ဢိင်ၼိူဝ်ပၢင်တိုၵ်း ၼႂ်းၵႄႈသိုၵ်းလူင်ပွင်ၸိုင်ႈလႄႈ သိုၵ်း TNLA သေ ၵူၼ်းဝၢၼ်ႈပွတ်းဝၢၼ်ႈၼမ်ႉၶိူဝ်း ၸႄႈဝဵင်း ၼမ်ႉသၼ်ႇ လႆႈပွႆႇဝႆႉႁိူၼ်းယေးသေ ပၢႆႈၽေးသိုၵ်းၼၼ်ႉ ႁိူၼ်းယေးလၢၼ်ႉတီႈဝၢၼ်ႈၺႃး ယႃႉၽၵ်းတူသေ ၶဝ်ႈသွၵ်ႈတဝ် ဢဝ်ၶူဝ်းၶွင်ၵႂႃႇ။
မိူဝ်ႈဝၼ်းတီႈ 16-17/9/2019 ၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၵူၼ်း ဝၢၼ်ႈၼမ်ႉၶိူဝ်း လႆႈဢွၼ်ၵၼ်ပၢႆႈၽေးသိုၵ်းၶဝ်ႈဝဵင်းၼမ်ႉသၼ်ႇ၊ ၺႃးၵူၼ်းၸူၼ်/ ၽူႈလၵ်ႉ ၶဝ်ႈသွၵ်ႈ တဝ် ႁိူၼ်းယေး ပေႃးမၢၵ်ႇမိူဝ်။
ၵူၼ်းပၢႆႈၽေးသိုၵ်း ဝၢၼ်ႈၼမ်ႉၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈပၢႆးၽေးသိုၵ်းဢဝ်လၢႆဝၼ်းၵူၺ်း ႁိူၼ်းလႄႈ ႁၢၼ်ႉၶၢႆၶူဝ်းၸိူဝ်းၼႆႉ မီးၵူၼ်းလၵ်ႉၶဝ်ႈ တဝ်ဢဝ်ၶူဝ်းၶွင်ၼႂ်းႁိူၼ်းၼႂ်းႁၢၼ်ႉ။ သွၵ်ႈၵိၼ်တဝ်ၵိၼ် ၼမ်ႉသူမ်ႈၼမ်ႉဝၢၼ် ပီႇယႃႇ ပေႃးမူတ်းၶႃႈယဝ်ႉ။ တၢင်ႇႁိူၼ်းသမ်ႉ ဢဝ်ၶဝ်ႈသၢၼ် ၼမ်ႉမၼ်း။ ယဝ်ႉ ၵေႃႈ သွၵ်ႈတဝ်ဢဝ်ၶူဝ်းၼႂ်းႁိူၼ်း ပေႃးမၢၵ်ႇမိူဝ်မူတ်း” ဝႃႈၼႆ။
ၵူၼ်းပၢႆႈၽေးသိုၵ်းလၢတ်ႈဝႃႈ ဝၢႆးလင်ၵူၼ်းဝၢၼ်ႈဢွၼ်ၵၼ်ပၢႆႈ ၽေး သိုၵ်းယဝ်ႉသိုၵ်းမၢၼ်ႈမႃးပၵ်းယူႇၼႂ်းဝၢၼ်ႈၼမ်ႉၶိူဝ်း ။
မိူဝ်ႈၽွင်းၵူၼ်းဝၢၼ်ႈ ဢွၼ်ၵၼ်ပၢႆႈၽေးသိုၵ်းၼၼ်ႉ ႁိူၼ်းယေးၵူၼ်းဝၢၼ်ႈ၊ ႁၢၼ်ႉၶၢႆၶူဝ်း ၸိူဝ်းၼၼ်ႉ ၺႃးၵူၼ်းၶဝ်ႈ လၵ်ႉ/ သွၵ်ႈတဝ်ဢဝ်ၶူဝ်းၶွင်ၼႂ်းမၼ်း တင်းၼမ် ၵူၼ်းဝၢၼ်ႈတႄႉ လၢတ်ႈၼႄၼင်ႇၼႆ။
ဢူးတဵင်းသူၺ်ႇ ႁူဝ်ပဝ်ႈၸုမ်းၸွႆႈထႅမ် (ၶျၢၼ်းမျေႉလူႇမုၵူႇၺီႇယေး) လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈႁဝ်းလႆႈငိၼ်းတႄႉ ႁိူၼ်းၵူၼ်းဝၢၼ်ႈ 3 လင်လႄႈ ႁၢၼ်ႉၶၢႆၶူဝ်း ၼိုင်ႈႁၢၼ်ႉ ၺႃးယႃႉၶဝ်ႈသွၵ်ႈတဝ်။ ႁိူၼ်းၺႃးသွၵ်ႈတဝ် ၶူဝ်းပေႃးမၢၵ်ႇမိူဝ်။ လႆႈငိၼ်းဝႃႈ ငိုၼ်းႁၢႆၵႂႃႇ မွၵ်ႈ 10 သႅၼ်။ ပဵၼ်ၸုမ်းလႂ် ဢၼ်ဝႃႈၼၼ်ႉ ဢမ်ႇ လႆႈႁူႉ” ဝႃႈၼႆ။
ၼႂ်းၸႄႈဝဵင်းၼမ်ႉသၼ်ႇၼႆႉ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း တႄႇပဵၼ်ပၢင်တိုၵ်းၵၼ်မႃးႁၢဝ်ႈႁႅင်း မိူဝ်ႈ ဝၼ်းတီႈ 13/9/2019 မႃးသေ ၽူႈၸၢႆးၵေႃႉၼိုင်ႈ လႆႈလူႉတၢႆ ယွၼ်ႉမၢၵ်ႇတူၵ်းသႂ်ႇ။ လိူဝ်ၼၼ်ႉ ၵူၼ်းမိူင်းမၢတ်ႇၸဵပ်း ၸွမ်း 3 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ