Thursday, March 28, 2024

ပၢင်တိုၵ်းၼႂ်းၸႄႈဝဵင်းၼမ်ႉသၼ်ႇႁၢဝ်ႈႁႅင်း ၵူၼ်းပၢႆႈၽေးသိုၵ်းဢမ်ႇယွမ်း 1,000

Must read

သိုၵ်းလူင်ပွင်ၸိုင်ႈလႄႈ တပ်ႉသိုၵ်းတဢၢင်း TNLA ပိုတ်းယိုဝ်းၵၼ်ၼႂ်းၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ ၵူၼ်းမိူင်းပၢႆႈၽေးသိုၵ်း ဢမ်ႇယွမ်း 1,000 ၵေႃႉ ။

Photo by – V Dian Thein Han/ ၵူၼ်းပၢႆႈၽေးသိုၵ်းတီႈၼမ်ႉသၼ်ႇ

ပၢင်တိုၵ်းၼႆႉတႄႇပဵၼ်မိူဝ်ႈဝၼ်းတီႈ 13/9/2019 တေႃႈထိုင်ယၢမ်းလဵဝ် သိုၵ်းတင်းသွင် ၾၢႆႇတိုၵ်ႉၶဵင်ႈၶႅင်ၵၼ်ဝႆႉယူႇ ဝႃႈၼႆ ။

- Subscription -

ဢူးတဵင်းသူၺ်ႇ ႁူဝ်ပဝ်ႈၸုမ်းၸွႆႈထႅမ် (ချမ်းမြေ့လူမှု ကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၵူၼ်းမိူင်း ပၢႆႈမႃးယူႇဝႆႉတီႈ ဝတ်ႉလူင်ၸယၢၼ်းၵျီး(ဇယန်းကြီး) ႁူဝ်ၵူၼ်း 800 ပၢႆ။ ဝတ်ႉၵယႃးၵျီး(ကယားကြီး) 200 ပၢႆ။ ဝၢၼ်ႈ ပၢၼ်းၸႃႇရီႇ (ပန်းစာရီ) 100 ပၢႆ။ လိူဝ်ၼၼ်ႉ ၵမ်ႈၽွင်ႈပၢႆႈၵႂႃႇယူႇၸွမ်းႁိူၼ်းပီႈၼွင်ႉၵေႃႈမီး။ တေႃႈလဵဝ် ၵူၼ်းပၢႆႈ ၽေး သိုၵ်း ဢၼ် လူဝ်ႇၶဝ်ႈၼမ်ႉတၢင်းၵိၼ်တီႈသုတ်းတႄႉ တေပဵၼ်တီႈဝတ်ႉၵယႃးၵျီးတင်း ဝၢၼ်ႈပၢၼ်းၸႃႇရီႇ ။ ၵူၺ်းၵႃႈတႃႇတေၵႂႃႇၸွႆႈထႅမ်ၼၼ်ႉသဵၼ်ႈတၢင်းမၼ်းပႆႇပွင်ႇလႄႈပႆႇၸၢင်ႈၵႂႃႇၸူးၶဝ်” ဝႃႈၼႆ။

မိူဝ်ႈဝၼ်းတီႈ 14 ၼၼ်ႉ မၢၵ်ႇလူင်တူၵ်းသႂ်ႇ လုင်းဢၢႆႈထုၼ်း ဢႃယု 60 ပၢႆ ၵူၼ်းဝၢၼ်ႈလူႉတၢႆၵေႃႉၼိုင်ႈ။ လိူဝ်ၼၼ်ႉ ၽူႈ ၸၢႆးၵေႃႉၼိုင်ႈလႄႈ ၼၢင်းယိင်းၵေႃႉၼိုင်ႈ လႆႈတိူဝ်ႉၸၢၵ်ႇမၢၵ်ႇမၢတ်ႇၸဵပ်း ။

မၢႆးမဵဝ်းဢွင်ႇ ၸုမ်းၵမ်ႉၸွႆႈပၵ်းပိူင် တဢၢင်း (တအာင်း ဉပဒေ အထောက်အကူပြုအဖွဲ့ တာဝန်ခံ) လၢတ်ႈတီႈၽူႈတွႆႇႁွၵ်ႈ ဝႃႈ “ ၵူၼ်းမိူင်းဢၼ်လႆႈလူႉတၢႆ ယွၼ်ႉပၢင်တိုၵ်းၼႆႉ မီးၵေႃႉၼိုင်ႈ။ မၢတ်ႇၸဵပ်းၸွမ်း 2 ၵေႃႉ။ ပဵၼ်ၽူႈၸၢႆးၵေႃႉၼိုင်ႈလႄႈ ၼၢင်းယိင်းၵေႃႉၼိုင်ႈ။ ၵူၼ်းၸၢႆးၼၼ်ႉ တိူဝ်ႉၺႃးတီႈပုမ်၊ ၼၢင်းယိင်းသမ်ႉ တိူဝ်ႉတီႈၵွၵ်းႁူဝ် ဢိတ်း ဢွတ်း။ တေႃႈလဵဝ်တႄႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃ ၼမ်ႉသၼ်ႇဝႆႉ” ဝႃႈၼႆ။

ဢူးတဵင်းသူၺ်ႇ လၢတ်ႈဝႃႈ “ မိူဝ်ႈဝႃးၵေႃႈ ပဵၼ်ပၢင်တိုၵ်းၵၼ် ။ သိုၵ်းလူင်ပွင်ၸိုင်ႈမၢၼ်ႈၸႂ်ႉၶိူင်ႈမိၼ်ယိုဝ်းသိုၵ်း 4 လမ်း မႃးၸွႆႈ။ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈ ႁႅင်း။ တေႃႈလဵဝ် ၼႂ်းဝဵင်းၼမ်ႉသၼ်ႇၼႆႉ သိုၵ်းမၢၼ်ႈတင်း တဢၢင်း တိုၵ်ႉ ၽိူမ်ႉထႅမ်ႁႅင်းသိုၵ်း ၶဵင်ႈၶႅင်တေႃႇၵၼ်။ ပၢင်တိုၵ်းၸၢင်ႈပဵၼ်လႆႈၵူႈၶၢဝ်းယၢမ်းလႄႈၵူၼ်းမိူင်း ဢွၼ်ၵၼ်မႆႈၸႂ်ၵူဝ်ႁႄ ၵၼ်ဝႆႉယူႇ” ဝႃႈၼႆ။

Photo by – V Dian Thein Han/ ၵူၼ်းမိူင်းမၢတ်ႇၸဵပ်း ၼႂ်းၸႄႈဝဵင်းၼမ်ႉသၼ်ႇ

ၸုမ်းဢူၺ်းလီ 3 ၸုမ်း ပိုၼ်ၽၢဝ်ႇၵိုတ်းတိုၵ်း 1 လိူၼ် တေႃႇထိုင်ဝၼ်းတီႈ 8 လိူၼ်ဢွၵ်ႊထူဝ်ႊပိူဝ်ႊ။ တၢင်းၾၢႆႇတပ်ႉ သိုၵ်းလူင်ပွင်ၸိုင်ႈမၢၼ်ႈၵေႃႈ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် တေႃႇထိုင် ဝၼ်းတီႈ 21 လိူၼ်ၼႆႉ။

မိူဝ်ႈဝၼ်းတီႈ 16/9/2019 ယူႇတီႈၸုမ်းဢူၺ်းလီ 4 ၸုမ်း။ တပ်ႉသိုၵ်းတဢၢင်း TNLA ၊ ၵဝ်ႈၵၢင်ႉ MNDAA ၊ ရၶႅင်ႇ AA လႄႈ ၶၢင် KIA တင်း တူဝ်တႅၼ်းတပ်ႉသိုၵ်းလႄႈလူင်ပွင်ၸိုင်ႈမၢၼ်ႈ ဢုပ်ႇၵၼ် တီႈၵဵင်းတုင် ၸိုင်ႈတႆးပွတ်းဢွၵ်ႇၶူင်း။

ဢူးတဵင်းသူၺ်ႇ လၢတ်ႈဝႃႈ “ တေႃႈလဵဝ် ဢၼ်ႁူပ်ႉၵၼ်ယူႇတီႈၵဵင်းတုင်ၼႆၼၼ်ႉၵေႃႈ ဢမ်ႇၸၢင်ႈ မီးတီႈ ၸႂ်ယႂ်ႇ မုင်ႈမွင်းသင်သေဢိတ်း။ ယင်းၵူဝ်ၵူၼ်းမိူင်းလႆႈ တုၵ်ႉၶလိူဝ်ၼႆႉထႅင်ႈၵူၺ်းၶႃႈယဝ်ႉ။ ပေႃးၾၢႆႇၼိုင်ႈလႄႈ ၾၢႆႇၼိုင်ႈ ယွမ်းပၼ်ၵၼ်ဢိတ်းဢွတ်းတႄႉ တေလီယူႇၶႃႈဢေႃႈ။ ၶႅၼ်းတေႃးႁႂ်ႈ ႁၼ်ထိုင်ၵၢင်ၸႂ်ၵူၼ်းမိူင်းၽွင်ႈၶႃႈ” ဝႃႈၼႆ။

တႄႇဢဝ် ဝၼ်းတီႈ 15/8/2019 မႃး ၸုမ်းဢူၺ်းလီ 3 ၸုမ်းတင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်း ၵၼ်မႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ ၵူၼ်းမိူင်းလႆႈလူႉတၢႆယွၼ်ႉ 17 ၵေႃႉ။ မၢတ်ႇၸဵပ်း ၸွမ်းမီး 27 ၵေႃႉလႄႈ ရူတ်ႉၵႃးၺႃး ၽဝ် 20 လမ်းပၢႆ။ ၵူၼ်းမိူင်းလႆႈပၢႆႈၽေးသိုၵ်း မီး 7000 ပၢႆ UNOCHA ပိုၼ်ၽၢဝ်ႇဝႆႉၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း