သင်ၶၸဝ်ႈလႄႈ ၵူၼ်းမိူင်းလၢႆးၶႃႈ ႁူမ်ႈၵၼ် ၽုၵ်ႇတူၼ်ႈမႆႉ တႃႇႁၵ်ႉသႃမႅတ်ႇပႅင်း သိင်ႇဝႅတ်ႉလွမ်ႉလႄႈ ႁႂ်ႈပဵၼ်ဢွင်ႈ တီႈၵတ်းယဵၼ် တႃႇၵျၢင်ႉၵမ်တြႃး ၼႂ်းဝၢင်းႁူင်းထမ်းၶမ်း ဝၢၼ်ႈၼွင်ပၢင်ႇ။

ဝၼ်းတီႈ 13/8/2019 ယၢမ်းဝၢႆးဝၼ်း 1 မူင်း ထိုင် 3 မူင်းၼၼ်ႉ ယူႇတီႈသင်ၶၸဝ်ႈ ဢွၼ်ႁူဝ် ၽူႈၵွၼ်းပွၵ်ႉ/ ဢိူင်ႇ ၵူၼ်း ဝၢၼ်ႈ/ ၵူၼ်းမိူင်း လႄႈ ၵူၼ်းၼုမ်ႇ ႁူဝ်ၵူၼ်းႁိမ်း 200 ၽုၵ်ႇတူၼ်ႈမႆႉ တီႈၼႂ်းဝၢင်းႁူင်းထမ်းၶမ်း ဝၢၼ်ႈၼွင်ပၢင်ႇ ၸႄႈ ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ၼင်ႇႁိုဝ် ပေႃးတေမေႃႁၵ်ႉသႃမႅတ်ႇပႅင်းသိင်ႇဝႅတ်ႉလွမ်ႉလႄႈ ႁႂ်ႈပဵၼ်ဢွင်ႈတီႈၵတ်းယဵၼ် တႃႇၵျၢင်ႉၵမ်တြႃး ဝႃႈၼႆ။

ၸဝ်ႈၶူး သိရိထမ်မ ဝဵင်းဢိၼ်း ၽူႈဢွၼ်ႁူဝ် ၽုၵ်ႇတူၼ်ႈမႆႉ တီႈဝၢင်းႁူင်းထမ်းၶမ်း ဝၢၼ်ႈၼွင်ပၢင်ႇ လၢတ်ႈတီႈၽူႈတွႆႇ ႁွၵ်ႈဝႃႈ “ ယိူင်းဢၢၼ်း ဢၼ်လႆႈၽုၵ်ႇတူၼ်ႈမႆႉတီႈၼႆႈၼႆႉ တႃႇႁႂ်ႈဢွင်ႈတီႈၸဝ်ႈၶူးလူင်ႁဝ်း မီးႁူမ်ႈၵတ်းယဵၼ် ပႃႇမႆႉ၊ ပႃႇထိူၼ်ႇ၊ သူၼ်မွၵ်ႇမၢၵ်ႇ ႁႂ်ႈၵတ်းယဵၼ်သေဢမ်ႇၵႃး ႁႂ်ႈပဵၼ်ပႃးတီႈၽိုၵ်းၵျၢင်ႉၵမ်တြႃး။ ယဝ်ႉၵေႃႈ တွၼ်ႈတႃႇ ပႂ်ႉပႃး သိင်ႇဝႅတ်ႉလွမ်ႉ။ မိူဝ်ႈလဵဝ်ၽေးသၽႃႇဝ၊ ၽေးၼမ်ႉထူမ်ႈ၊ ၽေးႁႅင်ႈလႅင်ႉ၊ ၽေးလိူတ်ႇမႆႈၸိူဝ်းၼႆႉ မၼ်းပဵၼ်ႁႅင်းမႃး ၼႃႇလႄႈ ၼင်ႇႁိုဝ် မိူင်းႁဝ်း ပေႃးတေမီးလွင်ႈၵတ်းယဵၼ်ၼၼ်ႉ ႁဝ်းၸဝ်ႈ ၸင်ႇၶိုၼ်းတင်ႈၶူင်းၵၢၼ်ၼႆႉသေ ဢွၼ်ၵၼ် ၶတ်းၸႂ်ႁဵတ်းမႃး” ဝႃႈၼႆ။

တူၼ်ႈမႆႉ ဢၼ်ၽုၵ်ႇသွမ်ႈတီႈၼႂ်းဝၢင်းႁူင်းထမ်းၶမ်း ဝၢၼ်ႈၼွင်ပၢင်ႇ ၸႄႈဝဵင်းလၢႆးၶႃႈၼႆႉ တင်းမူတ်း 100 တူၼ်ႈ။ ပဵၼ်တူၼ်ႈ(မႆႉၽယုင်း) မႆႉမွၵ်ႇသွမ်ႇ တူၼ်ႈမႆႉၼႆႉ ပဵၼ်ၸိူဝ်ႉၽၼ်းဢၼ်ဢဝ်တၢင်းမိူင်းၵျပၼ်ႊမႃးၽုၵ်ႇ ဝႃႈၼႆ။

ယၢမ်းၵၢင်ၼႂ် 8 မူင်း – 11 မူင်းၵွၼ်ႇတေ ၽုၵ်ႇတူၼ်ႈမႆႉၼႆႉ ယူႇတီႈၼၢင်းၸၢမ်ပဝ်း ၼၼ်းၽိရိယၵုၼ်း ႁူဝ်ၼႃႈၾၢႆႇၽုၵ်ႇ သွမ်ႈ တႃႇၽႅၼ်ၵၢၼ်သူၼ် မွၵ်ႇပုတ်ႉထ ၼၢင်းၵိၼ်ပူ လႆႈပၼ်ပၢင်သွၼ်ပိုၼ်ႉႁူႉ ပိုၼ်ႉထၢၼ်ၵၢၼ်ၽုၵ်ႇသွမ်ႈလႄႈ ၽွၼ်း လီလွင်ႈႁၵ်ႉသႃ တူၼ်ႈမႆႉ မိူၼ်ၼင်ႇ ၽေးၶဵၼ်သၽႃႇဝလႄႈ လွၵ်းလၢႆးၵႅတ်ႇၶႄႁႄႉၵင်ႈ၊ ၵၢၼ်ၽုၵ်ႇ တူၼ်ႈမႆႉ လႄႈ ပိုၼ်ႉထၢၼ်ၵၢၼ်ၽုၵ်ႇသွမ်ႈ။ လိူဝ်ၼၼ်ႉ ၵၢၼ်ၽုၵ်ႇသွမ်ႈလႄႈ ယိူင်းဢၢၼ်းလူင် ၶူင်းၵၢၼ်လူင် ၸဝ်ႈႁေႃၶမ်းမိူင်း ထႆး ၸိူဝ်းၼႆႉ။

ထိုင်မႃး ယၢမ်းဝၢႆးဝၼ်း 1 မူင်းထိုင် 3 မူင်းသမ်ႉ သိုပ်ႇသပ်းလႅင်းၼႄ ၶူင်းသၢင်ႈ သူၼ်မွၵ်ႇပုတ်ႉထ ၼၢင်းၵိၼ်ပူ လႄႈ ၽႅၼ်ၵၢၼ်မိူဝ်းၼႃႈ၊ တွၼ်ႈလႅၵ်ႈလၢႆႈတၢင်းႁူႉ၊ ဢုပ်ႇၵုမ်/ တွင်ႈထၢမ်လႄႈ တၢင်ႇလွင်ႈ။ ႁူမ်ႈၵၼ်ၽုၵ်ႇတူၼ်ႈမႆႉ ဢႃယု ယၢဝ်းယိုၼ်း ၸဵမ်ၸိူဝ်းၼႆႉ။

ၵၢၼ်ၽုၵ်ႇသွမ်ႈတူၼ်ႈမႆႉတီႈၼႂ်းဝၢင်းႁူင်းထမ်းၶမ်း ဝၢၼ်ႈၼွင်ပၢင်ႇ ၸႄႈဝဵင်းလၢႆးၶႃႈၼႆႉ ယူႇတီႈၸဝ်ႈၶူးသိရိထမ်မ ဝဵင်းဢိၼ်း တင်း ၸဝ်ႈၶူးပၼ်ႇတိတ ဝတ်ႉႁူဝ်လွႆ သွင်ၸဝ်ႈလႆႈတင်ႈၶူင်းၵၢၼ် တႃႇၽုၵ်ႇတူၼ်ႈမႆႉ ၼႂ်းဝၢင်းႁူင်းထမ်း ၶမ်းၼႆႉသေ ၼႂ်းၶၢဝ်းတၢင်း 1 လိူၼ်ၼႆႉ လႆႈၽုၵ်ႇသွမ်ႈၵႂႃႇ တူၼ်ႈမႆႉ၊ တူၼ်ႈမၢၵ်ႇလႄႈ တူၼ်ႈမွၵ်ႇ မီးၵႂႃႇယဝ်ႉ ႁိမ်း 400 တူၼ်ႈ ဝႃႈၼႆ။

ၼၢင်းၸၢမ်ပဝ်း တူဝ်တႅၼ်းၶူင်းၵၢၼ်လူင် ၾၢႆႇၽုၵ်ႇသွမ်ႈ/ ၶူင်းၵၢၼ် ၸဝ်ႈႁေႃၶမ်း မိူင်းထႆး (ႁွင်ႈ ၵၢၼ်ဝဵင်းၵဵင်းမႆႇ) တင်း ၸၢႆးသူႇရိယဝၼ်း (ႁွင်ႉ) ၸၢႆးသႅင်ဝၼ်း လုၵ်ႈႁဵၼ်းၸၼ်ႉၸွမ် ၵဵင်းမႆႇ ႁူဝ်ၼႃႈၾၢႆႇၽုၵ်ႇသွမ်ႈတႃႇ ၽႅၼ်ၵၢၼ်သူၼ်မွၵ်ႇ ပုတ်ႉထ ၼၢင်းၵိၼ်ပူ လႆႈၼမ်းဢဝ် တူၼ်ႈမႆႉၽယုင်း ၸိူဝ်ႉၽၼ်းၵျပၼ်ႊမႃးၽုၵ်ႇသွမ်ႈ တီႈဝၢင်း သူၼ်မွၵ်ႇပုတ်ႉထ ၼၢင်းၵိၼ်ပူ ဝဵင်းပၢင်လူင် တႄႇဢဝ် ပီ 2017 မႃး ၽုၵ်ႇၵႂႃႇယဝ်ႉ 1,800 တူၼ်ႈ ဝႃႈၼႆ။