သင်ၶၸဝ်ႈလႄႈ ၵူၼ်းမိူင်းလၢႆးၶႃႈ ႁူမ်ႈႁႅင်းၵၼ်ၽုၵ်ႇတူၼ်ႈမႆႉ 2000 တူၼ်ႈပၢႆ ၼႂ်းဝၢင်းႁူင်းထမ်းၶမ်း ဝၢၼ်ႈၼွင် ပၢင်ႇ ၸႄႈဝဵင်းလၢႆးၶႃႈ တီႈဝိႁၢရ်ၸဝ်ႈတူၼ်ၶူးလူင် Dr.ၶမ်းမၢႆထမ်မသႃမိ တႄႇၶဝ်ႈၼႂ်းသႃသၼႃၼုင်ႈၽႃႈလိူင်ပဵၼ်ၸဝ်ႈ သၢင်ႇ။

ယေႃးမုၼ်ၸဝ်ႈတူၼ်ၶူးလူင် Dr.ထမ်မသႃမိၼႆသေ ဝၼ်းတီႈ 17/8/2019 ၼႆႉသင်ၶၸဝ်ႈလႄႈ ၵူၼ်းမိူင်းလၢႆးၶႃႈ 300 ပၢႆ ႁူမ်ႈၵၼ်ၽုၵ်ႇ တူၼ်ႈမႆႉ 2220 တူၼ်ႈ ၼႂ်းဝၢင်းႁူင်းထမ်းၶမ်း ဢွင်ႈတီႈၸဝ်ႈတႄႇၶဝ်ႈၼႂ်းသႃသၼႃၼုင်ႈၽႃႈလိူင်သၢင်ႇ ၵၢၼ်း တီႈဝၢၼ်ႈၼွင်ပၢင်ႇ၊ ဝတ်ႉဝိႁၢရ်လူင် ၸႄႈဝဵင်းလၢႆးၶႃႈ။

ၸဝ်ႈၶူးပၼ်ႇတိတ ဝတ်ႉႁူဝ်လွႆ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈတၵ်ႉၵႃႇလူင် ၸဝ်ႈလႅင်းသႂ်ႁိူင်းၶဝ် မီး ၸေႇတၼႃႇဢဝ်တူၼ်ႈမႆႉ ႁူဝ်ႁဵင်တူၼ်ႈမႃးၽုၵ်ႇတီႈၸဝ်ႈႁဝ်းၶဝ်ၼႆႉသေ ယိူင်းဢၢၼ်းတႄႉ တီႈၼႆႈၼႆႉ ပဵၼ်ဢွင်ႈ တီႈၵိူတ်ႇၾင်ႁူၵ်ႉၾင်ႁႄႇၸဝ်ႈၶူးလူင် ၻွၵ်ႊတိူဝ်ႊၶမ်းမၢႆ ထမ်မသႃႇမိႁဝ်းလႄႈ မၼ်းၸဝ်ႈၵေႃႈယိူင်းဢၢၼ်း ၶႂ်ႈႁႂ်ႈ ပဵၼ်ပႃႇမႆႉၶဵဝ်ၸမ်ႉယူႇတႃႇသေႇၼႆသေ ႁဝ်းၸဝ်ႈၶဝ်ၸင်ႇလႆႈမႃးၽုၵ်ႇၼႂ်းဝၢင်းၸဝ်ႈၶူးလူင်ႁဝ်းၼႆႉ ႁႂ်ႈပဵၼ်ပႃႇမႆႉ ယူႇ တႃႇသေႇ” ဝႃႈၼႆ။

ၸဝ်ႈလႅင်းသႂ်ႁိူင်း ႁူဝ်ၼႃႈပီႇတုၸိတ်ႉပၢင်ႇလႅင်းသႂ် (မၢၵ်ႇၵႅင်း) ဝဵင်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈတူၼ်ႈမႆႉ ၼႆႉ ႁဝ်း ၵေႃႈၶႂ်ႈပၼ်တင်းဝၢၼ်ႈတင်းမိူင်းၽုၵ်ႇ။ ပေႃးႁဝ်းမီးတူၼ်ႈမႆႉၼႆၵေႃႈ ၼမ်ႉလိၼ်ႁိၼ်ၽႃမိူင်းႁဝ်းတေလီ ဢၼ် ႁဝ်းၶႃႈ မႃးၽုၵ်ႇတီႈလၢႆးၶႃႈၼႆႉ ယိူင်းၸူးၸဝ်ႈၶူးလူင်ထမ်မသႃမိ။ ႁဝ်းၶႃႈ လႆႈႁၼ်ၸဝ်ႈ ယၢမ်ႈလၢတ်ႈၶိူဝ်းတူၼ်ႈမႆႉ မိူဝ်ႈ လႂ်ၵေႃႈ တိုၵ်းသူၼ်းႁႂ်ႈၵူၼ်းမိူင်းၽုၵ်ႇတူၼ်ႈမႆႉလႄႈ တူၼ်ႈမႆႉလီဢိူဝ်ႈ ၵတ်းလီဢိူဝ်ႈၼႆ ပေႃးၶဝ်ၸဝ်ႈၵႂႃႇၼင်ႈ တီႈလႂ် ၵေႃႈ ၵႆႉၵႂႃႇၸူးတူၼ်ႈမႆႉ ၼင်ႈတႂ်ႈတူၼ်ႈမႆႈတႃႇသေႇလႄႈ ၸင်ႇလႆႈဢဝ်တူၼ်ႈမႆႉ မႃးၽုၵ်ႇတီႈၼႆႈၶႃႈ”ဝႃႈၼႆ။

တူၼ်ႈမႆႉ ဢၼ်ၽုၵ်ႇတီႈဝဵင်းလၢႆးၶႃႈၼႆႉ မိူၼ်ၼင်ႇ မႆႉပေႃ၊ မႆႉၶီႈလဵၵ်း၊ မႆႉသၢမ်သႃ၊ မႆႉမွၵ်ႇသွမ်ႇ၊ မႆႉသဵဝ်ႈ ဢိၵ်ႇထႅင်ႈလၢႆ လၢႆယၢင်ႇ။

ၸၢႆးလႅင်းႁိူင်း ၽူႈယၢမ်ႈဢွၼ်ႁူဝ် တူင်ႉၼိုင်ၸုမ်းၵူၼ်းၼုမ်ႇ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ယိၼ်းႁူမ်ၸူမ်းၸွမ်း ယႂ်ႇၼမ် ၸဝ်ႈလႅင်းသႂ်တႄႉၶႃႈ ပေႃးၵဵဝ်ႇၵပ်းၾၢႆႇသႃသၼႃ၊ ၾၢႆႇလိၵ်ႈလၢႆး ၵူႈလွင်ႈလွင်ႈၵေႃႈ လႆႈၸွႆႈထႅမ်မႃးတႄႉတႄႉ ၵွပ်ႈၼႆလႄႈ ဢၼ်မႃးမိူဝ်ႈၼႆႉ ႁဝ်းၶႃႈ မီးသုၼ်ႇမႃးႁူမ်ႈၽုၵ်ႇၸွမ်းၼႆ မီးတၢင်းၸူမ်းသိူဝ်းတႄႉၶႃႈ” ဝႃႈၼႆ။

မိူဝ်ႈဝၼ်းတီႈ 13/8/2019 ယၢမ်းဝၢႆးဝၼ်း 1 မူင်း ထိုင် 3 မူင်းၼၼ်ႉၵေႃႈ ယူႇတီႈသင်ၶၸဝ်ႈ ဢွၼ်ႁူဝ် ၽူႈၵွၼ်းပွၵ်ႉ/ ဢိူင်ႇၵူၼ်းဝၢၼ်ႈ/ ၵူၼ်းမိူင်း လႄႈ ၵူၼ်းၼုမ်ႇ ႁူဝ်ၵူၼ်းႁိမ်း 200 ၽုၵ်ႇတူၼ်ႈမႆႉ တီႈၼႂ်းဝၢင်းႁူင်းထမ်းၶမ်း ဝၢၼ်ႈ ၼွင်ပၢင်ႇၵႂႃႇ။ မိူဝ်ႈပီၵၢႆ ပီဢွၼ်ၵေႃႈ ၵူၼ်းၼုမ်ႇႁူမ်ႈၵၼ်ၽုၵ်ႇမႃးလၢႆလၢႆၵမ်း၊ ၽုၵ်ႇယဝ်ႉ ၵူၼ်းလုမ်းလႃးတူၺ်းလူ သမ်ႉ ဢမ်ႇပေႃးမီးလႄႈ တူၼ်ႈမႆႉၸိူဝ်းၸပ်းၵေႃႈမီး ၸိူဝ်းႁႅင်ႈတၢႆၵႂႃႇၵေႃႈမီး။