မိူဝ်ႈၼႆႉ ဝၼ်းတီႈ 28/08/2019 ယၢမ်းၵၢင်ၼႂ် မွၵ်ႈ 5 မူင်းၶိုင်ႈ ထိုင် 9 မူင်းပၢႆၼႆႉ သိုၵ်းဢူၺ်းလီပွတ်းႁွင်ႇ 3 ၸုမ်း တပ်ႉ သိုၵ်းတဢၢင်း၊ ၵဝ်ႈၵၢင်ႉလႄႈ ရၶႅင်ႇ ႁူမ်ႈၵၼ်သေ ၶဝ်ႈယိုဝ်း တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 291 ဢၼ်ပၵ်း ဝႆႉတီႈတၢင်းၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

တေႃႇထိုင်ယၢမ်းလဵဝ် တင်းသွင်ၾၢႆႇတိုၵ်ႉပဵၼ်ပၢင်တိုၵ်း ၵၼ် ႁၢဝ်ႈႁႅင်းယူႇ ဝႃႈၼႆ။

ၵူၼ်းၼမ်ႉပွင်ႈ ဢၼ်မီးၼႂ်းၵႄႈပၢင်တိုၵ်း လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉၵၢင်ၼႂ် ငိၼ်းသဵင်ၵွင်ႈ။ ယၢမ်းလဵဝ်တႄႉ လႆႈငိၼ်းသဵင်မၢၵ်ႇလူင်ၶႃႈဢေႃႈ။ မၢၵ်ႇလူင်ၸိူဝ်းဢၼ်ၶဝ်ယိုဝ်းမႃးၼၼ်ႉ တူၵ်းသႂ်ႇၼႂ်းတူင်ႈၼႃႈ တၢင်းပွၵ်ႉလူင်ၶၢၼ်ၼၼ်ႉ ၶႃႈ။ ၵူၼ်းဝၢၼ်ႈတႄႉ ပႆႇပၢႆႈၵႂႃႇတၢင်းလႂ်ၶႃႈ ယူႇဝႆႉ ႁင်းၽႂ်ႁင်းမၼ်း ၼႂ်းႁိူၼ်းၸိူင်ႉၼၼ်ၵူၺ်းၶႃႈ” ဝႃႈၼႆ။

သိုၵ်းဢူၺ်းလီပွတ်းႁွင်ႇ 3 ၸုမ်း ဢၼ်ၶဝ်ႈယိုဝ်း တပ်ႉသိုၵ်းလူင်ပွင်ၸိုင်ႈမၢၼ်ႈ ၶလယ 291 တီႈၼမ်ႉပွင်ႈ ၸႄႈဝဵင်းလႃႈသဵဝ်ႈၼႆႉ တေမီးဢဵၼ်ႁႅင်းမွၵ်ႈ 100 ပၢႆ ၵူၼ်းပိုၼ်ႉတီႈလၢတ်ႈၼႄၼင်ႇၼႆ။

“ ဢၼ်မႃးယိုဝ်းသိုၵ်းမၢၼ်ႈၼၼ်ႉ ပဵၼ်ၸုမ်းဢူၺ်းလီ ပွတ်းႁွင်ႇၶဝ် 3 ၸုမ်းၼၼ်ႉၶႃႈ။ မိူဝ်ႈဝူင်ႈပူၼ်ႉမႃးၼၼ်ႉ သိုၵ်း ဢူၺ်းလီၶဝ် မႃးယူႇဝႆႉတၢင်းပွတ်းဝၢၼ်ႈမႂ်ႇ ၵဵင်းႁုင်း။ မိူဝ်ႈၼႆႉ ယၢမ်းၵၢင်ၼႂ် ၸင်ႇၶဝ်ႈယိုဝ်း ပွႆႇမၢၵ်ႇလူင် သႂ်ႇတီႈတပ်ႉ မၢၼ်ႈ 291 ၼၼ်ႉၶႃႈယဝ်ႉ။ သိုၵ်းဢူၺ်းလီၶဝ် ၸႅၵ်ႇၽႄႁဵတ်းလၢႆလၢႆၸုမ်း ဢၼ်ၶိုၼ်ႈၵႂႃႇတၢင်းလွႆလဵင်းၵေႃႈမီးၶႃႈ။ လိူဝ်ၼၼ်ႉ ၵူဝ်ၶဝ်ဢဝ်မၢၵ်ႇပွႆႇ ယႃႉလႅဝ်ပႅတ်ႈၶူဝ်ၼမ်ႉပွင်ႈၼၼ်ႉၵူၺ်းၶႃႈယဝ်ႉ”ဝႃႈၼႆ။

ပၢင်တိုၵ်းတီႈၼမ်ႉပွင်ႈၼႆႉ ၵမ်ႈၽွင်ႈၵေႃႈဝႃႈ သဵင်ၵွင်ႈယိုဝ်းၾၢႆႇလဵဝ်ၼႆသေတႃႉ ၵမ်ႈၽွင်ႈဝႃႈ ငိၼ်းသဵင်ယိုဝ်းတင်းသွင် ၾၢႆႇယူႇ။ တီႈဝတ်ႉၵျွင်းၼမ်ႉမႃႉပေႃးတၼၼ်ႉၵေႃႈ ၵူၼ်းဝၢၼ်ႈမၢၵ်ႇမိုဝ်း ပၢႆႈၽေးသိုၵ်းမႃးသွၼ်ႈဝႆႉယူႇၽွင်ႈ ဝႃႈၼႆ။

လိူဝ်ၼၼ်ႉ မိူဝ်ႈၼႆႉ ယၢမ်းၵၢင်ၼႂ် ၵူၺ်းၼင်ႇၵဝ်ႇ တီႈၶူဝ် 31 လၵ်း ဝၢၼ်ႈၼႃးတီး ၼႂ်းၵႄႈ သႅၼ်ဝီ – ၵုၼ်လူင် ၺႃးယႃႉလႅဝ်။ ရူတ်ႉ 12 လေႃႉ၊ ရူတ်ႉယႂ်ႇ၊ ရူတ်ႉလဵၵ်ႉ ဢမ်ႇၸၢင်ႈၶၢမ်ႈၵႂႃႇမႃးၵၼ် တိုၵ်ႉၶမ်ဝႆႉၼပ်ႉႁူဝ်သိပ်းလမ်းယူႇ ဝႃႈၼႆ။