။ ၽူႈၸၢႆးဢၼ်ၵၼ်ႉၸၼ်ၼၼ်ႉ လွၵ်ႈငိုတ်ႈလုၵ်ႈ ဢွၼ်ႇဝႆႉ။ သင်သူၵႂႃႇလၢတ်ႈၼႄ ပေႃႈမႄႈသူၸိုင် ၵဝ်တေပေႃႉႁႅမ်သူ။ ယဝ်ႉၵေႃႈ တေဢဝ်သူသႂ်ႇၶွၵ်ႈထႅင်ႈ” ဝႃႈၼႆ။

ဝၢႆးမၼ်းၸၢႆးၵၼ်ႉၸၼ် ဢွၼ်ႇယိင်း 2 ၵေႃႉၼၼ်ႉယဝ်ႉ တွၼ်ႈတႃႇတေၵူတ်ႇထတ်းၸႅတ်ႈတူၺ်းတီႈႁူင်းယႃမိူင်းယႆ ၼၼ်ႉ တေလႆႈဝႂ်ႁပ်ႉႁွင်း(ထောက်ခံစာ) ႁူင်းပလိၵ်ႈၵွၼ်ႇသေ ၸင်ႇတေၵူတ်ႇထတ်းလႆႈ။ တေႃႈလဵဝ် ဢွၼ်ႇယိင်း 2 ၵေႃႉၼႆႉ ပႆႇလႆႈၵူတ်ႇထတ်း။

ၶူးသွၼ် သိုပ်ႇလၢတ်ႈဝႃႈ “မိူဝ်ႈဝၼ်းပဵၼ်ၼၼ်ႉ လူဝ်ႇလႆႈၵူတ်ႇထတ်းယဵဝ်ႈၶဝ်။ တီႈႁူင်းယႃသမ်ႉဝႃႈ တေလႆႈဝႂ်ၵမ်ႉထႅမ် တီႈႁူင်းပလိၵ်ႈၵွၼ်ႇ ၸင်ႇတေၵူတ်ႇထတ်းလႆႈ။ ဝၢႆးၼၼ်ႉ လႆႈဢဝ်ၶဝ် 2 ၵေႃႉၵႂႃႇၵူတ်ႇထတ်းတီႈႁူင်းယႃလႃႈသဵဝ်ႈ” ဝႃႈၼႆ။

တေႃႈလဵဝ် ၶေႃႈမုလ်း ၵူတ်ႇထတ်းၼႆႉမီးတီႈႁူင်းပလိၵ်ႈဝႆႉ လွင်ႈၶေႃႈမုလ်းၼၼ်ႉ မီးဝႆႉသင် ဢွၵ်ႇမႃးၸိူင်ႉႁိုဝ် ဢၼ်ဝႃႈ ၼၼ်ႉ ၽႂ်ပႆႇႁူႉၼႆ ပီႈၼွင်ႉဢွၼ်ႇယိင်း 2 ၵေႃႉၼၼ်ႉလၢတ်ႈ။

ၶူးသွၼ် သိုပ်ႇလၢတ်ႈဝႃႈ “ ၽူႈယႂ်ႇၵူၼ်းလူင်ၸွမ်းပွၵ်ႉ/ ၸွမ်းၾၢႆႇတႄႉ ႁႂ်ႈယွမ်းၼွမ်းတေႃႇၵၼ်သၢႆႈၵႃႈသၢႆႈႁူဝ်ၵၼ်သေ ႁႂ်ႈလိူင်ႈလၢဝ်းယဝ်ႉၵႂႃႇ။ သင်ဝႃႈ ပိုတ်ႇလိူင်ႈၸွႆးတြႃးၵၼ်ၸိုင် တေသဵင်ႈငိုၼ်းၵူၺ်း ဝႃႈၼႆ။ ယွၼ်ႉၼၼ်လႄႈ ၶႃႈႁဝ်းၵေႃႈ ဢမ်ႇၸၢင်ႈႁဵတ်း ၸိူင်ႉႁိုဝ်။ ယဝ်ႉၵေႃႈ ၶဝ်ဢမ်ႇဢုပ်ႇဢူဝ်းငူပ်ႉငီႉၽႂ်” ဝႃႈၼႆ။

ၵူၼ်းမိူင်းယႆ လၢတ်ႈဝႃႈ “ ၽူဝ်ၽူႈၵွၼ်းႁူင်းႁဵၼ်းၼၼ်ႉ တေၶတ်းၸႂ်ဢဝ်ငိုၼ်း သၢႆႈတႅၼ်းပၼ် ၼိုင်ႈၵေႃႉလႂ် 10 သႅၼ် ပျႃးသေ ယဝ်ႉၵႂႃႇ။ ၵူၺ်းၵႃႈ ယူႇတီႈၸိူဝ်ႉၶိူဝ်းပီႈၼွင်ႉ၊ ၵူၼ်းႁိမ်းႁွမ်းလႄႈ ၸုမ်းတူင်ႉၼိုင်တူင်ႇဝူင်းၵူၼ်း ၶဝ်ႈၸွႆႈသေဝႃႈ တေႁဵတ်း ၼႆယဝ်ႉၵႂႃႇငၢႆႈငၢႆႈတႄႉ မၼ်းဢမ်ႇယဝ်ႉ/ ဢမ်ႇလႆႈၼႆသေ ဢွၼ်ၵၼ်ၵႂႃႇတၢင်ႇလၢတ်ႈတီႈလုမ်းပလိၵ်ႈႁႂ်ႈ ဢဝ်လိူင်ႈ ၸွမ်းၼင်ႇပၵ်းပိူင်မၢႆမီးဝၢၼ်ႈမိူင်းမီး” ဝႃႈၼႆ။

ၵဵဝ်ႇၵပ်းလိူင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတီႈႁူင်းပလိၵ်ႈမိူင်းယႆၵေႃႈ ဢမ်ႇတွပ်ႇလၢတ်ႈသင်။

ၸၢႆးၵျေႃႇသီႇႁႃႉ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ “ ပလိၵ်ႈၶဝ် တီႉၺွပ်းၵုမ်းၶင် ၽူႈၸၢႆးၼၼ်ႉ မိူဝ်ႈဝၼ်းတီႈ 18/9/2019 ၼၼ်ႉသေ ပိုတ်ႇလိူင်ႈ/ သႂ်ႇၶွၵ်ႈဝႆႉယဝ်ႉ။ လႆႈလၢတ်ႈပႃးၽူႈၵွၼ်း ၸႄႈဝဵင်း မိူင်းယႆ ႁႂ်ႈဢဝ်လိူင်ႈၸွမ်းၼင်ႇပၵ်းပိူင်မၢႆမီႈမီး” ဝႃႈၼႆ။

သိုပ်ႇလၢတ်ႈဝႃႈ “ မိူဝ်ႈတႄႇမၼ်းတႄႉ ၶဝ်ၶတ်းၸႂ် ႁႂ်ႈလိူင်ႈလၢဝ်းမၼ်းယဝ်ႉ ၸွမ်းဝၢၼ်ႈၵူၺ်း။ ၵူၺ်းၵႃႈ ႁဝ်းၶႃႈ ဢမ်ႇၶႂ်ႈႁႂ်ႈ မၼ်းယဝ်ႉတီႈၼၼ်ႈ ႁႂ်ႈၶိုၼ်ႈလုမ်းတြႃးသေ လၢတ်ႈလွင်ႈပဵၼ်တႄႉမီးတႄႉမၼ်းၾၢႆႇၼႃႈ ၽူႈတတ်းသိၼ်။ ၸင်ႇတေ ပဵၼ်မႃးလွင်ႈၽဵင်ႇပဵင်း။ ယူႇတီႈၶႃႈႁဝ်းၵေႃႈ ဢမ်ႇပၼ်ယဝ်ႉလၢႆ/ ယူႇလၢႆ ပၵ်းတႃပႂ်ႉတူၺ်းယူႇ” ဝႃႈၼႆ။

ၼၢင်းၼၢင်း ၽူႈတူင်ႉၼိုင်ၸုမ်းၼၢင်းယိင်း ၼႂ်းၸိုင်ႈတႆးပွတ်းႁွင်ႇ လၢတ်ႈဝႃႈ “ လုၵ်ႈဢွၼ်ႇဢႃယု ပႆႇတဵမ်လႄႈသင်၊ တဵမ် လႄႈသင် ႁွင်ႉၵႂႃႇလူလၢႆၸိူင်ႉၼႆ ပဵၼ်တၢင်းၽိတ်းလူင်ၶႃႈဢေႃႈ။ တေလႆႈၸႅင်ႈၵႂၢမ်း ၸွမ်းၼင်ႇပၵ်း ပိူင်မၢႆမီႈမီး။ တေဢဝ် ငိုၼ်းသေ သၢႆတႅၼ်းပၼ်ၵႂႃႇၸိူင်ႉၼႆသေ ယဝ်ႉၵႂႃႇဢမ်ႇလႆႈ” ဝႃႈၼႆ။

ၼႂ်းမိူင်းႁူမ်ႈတုမ်ၼႆႉ လုၵ်ႈဢွၼ်ႇယိင်း ဢႃယုပႆႇတဵမ် ထုၵ်ႇၺႃးၵၼ်ႉၸၼ်ၼႆႉ ပီၼိုင်ႈလႄႈပီၼိုင်ႈ ၼမ်ၶိုၼ်ႈမႃး တႄႉတႄႉ လုၵ်ႈဢွၼ်ႇဢႃယု ဢမ်ႇတဵမ် တိုၵ်ႉလဵၵ်ႉၸိူဝ်းၼၼ်ႉ ၺႃးၸၼ်ႉၵၼ်မႃး တင်းၼမ် ဝႃႈၼႆ။

ၽူႈတူင်ႉၼိုင်ၼႂ်းၸုမ်းၼၢင်းယိင်းလၢတ်ႈဝႃႈ “ ၵူၼ်းၵၼ်ႉၸၼ်လုၵ်ႈဢွၼ်ႇ ၸိူဝ်းၼၼ်ႉ ၶႂ်ႈတုၵ်းယွၼ်းႁႂ်ႈ ပၼ်တၢမ်ႇ တူၵ်းၶွၵ်ႈ ႁိုင် 20 ပီ ဢမ်ႇၼၼ် တူၵ်းၶွၵ်ႈ တေႃႇၸူဝ်ႈ” ဝႃႈၼႆ။

ၶူးသွၼ် ဢၼ်ၸွႆႈထႅမ် ဢွၼ်ႇယိင်း 2 ၵေႃႉၼၼ်ႉ လၢတ်ႈဝႃႈ “ ယူႇတီႈၶႃႈႁဝ်းတႄႉ ၶႂ်ႈတုၵ်းယွၼ်းႁႂ်ႈဢဝ်လိူင်ႈၵူၼ်း ၵၼ်ႉၸၼ် လုၵ်ႈဢွၼ်ႇ 2 ၵေႃႉၼၼ်ႉ ပၼ်တူတ်ႈတၢမ်ႇၸွမ်းပၵ်းပိူင်မၢႆမီႈ။ ဢမ်ႇၶႂ်ႈႁႂ်ႈပၼ်ငိုၼ်းသေ ယဝ်ႉၵႂႃႇ ၸိူင်ႉ ၼၼ်။ ၵဵဝ်ႇၵပ်းလူၺ်ႈလွင်ႈပၵ်းပိူင်မၢႆမီႈၼႆႉ သင်ၽူႈလႂ် ၽႂ်ႁူႉၸိုင် ႁႂ်ႈၸွႆႈထႅမ်ပၼ်ၽွင်ႈ” ဝႃႈၼႆ။

တီႈၼေႇပျီႇတေႃႇၵေႃႈ မီးပၼ်ႁႃၵၼ်ႉၸၼ်လုၵ်ႈဢွၼ်ႇၸၼ်ႉဢွၼ် ဢႃယု 2 ၶူပ်ႇပၢႆ ၼႂ်းႁူင်းႁဵၼ်းၸၼ်ႉဢွၼ်။ ပၼ်ႁႃၼႆႉၵေႃႈယင်းပႆႇယဝ်ႉပႆႇတူဝ်ႈ။ ၽူႈပူၼ်ႉပႅၼ်ပဵၼ်ၽႂ်တႄႉ ယင်းပႆႇတႅပ်းတတ်းလႆႈတႅၵ်ႇလႅင်း။