ၸုမ်းယိပ်းၵွင်ႈၵၢင်ႇ တိုၵ်းယိုဝ်းၵၼ်ၼႂ်းၸႄႈဝဵင်းသီႇပေႃႉ ၸၢၵ်ႇမၢၵ်ႇလူင်တိူဝ်ႉၺႃးၵူၼ်းဝၢၼ်ႈၵေႃႉၼိုင်ႈ မၢတ်ႇၸဵပ်း လိူဝ်ႁႅင်းလႄႈ လႆႈသူင်ႇယူတ်းယႃတူဝ်။

ဝၼ်းတီႈ 17/03/2019 ယၢမ်းဝၢႆးဝၼ်း မွၵ်ႈ 4 မူင်းပၢႆ ၸၢႆးပၼ်ႇၸိၵ်ႉတ (ပၼ်ႇတိတ) ဢႃယု 32 ပီ ပဵၼ်ၵူၼ်းဝၢၼ်ႈ တူၼ်ႈၵႅင်း ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ မၢၵ်ႇလူင်တူၵ်းသႂ်ႇၼႂ်း ႁိူၼ်းသေ ၸၢၵ်ႇမၢၵ်ႇသဵၼ်တိူဝ်ႉသႂ်ႇပႃးမၼ်းၸၢႆးၸွမ်း တူဝ်၊ ၶႃ လႄႈ မိုဝ်း လႆႈမၢတ်ႇၸဵပ်းႁၢဝ်ႈႁႅင်းသေ သူင်ႇၵႂႃႇ ယူတ်းယႃတူဝ် တီႈႁူင်းယႃ လႃႈသဵဝ်ႈ ဝႃႈၼႆ။

ပီႈၼွင်ႉၸမ်ၸႂ် ၸၢႆးပၼ်ႇၸိၵ်ႉတ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ႁိူၼ်းၶဝ် မီးတၢင်းတူၵ်း ႁူဝ်ၵိဝ်ႇ ဝၢၼ်ႈ တူၼ်ႈၵႅင်း ၸုမ်းသိုၵ်းၸုမ်းၼိုင်ႈ မီးႁိမ်းဝၢၼ်ႈ၊ ထႅင်ႈၸုမ်းၼိုင်ႈသမ်ႉ မီးၵႆဝၢၼ်ႈ ဢၼ်ၶဝ်တိုၵ်းၵၼ်ၼၼ်ႉ မၢၵ်ႇ သမ်ႉပူၼ်ႉသေ မိူဝ်းတူၵ်းသႂ်ႇတီႈႁိူၼ်းမၼ်းၸၢႆး ႁိူၼ်းၵေႃႈလႅဝ် ၵူၼ်းၵေႃႈတိူဝ်ႉသႂ်ႇမၼ်းၸၢႆးၶႃႈယဝ်ႉ” ဝႃႈၼႆ။

သိုပ်ႇလၢတ်ႈဝႃႈ “ လွင်ႈၸုမ်းသိုၵ်းယိုဝ်းၵၼ်ၼၼ်ႉ ႁဝ်းၶႃႈၵေႃႈဢမ်ႇႁူႉ ဝႃႈပဵၼ် ၸုမ်းလႂ် တင်း ၸုမ်းလႂ် ယိုဝ်းၵၼ်။ ၽိူဝ်ႇဝႃႈမၼ်းၸၢႆးလႆႈတိူဝ်ႉၺႃးမၢၵ်ႇၸိူင်ႉၼၼ်သေ လႆႈသူင်ႇၵႂႃႇ တီႈႁူင်းယႃသီႇပေႃႉ မွၵ်ႈ 6 မူင်းၶိုင်ႈပၢႆ ႁွတ်ႈထိုင် တီႈႁူင်းယႃ။ ယူႇၵမ်းၼိုင်ႈ လႆႈတေႃႉသူင်ႇၵႂႃႇတီႈႁူင်းယႃလႃႈသဵဝ်ႈ လႆႈႁွတ်ႈထိုင် ၵႂႃႇမွၵ်ႈ 10 မူင်းၶိုင်ႈၵၢင်ၶိုၼ်းၶႃႈ ယဝ်ႉ” ဝႃႈၼႆ။

ၸၢႆးပၼ်ႇၸိၵ်ႉတ ဢႃယု 32 ပီၼႆႉ ပဵၼ်လုၵ်ႈၸၢႆးလုင်းဢိင်ႇတႃႇ ပဵၼ်ၵူၼ်းဝၢၼ်ႈတူၼ်ႈၵႅင်း ဢိူင်ႇၼႃးမၢၵ်ႇၶေႃ မၼ်း ၸၢႆး လႆႈတိူဝ်ႉၺႃးၸၢၵ်ႇမၢၵ်ႇ တီႈၵွၵ်းႁူဝ်၊ တီႈၵွင်ႇၵေႃႈ၊ တီႈၶႅၼ်မိုဝ်းၾၢႆႇသၢႆႉလႄႈ တီႈၶႂႃလူင်လူင်းတႂ်ႈ ၾၢႆႇသၢႆႉ ၸဵမ်ၸိူဝ်းၼႆႉ။

ၽူႈပွင်ၵၢၼ် ၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “တႃႇၸွႆႈထႅမ်မၼ်းၸၢႆး ႁဝ်းၶႃႈ လႆႈၵွင်ႉ ဝႆႉပၼ် တီႈပႃႇတီႇႁူဝ်သိူဝ်ႁဝ်းၶႃႈတင်းလႃႈသဵဝ်ႈ လႄႈ ၽူႈတႅၼ်းသၽႃး ႁဝ်းၶႃႈ ဝႆႉယဝ်ႉၶႃႈ။ လိူဝ်ၼၼ်ႉ ယူႇတီႈပႃႇ တီႇႁူဝ်သိူဝ် သီႇပေႃႉ လႆႈၸွႆႈၵမ်ႉထႅမ်ပၼ် ငိုၼ်း 5 မိုၼ်ႇပျႃး။ လုင်းၸၢႆးဢွင်ႇတဵင်း ၵႅမ်ႁူဝ်ပဝ်ႈ ပႃႇတီႇႁူဝ်သိူဝ်သီႇ ပေႃႉ 25,000 ပျႃးၶႃႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယွၼ်ႉသိုၵ်းၸုမ်းယိပ်းၵွင်ႈၵၢင်ႇ ၼင်ႇၵၼ် ပိုတ်းယိုဝ်းၵၼ်သေ ၵူၼ်းမိူင်းလႆႈတူၵ်းပဵၼ်ယိူဝ်ႇ ၺႃးၸၢၵ်ႇမၢၵ်ႇၸွမ်း လႆႈသူင်ႇယူတ်းယႃတူဝ်တီႈႁူင်းယႃ ၸႄႈဝဵင်းလႃႈသဵဝ်ႈ ၼႂ်းလိူၼ်ၼႆႉ မီးၵႂႃႇ 3 ၵေႃႉယဝ်ႉ ဝႃႈၼႆ။

ဢိင်ၼိူဝ် လွင်ႈပဵၼ်ပၢင်တိုၵ်းၵၼ်ၼႆႉသေ ၵူၼ်းမိူင်းသီႇပေႃႉ လႆႈဢွၼ်ၵၼ်ပၢႆႈယၢၼ်ႁိူၼ်းယေး မႃးသွၼ်ႈၸွမ်းဝတ်ႉ ဝႃးၽႃသိူဝ်ႇ ဢမ်ႇယွမ်း 25,000 ၵေႃႉပၢႆယဝ်ႉ ဝႃႈၼႆ။