ၸုမ်းတူင်ႉၼိုင်တူင်ႇဝူင်းတႆး လၢႆးၶႃႈ ႁူမ်ႈၵၼ် ၽုၵ်ႇတူၼ်ႈမႆႉ 100 ပၢႆ တီႈၼႂ်းဝၢင်းလိၼ် ဢၼ်တေၵေႃႇသၢင်ႈႁဵတ်း ႁူင်းႁဵၼ်းတူင်ႇၵူၼ်းတႆးၼၼ်ႉ ဝႃႈၼႆ။

ဝၼ်းတီႈ 1/7/2019 ယၢမ်းၵၢင်ၼႂ် ၵေႃႇမတီႇႁူင်းႁဵၼ်း၊ ၸုမ်းၵူၼ်းၼုမ်ႇတႆး၊ ၸုမ်းတႆးၵေႃႉလီလႄႈ ၽူႈတႅၼ်းသၽႃး ႁူမ်ႈ ၵၼ် ၽုၵ်ႇတူၼ်ႈမႆႉ တီႈၼႂ်းဝၢင်းတိူၵ်ႈလိၼ် ဢၼ်တေၵေႃႇသၢင်ႈႁဵတ်းႁူင်းႁဵၼ်းတူင်ႇၵူၼ်းတႆး တီႈပွၵ်ႉ 4 ၾၢႆႇ ၸၢၼ်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။

ၸၢႆးလႅင်းႁိူင်း ၸုမ်းၵေႃႇမတီႇ ႁူင်းႁဵၼ်း လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ်ၽုၵ်ႇတူၼ်ႈမႆႉဝႆႉၶႃႈဢေႃႈ။ ႁၢၼ်ႉ တေႃႇႁဵတ်းႁူင်းႁဵၼ်းယဝ်ႉၵေႃႈ ႁႂ်ႈလုၵ်ႈႁဵၼ်းႁဝ်း လႆႈၵိၼ်မၢၵ်ႇမၼ်း။ ၽၵ်းမၼ်း။ ယဝ်ႉၵေႃႈ ႁႂ်ႈလႆႈယူႇႁူမ်ႈမၼ်း ၼႆၶႃႈ။ တူၼ်ႈမႆႉ ဢၼ်မႃးၽုၵ်ႇၼႆႉ ယူႇတီႈပီႈၼွင်ႉႁဝ်းၶႃႈ ၼႂ်းဝဵင်းလၢႆးၶႃႈ ဢဝ်မႃးတီႈႁိူၼ်းၽႂ်မၼ်းသေ မႃးၽုၵ်ႇၵၼ်ၶႃႈဢေႃႈ” ဝႃႈၼႆ။

တူၼ်ႈမႆႉဢၼ်ၽုၵ်ႇဝႆႉၼႂ်းဝၢင်းတိူၵ်ႈလိၼ်ၼၼ်ႉ မိူၼ်ၼင်ႇ တူၼ်ႈမၢၵ်ႇလၢင်း၊ ၽၵ်းႁီႉ၊ မၢၵ်ႇမူင်ႈ၊ ၽၵ်းသဵဝ်ႈၸိူဝ်းၼႆႉ 100 တူၼ်ႈပၢႆ။

ၸၢႆးလႅင်းႁိူင်း လၢတ်ဝႃႈ “ ၶပ်ႉမၢႆမၼ်း တိုၵ်ႉၵိုတ်းၵႆဝႆႉၶႃႈ လွင်ႈတေႁဵတ်းသၢင်ႈႁူင်းႁဵၼ်းတူင်ႇၵူၼ်းတႆးႁဝ်းၶႃႈ ၶိုၼ်ႈမႃး ၼႆႉ တေႃႈလဵဝ်တႄႉ ႁဝ်းၶႃႈ သိုဝ်ႉတီႈလိၼ်၊ ႁဵတ်းသဵၼ်ႈတၢင်း၊ လွမ်ႉႁူဝ်ႉဝႆႉယဝ်ႉ။ ငိုၼ်းဢၼ်ပီႈၼွင်ႉႁဝ်းလၢႆးၶႃႈ ၸွႆႈမႃး လႆႈ 170 သႅၼ်ပျႃးၼၼ်ႉၵေႃႈ ႁဝ်းၶႃႈၸႂ်ႉပေႃးတေသဵင်ႈယဝ်ႉ ၵိုတ်းမွၵ်ႈ 10 သႅၼ်ၵႃႈၼႆႉ ၵူၺ်းယဝ်ႉ။ ၵွပ်ႈၼႆလႄႈႁဝ်းၶႃႈ တေလႆႈလူင်းႁႃ ငိုၼ်းထႅင်ႈယူႇၶႃႈယဝ်ႉ တႃႇတေၵေႃႇသၢင်ႈ ႁူင်းႁဵၼ်းၶိုၼ်ႈမႃး” ဝႃႈၼႆ။

သိုပ်ႇလၢတ်ႈဝႃႈ “ယွၼ်းတိုၵ်းသူၼ်းထိုင် တီႈၽူႈမီးၼမ်ႉၸႂ် ၸေႇတၼႃႇ ႁဝ်းၶႃႈ ၵူႈၸဝ်ႈ၊ ၵူႈတူၼ် ၵူႈၵေႃႉ ႁႂ်ႈလႆႈပဵၼ် တၢင်း ၸွႆထႅမ်ၵမ်ႉယၼ်ပၼ်ႁဝ်းၶႃႈ တႃႇသၢင်ႈႁူင်းႁဵၼ်းသေၵမ်းၼႆ ယွၼ်းလူႇၶၢမ်ႇ တီႈပီႈၼွင်ႉႁဝ်းၶႃႈ တီႈၸမ်ၵႆၵူႈ ၵေႃႉၶႃႈ” ဝႃႈၼႆ။