ၸုမ်းတူင်ႉၼိုင်တူင်ႇဝူင်းၵူၼ်း 5 ၸုမ်းလႄႈ ပီႈၼွင်ႉၵူၼ်းမိူင်းၼမ်ႉၶမ်း ႁူမ်ႈၵၼ်တႅမ်ႈလိၵ်ႈတၢင်ႇထိုင်တီႈ ၾၢႆႇသဵၼ်ႈမၢႆၼႃႈလိၼ် ၸေႈဝဵင်းၼမ်ႉၶမ်း လွင်ႈဝႃႈ ဢမ်ႇယွမ်းႁပ်ႉ ဢၼ်ၶွမ်ႊပၼီႊတေမႃးၶုတ်းႁိၼ်ၶၢဝ်တီႈ တီႈႁူဝ်ၼမ်ႉသီးရီး ။

မိူဝ်ႈဝၼ်းတီႈ 20/07/2019 ၼႆႉၸုမ်း ၶွတ်ႇလိူတ်ႈၽွမ်ႉႁူမ်ႈ UP၊ ပႃႇတီႇသိူဝ်ၽိူၵ်ႇ SNDP ၊ ၸုမ်းၵုမ်းထိင်းလွင်ႈၸုမ်းႁၵ်ႉသႃသိင်ႇဝႅတ်ႉလွမ်ႉလႄႈ ၶူဝ်းၶွင်ၵိုၵ်းပိုၼ်း၊ ၸုမ်းၸဝ်ႈႁႆႈၸဝ်ႈၼႃး လႄႈ ၸုမ်းပေႃႈၾႃႉမႄႈမိူင်း 5 ၸုမ်း ဢိၵ်ႇပႃးတင်း ၵၢင်ႉၵႄႇဝၢၼ်ႈဢိူင်ႇ ၶဝ်ႁူမ်ႈၵၼ်တႅမ်ႈလိၵ်ႈလူင်းလၢႆးမိုဝ်း သၢၼ်ၶတ်းၶူင်းၵၢၼ်ၶုတ်းမၢၵ်ႇႁိၼ်ၶၢဝ် ။

လုင်းၸၢႆးဢွင်ႇဝိၼ်း ႁူဝ်ပဝ်ႈ ၸုမ်းၵုမ်းထိင်းလွင်ႈၸုမ်းႁၵ်ႉသႃသိင်ႇဝႅတ်ႉလွမ်ႉလႄႈ ၶူဝ်းၶွင်ၵိုၵ်းပိုၼ်းလၢတ်ႈတီႈၽူႈတွႆႇႁွၵ်ႈဝႃႈ – “ၾၢႆႇတၢင်း မျေႇၸယိၼ်း(ၾၢႆႇၼႃႈလိၼ်)ၶဝ် ဢွၵ်ႇလိၵ်ႈၼူဝ်ႉတိတ်ႉပိုၼ်ၽၢဝ်ႇဝႆႉဝႃႈ တေမီးၶွမ်ႊပၼီႇ ထဵၵ်ႉတၢၼ်းၶၢႆႇမႃးၶုတ်းလႄႈ ပေႃးၶႆႈသၢၼ်ၶတ်း ၵွၼ်ႇဝၼ်းတီႈ 26 မႃးသၢၼ်ၶတ်းလႆႈယူႇၼႆလႄႈႁဝ်းၶႃႈ 5 ၸုမ်းၸင်ႇႁွင်ႉဢဝ်ႁူဝ်ၼႃႈၵၢင်ႉၵႄႇၶဝ်မႃးဢုပ်ႇၵုမ်ၵၼ် လႆႈၸႂ်တူၵ်းလူင်းၵၼ်သေၸင်ႇသၢၼ်ၶတ်း”- ဝႃႈၼႆ။

ဢၼ်ၸုမ်းတူင်ႉၼိုင်တူင်ႇဝူင်းၵူၼ်း 5 ၸုမ်း ႁွင်ႉ မႃးဢုပ်ႇၵုမ်ၵၼ်မိူဝ်ႈဝၼ်းတီႈ 20 ၼၼ်ႉတႄႉ ပဵၼ် ႁူဝ်ၼႃႈၵၢင်ႉၵႄႇၼႂ်း ဝၢၼ်ႈႁူဝ်ၼႃး ပွၵ်ႉသွင် ၼွင်ၸၢင်ႉၵူင်း မၢၼ်ႉၶမ်း ၸေႈႁႆး လႄႈဢိူင်ႇ မၢၼ်ႈၼွင် ၸိူဝ်းၼႆႉ။  ယွၼ်ႉဝႃႈတေမီးလွင်ႈတုမ်ႉတိူဝ်ႉသိင်ႇဝႅတ်ႉလွမ်ႉလႄႈ ၵူၼ်းဝၢၼ်ႈတူၵ်းလူင်းၵၼ်ဢမ်ႇၽွမ်ႉ ဢမ်ႇၶႂ်ႈလႆႈၵၢၼ်ၶုတ်းမၢၵ်ႇႁိၼ်ၶၢဝ် ၸင်ႇလႆႈတႅမ်ႈလိၵ်ႈသၢၼ်ၶတ်းလူင်းလၢႆးမိုဝ်း သူင်ႇထိုင်လုမ်း တီႈလိၼ် ၸေႈဝဵင်း။

ၸၢႆးယီႈ ၵူၼ်းၼမ်ႉၶမ်းလၢတ်ႈဝႃႈ – “တီႈဢၼ်ၶဝ်တေၶုတ်းၼႆႉၵႂၢင်ႈ  19 ဢေႊၶိူဝ်ႊ။ မၼ်းပဵၼ်ႁူဝ်ၼမ်ႉသီးရီး။ ပေႃးၶဝ်ၶုတ်းတႄႉ ၶီႈသၢႆးတေၶဝ်ႈၼႂ်းၵေးၼမ်ႉ ၊   ၼမ်ႉတေႁႅင်ႈ။ ၼမ်ႉလဵင်ႉၼႃးတေဢမ်ႇမီး။ယွၼ်ႉၼၼ် ႁဝ်းၶႃႈဢမ်ႇၶႆႈလႆႈ။ႁဝ်းၶႃႈၸင်ႇလႆႈသၢၼ်ၶၼ်းၶႃႈဢေႃႈ”- ဝႃႈၼႆ။

ၾၢႆႇၼိုင်ႈ တႃႇတေၶုတ်းႁိၼ်ၶၢဝ်ၼႆႉ ၶွမ်ႊပၼီႊၼႆႉ ယင်းဢမ်ႇမီးလွင်ႈလူင်းၵူတ်ႇထတ်းလွင်ႈတုမ်ႉတိူဝ်ႉသိင်ႇဝႅတ်ႉလွမ်ႉ။ ၵူၼ်းမိူင်းၵေႃႈဢမ်ႇလႆႈႁူႉၸွမ်းသင်ဝႃႈၼႆ။

ဝဵင်းၼမ်ႉၶမ်းၼႆႉ ပဵၼ်လႅၼ်ၶႅၼ်ႈၼႃႈလိၼ်မိူင်းၶႄႇလႄႈမိူင်းတႆး။ ၶူဝ်းၶွင်ၼိူဝ်လိၼ်တႂ်ႈလိၼ်ၵေႃႈမီးၼမ်။ ၶွမ်ႊပၼီႊ ဢၼ်မႃးၶုတ်းဢဝ် တတ်းဢဝ် ၵမ်ႈၼမ် ပဵၼ်ၶွမ်ႊပၼီႊ ၾင်ႇမိူင်းၶႄႇ။ ၵမ်ႈၽွင်ႈၵေႃႈလႆႈဢၼုယၢတ်ႈတီႈလူင်ပွင်ၸိုင်ႈၼေပီႇတေႃႇ ၵမ်ႈၽွင်ႈၵေႃႈ ဢမ်ႇလႆႈဢၼုယၢတ်တီႈလႂ်၊ ၵူၼ်းဝၢၼ်ႈၵေႃႈသၢၼ်ၶတ်းယူႇသေတႃႉ ယင်းတိုၵ်ႉတိုဝ်တၼ်သိုပ်ႇၶုတ်းယူႇတိၵ်းတိၵ်းၵေႃႈမီး- ၵူၼ်းၼႂ်းပိုၼ်ႉတီႈလၢတ်ႈ။